मत्ती 20 - Walangi

मजूरी के कथा

¹ यीशु स्वर्गे राज्य बारे बोक कते-कुते बोलु, “स्वर्गे राज्य केसे गीहे मालिके ईं भुन्ता, जे भ्यागे निसा त अपु बग कमुण जे मजूर लाए।

² तेन मजूरी कें धे यक रोजे धिहाड़ी यक तोड़े चन्नी मेलकी देणे बोल कइ से अपु बग लंघाई छड़े।

³ तोउं भ्यागे नौ बजे ईं से बाजार गा त तठि सुआ मेह्‍णु बेहले काए।

⁴ तेन तेन्हि जे बोलु, ‘तुस बि में बग घिए, त जे कुछ तुं बणतु अउं तुन्धे देन्ता।’ तोउं से बि गे।

⁵ तोउं जपल से दिसाई बाराह बज त टाई बज बाजार गा त तेन तिहांणि किउ।

⁶ ब्यादि पंज बजे टेम फि तेन होरे मेह्‍णु बेहले काए त तेन्हि जे बोलु, ‘तुस किस इठि दन भइ बेहले बिशो असे?’

⁷ तेन्हि तेस जे बोलु, ‘अस केनि धिहाड़ी पुठ नेईं लओ।’ तेन तेन्हि जे बोलु, ‘तुस बि में बग घिए।’”

⁸ “ब्यादि बगे मालिके अपु मलाजम जे बोलु, ‘मजूरी भिआई कइ तेन्हि सोबी के धिहाड़ी दी छड़।’

⁹ जपल से, जे पंज बजे टेम कम जे गो थिए, अपु धिहाड़ी नेण जे आए त तेन्हि यक यक तोड़े चन्नी मेलकी मेई।

¹⁰ त जे भ्यागे केआं कमुण लगो थिए तेन्हि सोचु कि तेन्हि तेन्हि केआं ज्यादा धिहाड़ी मेती, पर तेन्हि बि यक यक तोड़े चन्नी मेलकी ईं मेई।

¹¹ जपल धिहाड़ी मेई त से मालिक जे चरचर करण लगे।

¹² तेन्हि बोलु, ‘पती अओ अन्हि त यके घंटा ईं कम किउ, त तेईं अन्के धे कीं हें बराबर धिहाड़ी दिती, किस कि असी दन भइ धुप बिश कइ कम किउ?’

¹³ तेन तेन्हि बुचा यक जेईं जे जवाब दुतु, ‘ए दोस्ता! मेईं तोउ जोई कोई अन्याय नेईं किओ। किस कि यक तोड़ा चन्नी मेलकी धिहाड़ी त मानियेरी थी।

¹⁴ जे तें भो टाण दे त गा; में त ईंए इच्छा असी कि जतु अउं तेन्धे देन्ता, ततुरु अउं पतुई अओ असे धे बि देन्ता।

¹⁵ अउं कि अपु रुपेई जीं चहूं तीं खर्च ना बटता ना? ना तोउ में भलु करुण औउजु नउ ना?’

¹⁶ इहांणि जे पतूं असे से अगर भोई घेन्ते, होर जे अगर असे से पतूं भोई घेन्ते।”

अपु मरणे त दुबारी जीणे बारे यीशु टेकी भविष्य वाणि

¹⁷ यीशु यरुशलेम शेहर जे घेन्त पेंत बाराह चेली अपफ जोई साते घिन गा, त बथ तेन्हि जे बोलुण लगा,

¹⁸ “हेरे! अस यरुशलेम शेहर जे घेण लगो असे; त तठि मुख्य पुजारी त धर्मशास्त्री मनखे कुआ मतलब मोउं टान्ते त मरणे दोषी करार देन्ते।

¹⁹ तोउं से मोउं गैर यहूदी के हतेउ दी छते ताकि से में फूल बणायेल, चाबुके बइ मडीयेल, होर क्रूस पुठ ढनाई कइ मार छड़ियेल। पर टेके रोज अउं दुबारी जी घेन्ता।”

याकूबे त यूहन्ने ईया यीशु छनेअरे करण

²⁰ तोउं जबदी जुएली अपु कोयी याकूब त यूहन्ने जोई साते यीशु भेएड़ एई कइ तसे खुर बिने, त तेस केआं कुछ मगण लगी।

²¹ यीशु तेस जे बोलु, “तु की चहन्ती?” तेन तेस जे बोलु, “मेन्धे ईं वचन दिए कि तुस में दुहे कुआ अपु राज्य अन्तर यक अपु देहणा कना त यक बउंआ कना बिशाणते।”

²² यीशु तेस जे जवाब दिता, “तुस न जाणते कि तुस की मगण लगो असे।” तोउं तेन्हि दुई भाई जे बोलु, “दुखे जे कटोरा अउं पीण पुठ असा, तुस कि तस पी बटते ना?” तेन्हि तेस जे बोलु, “पी बटते।”

²³ यीशु तेन्हि जे बोलु, “तुस में कटोरा केआं त जरूर पीन्ते, पर अपु देहणा त बउंआ कना बिशाणणे कम, में न भो। पर तठि से बिश्ते, जेस जे में बोउए से तेयार किओ असा।”

²⁴ ईं शुण कइ दसो चेले तेन्हि दुहि जे लेहरी गे।

²⁵ यीशु तेन्हि भेएड़ भिआई कइ जे बोलु, “तुस जाणते कि होर जाति मेह्‍णु के राजे तेन्हि पुठ राज कते; होर जे अफसर बणते, से मेह्‍णु पुठ अपु हक जतान्ते।

²⁶ पर तुसी बुछ ई न भुओ लौतु; बल्कि जे कोउं तुसी बुछ बोडा भुण चहन्ता, तस तुं सेवक बणुण।

²⁷ होर जे कोउं तुं मुखिया बणुण चहन्ता, तस तुं सोबी के नौखर बणुण।

²⁸ किस कि अउं मनखे कुआ बि तोउं नेईं अओ कि में सेवा करेउं। अउं तोउं अओ असा कि होरी के सेवा करुं। त सोबी मेह्‍णु पापे सज्जाई केआं बचाणे लिए अपु प्राण दिउं।”

यीशु दुई अन्हे मेह्‍णु सारेरण

²⁹ जपल यीशु त तसे चेले यरीहो शेहर केआं नशण लगो थिए, सुआ हुसुड़ा तेन्के पता आ।

³⁰ त दुई अन्हे, जे बते औत बिशो थिए, ईं शुणु कि यीशु घेण लगो असा, त हक दी दी कइ बोलुण लगे, “ए प्रभु, राजा दाऊदे कोईया! असी पुठ दाह कर।”

³¹ मेह्‍णु तेन्हि जे लेहरी कइ बोलु, “चुप बिशे!” पर से जोरी जोरी हुशेरि दी कइ बोलुण लगे, “ए प्रभु, राजा दाऊदे कोईया! असी पुठ दाह कर।”

³² तोउं यीशु रुक गा। से भिए त पुछु, “तुस की चहन्ते? मोउं तुसी जे की करुण?”

³³ तेन्हि तेस जे बोलु, “ए प्रभु, दाह करे कि हें टीर सारी घियेल।”

³⁴ तेन्हि पुठ दाह कर कइ यीशु तेन्के टीर छुए, त से तिखेईंए हेरण लग गे; होर तसे पता पता घेई गे।