मत्ती 17 - Walangi

यीशु रूप बदलण

¹ तढ़ेया छेआ रोज पता, यीशु पतरस, याकूब त तसे भाई यूहन्ना अपफ जोई साते यक उचे फाट पुठ घिन गा। तेन्हि जोई होर कोई नेओथ।

² तठि तेन्के सामणि यीशु रूप बदली गा त तसे मुंह दिसे ईं दुफार, होर तसे झिणे डंगे ईं हच्छे भोई गे।

³ तोउं तेन्हि अचानक मूसा त एलिय्याह तेस जोई बोके कते काए।

⁴ त पतरसे यीशु जे बोलु, “ए प्रभु, हें इठि भुण ठीक असु। अगर तें इच्छा असी त अउं इठि टाई डेरा लान्ता; यक तोउ जे, यक मूसा जे त यक एलिय्याह जे।”

⁵ से होता बोलुण लगो थिआ कि यक चमकता बदेए तेन्के पुठे एई गा, त तेस बदेए केआं यक अवाज आई: “ए में ट्यारा कुआ भो, जेस हेर अउं खुश असा। असे शुणे!”

⁶ चेले ईं शुण कइ उटेऊ बिशे, किस कि से सुआ डर गो थिए।

⁷ पर यीशु भेएड़ एई कइ से छुए, त बोलु, “खड़ भो! डरे नोउ।”

⁸ त जपल तेन्हि टीर उघाड़े त यीशु छड़ दी कइ होर कोई न काए।

⁹ तोउं फाट पुठा उन्निया एन्ते एन्ते यीशु तेन्हि जे सावधान कराई कइ बोलु, “जपल तकर मनखे कुआ मरो तेन्हि अन्तरा दुबारी जी न घियाल, तपल तकर जे कुछ तुसी काउ, तसे बारे केसे जे बि ना बोलुण।”

¹⁰ तोउं तसे चेली तेस केआं पुछु, “त फिर गुरुजी! धर्मशास्त्री किस बोते कि एलिय्याहे पेहले एणे जरूरी असु?”

¹¹ त यीशु बोलु, “आं एलिय्याह सच्चे एन्ता त सोब किछ सुसुर कता।

¹² पर अउं तुसी जे बोता कि एलिय्याह एई बि गो असा, पर मेह्‍णु से न पिछाणा। पर तेन्हि जीं चहु तीं तेस जोई किउ। तिहांणि मनखे कुआ बि से भुंजान्ते।”

¹³ तोउं चेली समझु कि से तेन्हि एलिय्याह बारे नेईं, बल्कि चुसुणे बाड़ा यूहन्ने बारे बताण लगो थिआ।

यीशु दुष्ट आत्माई भुंजो यक कुआ सुसुरेरण

¹⁴ जपल यीशु त तसे चेले हुसुड़े केईं पुजे त यक मेह्‍णु यीशु भेएड़ आ, त उटेऊ बिश कइ बोलुण लगा,

¹⁵ “ए प्रभु, में कुआ पुठ दाह कर! तस मिर्गी एन्ती, त सुआ कष्ट अन्तर रेहन्ता; से घड़ी घड़ी आग त पाणि अन्तर झड़ता।

¹⁶ मेईं से तुं चेली केईं अण्हतो थिआ, पर एन्हि से सुसुरेरि न बटा।”

¹⁷ त यीशु बोलु, “ए अविश्वासी त हठि मेह्‍णुओ! अउं कपल तकर तुसी जोई बिश्ता? कपल तकर तुं सेहन्ता? तस इठि मोउं केईं घिन आई।”

¹⁸ तोउं यीशु दुष्ट आत्मा डराई कइ निसण जे निआंग दिती त से तेसे अन्तरा निस गई; त कुआ तिखेईंए सुसुरी गा।

¹⁹ पता चेली अकेले यीशु भेएड़ एई कइ बोलु, “असी से किस न निशाण बटी?”

²⁰ तेन तेन्हि जे बोलु, “अपु कमजोर विश्वासे बझई जोई तुसी से किढ़ न बटी। किस कि अउं तुसी जे बोता, अगर तुस शरहेउ रो जतु बि पक्का विश्वास कर कइ इस फाट जे बोलियेल, ‘इठिआ खिसक कइ ओठि गा’, त से घेई घेन्ता। त कोई बि बोक तुं लिए मुश्किल न भुन्ति।

²¹ [पर इस किस्मी दुष्ट आत्मा बजन प्रार्थना त ब्रते न निस्ती।]”

अपु मरणे बारे यीशु दोकी भविष्य वाणि

²² पता जपल यीशु त तसे चेले गलील राज्य अन्तर कठे भुए, त यीशु तेन्हि जे बोलु, “मनखे कुआ जे अउं भो, मनखे हथे टोवेई घेण असा।

²³ से मोउं मार छते, तोउं अउं टेके रोजे दुबारी जी घेन्ता।” ई शुण कइ से उदास भोई गे।

यीशु देहरे मामला देण

²⁴ जपल यीशु त तसे चेले कफरनहुम शेहर पुजे, त देहरे मामला नेणे बाड़ी पतरस केआं पुछु, “तुं गुरु देहरे मामला न देन्ता ना?”

²⁵ तेन बोलु, “आं, देन्ता।” तोउं, जपल से गी आ, त यीशु पेहलाई तस केईआं पुछु “तु की सोचता? धरती राजे मामला केस केआं नेन्ते? अपु गभुर केआं या पराई केआं?”

²⁶ पतरसे तेस जे बोलु, “पराई केआं।” त यीशु तेस जे बोलु, “त गभुर मामला देण केआं बच गे।

²⁷ तोउं बि तेन्हि नाराज ना करण जे तु तथे भेएड़ घेई कइ मछली टाण जे कांटा छड़। त जे पेहला मछली टआल; तसे आसी उघाड़। तठि तोउ यक चोउर तोड़े चन्नी मेलकी मेता। तेस घिन कइ में त अपु बदले तेन्के धे दी छड़।”