मत्ती 21 - Walangi

यीशु मसीहे मरुण त दुबारी जीन्ता भुण ( मत्ती 21:1—28:20 ) खरी इज्जत जुए यीशु यरुशलेम शेहर अन्तर घेण

¹ जपल यीशु त तसे चेले यरुशलेम शेहरे नीड़े एई गे त “जैतुन” नओएं फाट पुठ बैतफगे ग्रां भेएड़ पुजे, त यीशु अपु दुई चेले ईं बोल कइ लंघाए,

² “तुस सामणि ग्रां घिए। तठि पूज कइ यक खोतुड़ बन्हो, त तेस जोई यक बच्चा बि तुसी मेता। तेन्हि खोल कइ मोउं केईं घिन एईए।

³ अगर तुसी जे कोउं कुछ बोलियाल, त बोलुण, ‘प्रभु असे जरूरत असी’। तोउं से झठ लंघाई छता।”

⁴ ए तोउं भु कि भविष्य वक्ते बोलो ई बोक पूरी भोल कि

⁵ “यरुशलेम शेहरे बाड़ी जे बोले, ‘हेरे, तें राजा तोउ केईं जे अओ असा; से शान्त असा, त खोतुड़ पुठ बिशो असा; बल्कि खोतुड़ु बच्चे पुठ सवार असा।’”

⁶ चेली घेई कइ जिहांणि यीशु बोलो थिउ, तिहांणि किउ।

⁷ चेले खोतुड़ त तसे बच्चा अण्ह कइ, तसे पुठे अपु झिणे छड़े, तोउं यीशु तेस पुठ बिश गा।

⁸ त मेह्‍णु के सुआ हुसुड़े तस इज्जत देण जे अपु अपु फुलो टलिड़ बथ टडे। होरे मेह्‍णु खजूरे डाई कट कट बथ टडी।

⁹ जे हुसुड़ा तसे अगर त पतूं थिआ हुशेरि देण लगे, “राजा दाऊदे कोईये, जइ हो! होशान्ना! जे प्रभु नओं जोई एन्ता, से धन्य असा। अम्बर अन्तर बि होशान्ना।”

¹⁰ जपल यीशु यरुशलेम शेहर अन्तर पुजा, त पूरे शेहर अन्तर हल्ला भोई गा, त मेह्‍णु बोलुण लगे, “ए कोउं भो?”

¹¹ हुसुड़े बोलु, “ए गलील राज्ये, नासरत ग्रांए भविष्य वक्ता ‘यीशु’ भो।”

यीशु यरुशलेमे देहेर अन्तरा व्यापारी बाहर किढ़ण

¹² तोउं यीशु परमेश्वरे देहेर अन्तर घेई कइ से सोब बाहर किढ़े जे तठि लेण देण करण लगो थिए। होर रुपेई अटा-बाटा करणे बाड़ी के मेज त अलिण बेचणे बाड़ी के कुण्सी उटेऊ फटाई छइ।

¹³ तोउं तेन्हि जे बोलु, “धरमे कताब अन्तर लिखो असु, ‘में गी प्रार्थना करणे गी बोलिन्तु; पर तुसी ए डाकु के कुड बणाई छओ असी।’”

¹⁴ तोउं देहेर अन्तर अन्हे त टूंटे यीशु भेएड़ आए, त तेन से सुसुरेरि छड़े।

¹⁵ पर जपल मुख्य पुजारी त धर्मशास्त्री ई चमत्कार हेरे, होर हुसुड़े ई बोलुणे हुशेरि शुणी कि “राजा दाऊदे कोईये, जइ हो! होशान्ना!” त से लेहरी गे।

¹⁶ त से यीशु जे बोलुण लगे, “तोउ शुणतु ना, ए की बोलुण लगो असे?” यीशु तेन्हि जे बोलु, “आं! मोउं शुणतु। पर तुसी कि धरमे कताब अन्तर ई नेईं ना पढ़ो: ‘ए परमेश्वरा! तुसी दुध पीन्ते गभुर त होरे गभुर केआं अपु गुणगान करवाण ठीक किओ असु’”?

¹⁷ तोउं यीशु तेन्हि छड़ दी कइ शेहर केआं बाहर बैतनिया ग्रां घेई गा त तठि रात कटी।

बजन फले अंजीरे बुटा

¹⁸ भ्यागे जपल यीशु त तसे चेले यरुशलेम शेहर जे अओ थिए त तेस ढुक लगी।

¹⁹ बते औत यक अंजीरे बुटा काई कइ से तसे भेएड़ गा। तेस बुटे पुठ पन्नी के अलावा होर कुछ न मेउ त तेन तेस जे बोलु, “इढ़िया पता तोउ पुठ कदी फल न लौते लगो।” तोउं अंजीरे बुटा तिखेईंए शुख गा।

²⁰ ई हेर कइ चेले हैरान भोई गे त तेन्हि बोलु, “ई अंजीरे बुटा एतु झठ कीं शुख गा?”

²¹ यीशु तेन्हि जे बोलु, “अउं तुसी जे बोता, अगर तुस विश्वास रखियेल, होर धिखुभई बि शक न करियेल त जीं मेईं इस अंजीरे बुटे जोई किउ, तीं तुस बि कइ सकते। पक्का विश्वास रख कइ अगर तुस इस फाट जे बि बोलियेल कि उखिड़ कइ समन्दर अन्तर गा, त तीं भोई घेन्तु।

²² होर जे कुछ तुस प्रार्थना करण पेंत विश्वास जोई मगते से सोब मेई घेन्तु।”

यीशु हके बारे सवाल

²³ जपल यीशु देहेर अन्तर घेई कइ शिचालुण लगो थिआ, टजे स्याणे त मुख्य पुजारे तसे भेएड़ एई कइ पुछु, “तुस अन्हि कमी केस हक जोई कते? होर तुन्धे ए हक केन दुतो असा?”

²⁴ यीशु तेन्हि जे बोलु, “अउं बि तुसी केआं यक सवाल पुछता; अगर तुस मोउं बताल त अउं बि तुसी बतान्ता कि ए कम अउं केस हक जोई कता?

²⁵ यूहन्ने मेह्‍णु पुओणि अन्तर चुसुणे हक कोठिआ थिआ? स्वर्गे कनारा थिआ या मेह्‍णु के कनारा थिआ?” त से अपफ बुच बेहसेईण लगे, “अगर अस बोलियेल ‘स्वर्गे कनारा’, त से असी जे बोता, ‘त फिर तुसी तेसे बोकी पुठ विश्वास किस ना किआ?’

²⁶ होर अगर बोलियेल कि ‘मेह्‍णु के कनारा’, त हुसुड़े डर असा, किस कि ए सोब यूहन्ने भविष्य वक्ता समझते।”

²⁷ त तेन्हि यीशु जे जवाब दिता, “असी नेईं पता।” तेन बि तेन्हि जे बोलु, “त अउं बि तुसी जे न बतान्ता कि ए सोब कम अउं केस हक जोई कता।”

दुई कोयी के कथा

²⁸ यीशु बोलु, “इस कथा शुणे। तोउं बोले कि तुस की सोचते? केसे मेह्‍णु दुई कुआ थिए। से जेठा कुआ केईं गा त बोलु, ‘बे कोईया, आज दछि बग कम करण जे गा।’

²⁹ तेन बोलु, ‘अउं न घेन्ता’, पर पता पछतेई कइ बग घेई गा।

³⁰ तोउं बोउए केंठे कुआ केईं घेई कइ तेस जे बि तिहांणि बोलु, त तेन जवाब दुतु, ‘जी! अउं घेन्ता’, पर ना गा।

³¹ अन्हि दुहि अन्तरा केन जेईं बोउए इच्छा पूरी की?” तेन्हि बोलु, “जेठा तेन।” यीशु तेन्हि जे बोलु, “अउं तुसी जे बोता कि मामला नेणे बाड़े त वेश्या तुसी केआं पेहलाई परमेश्वरे राज्य अन्तर घेन्ते।

³² किस कि चुसुणे बाड़ा यूहन्ना धरमे बथ हरालता तुसी केईं आ, पर तुसी तसे विश्वास न किआ। पर मामला नेणे बाड़ी त वेश्या तेस पुठ विश्वास किआ। पर तुसी ई हेर कइ बि पछतावा न भुआ, होर तुसी तेस पुठ विश्वास ना किआ।”

दुष्ट आधिबाड़ी कथा

³³ तोउं यीशु बोलु, “यक होरी कथा बि शुणे: यक मालिक थिआ। तेन यक दछि बगिंचा ला, त तसे चोहरो कना घोड़ी के बाड़ि दी छइ। दछि रस किढ़ुण जे पलण अन्तर खोपर बणा, त पेहरा देण जे छपिर बड़ाई। तोउं तस मेह्‍णु कें धे आधी दी कइ परदेश जे घेई गा।

³⁴ जपल दछि उह्‍णणे टेम आ, त फल नेण जे तेन अपु नौखर आधिबाड़ी केईं लंघाए।

³⁵ पर आधिबाड़े तसे नौखर टाइ कइ यक मडा, कोउं घोड़िआ त कोउं मार छड़ा।

³⁶ तोउं तेन मालिके दुबारी होरे सुआ नौखर लंघाए, पर तेन्हि जोई बि तिहांणि किउ।

³⁷ अखिरकार, तेन ईं सोच कइ अपु कुआ तेन्हि केईं लंघा कि से तसे इज्जत करियेल।

³⁸ पर आधिबाड़े कुआ हेर कइ से अपफ बुच बोलुण लगे, ‘एईएं त हकदार भो; चले, अस एस मार छते त असे सोब धन दौलत नी छते।’

³⁹ तोउं तेन्हि से टाता त दछि बगिंचे बाहर किढ़ कइ मार छड़ा।

⁴⁰ त अब जपल दछि बगे मालिक एईयाल त से तेन्हि आधिबाड़ी जोई की कता?”

⁴¹ तेन्हि तेस जे बोलु, “से तेन्हि बुरे मेह्‍णु के खेया खाट कइ छता; त दछि बगिंचा तेन्हि आधिबाड़ी कें धे देन्ता, जे टेम टेम पुठ तसे धे फल देन्ते रेहेल।”

⁴² यीशु तेन्हि जे बोलु, “तुसी कि कदी धरमे कताब अन्तर ईं नेईं न पढ़ो: ‘जे घोड़ मिस्त्री रेज समझ कइ फटओ थिआ, सेईंए कुणे खास घोड़ बण गा?’ ‘ए प्रभु कनारा भुओ असु त हें नजर अन्तर ए चमत्कारी कम भो!’

⁴³ तोउं त अउं तुसी जे बोता कि परमेश्वरे राज्य अन्तर भुणे अशुश तुसी केआं नीइ घेन्ति, त ईं जाति धे दिईन्‍ती, जे तसे निआंग मान कइ सही फल देन्ता।

⁴⁴ जे इस घोड़ पुठ झड़ता, से चूर चूर भोई घेन्ता; होर जेस पुठ ए घोड़ झड़ता, से ढची घेन्ता।”

⁴⁵ जपल मुख्य पुजारे त फरीसी तसे कथा शुणी त बिझ गे कि से तेन्के बारे बोलुण लगो असा।

⁴⁶ तोउं त से यीशु टाण चहन्तेथ, पर मेह्‍णु हेर डर गे किस कि मेह्‍णु तेस भविष्य वक्ता मानतेथ।