लूका 7 - Walangi

गलील राज्य अन्तर यीशु कम ( 7:1—9:50 ) यीशु सुबेदारे नौखर ठीक करण

¹ जपल तेन मेह्‍णु जोई सोब बोक कइ छइ त से कफरनहुम शेहर जे आ।

² तठि यक रोमी सुबेदार थिआ, जेसे यक नौखर बीमार थिआ त मरणे बाड़ा थिआ। से तस सुआ ट्यारा थिआ।

³ तेन सुबेदारे यीशु बारे बोके शुणो थी। त तेन यहूदी के टजे स्याणे यीशु केईं लंघाई कइ से भिआ कि एई कइ तसे नौखर सुसुरेरिण दे।

⁴ त से यहूदी मेह्‍णु यीशु केईं एई कइ हथ जोड़ुण लगे “से इस लेएक असा कि तुस तसे नौखर ठीक करे।

⁵ किस कि से हें यहूदी जाति जुए परेम रखता त तेन असी जे यक अराधनालय बणो असा।”

⁶ त यीशु तेन्हि जुए गा। पर जपल से तसे गीहे भेएड़ ईं पुजा त तेन सुबेदारे अपु मितरी जे ईं बोल कइ यीशु जुए मीण जे लंघाए, “ए प्रभु, हउ कष्ट ना करे, किस कि अउं अत धर्मी नेईं कि तु में गी आई।

⁷ तोउं त अउं अपफ ना आ कि अउं तुं सामणे एई सकुं। तुस तठिआ निआंग दिए त में नौखर सुसुरी घेन्ता।

⁸ किस कि अउं बि होरी पड्डे कम कता, त में पड्डे बि होरे सपाही असे। जपल अउं यक जेईं जे बोता कि ‘गा!’ से घेन्ता; त होरे जे बोता ‘आ!’ त से एन्ता; जपल अउं अपु नौखरी जे बोता ‘इस कम कर!’ त से तस कता।”

⁹ ई शुण कइ यीशु हैरान भोई गा त तसे पता जतु मेह्‍णु अओ थिए, पतूं खिरक कइ तेन्हि जे बोलु, “अउं तुसी जे बोता कि मोउं पूरे इस्राएली मेह्‍णु अन्तर बि अत विश्वास करणे बाड़ा ना मेईंया।”

¹⁰ पता जपल तसे मितर गी पुजे त से नौखर ठीक भोई गो थिआ।

यीशु विधवाई कुआ दुबारी जीआण

¹¹ तढ़ेया कुछ रोज अन्तर ईं, यीशु नाईने नओएं यक ग्रां जे गा। तसे चेले त मेह्‍णु के बोडा हुसुड़ा बि तसे पता पता गओ थिआ।

¹² जपल से तेस ग्रांए भेएड़ पुजा त तेन हेरु कि मेह्‍णु यक मुओ मेह्‍णु पथण जे बाहर नेण लगो थिए। से मेह्‍णु अपु ईये इकलौता कुआ थिआ, त तसे ई विधवा थी। बिचारी तेस जुओई ग्रांए सुआ मेह्‍णु थिए।

¹³ तेस हेर कइ प्रभु दाह एई त तेन तस जे बोलु, “ना रोल!”

¹⁴ तोउं तेन भेएड़ घेई कइ बमाण छुआ त कन्‍हा देण बाड़े रुक गे। त तेन बोलु, “ओई जवाना! अउं तोउ जे बोता, खड़ भो!”

¹⁵ तिखेईंए से मुओ मेह्‍णु खड़ भुआ त बोक करण लग गा। त यीशु से तसे ईये धे दी छड़ा।

¹⁶ ई हेर कइ सोब मेह्‍णु हैरान भोई गे त से परमेश्वरे गुणगान कर कइ ईं बोलुण लगे, “असी बुच यक बोडा भविष्य वक्ता खड़िए असा, त हें मदत करण जे परमेश्वर अओ असा।”

¹⁷ त तसे बारे ई बोक पूरे यहूदिया त नीड़े भेएड़े इलाके अन्तर हू भोई गई।

चुसुणे बाड़े यूहन्ने यीशु केईं अपु चेले लंघाण

¹⁸ इन्हि सोब बोकी के खबर यूहन्ने चेली यूहन्ने शुणाई।

¹⁹ तिखेईं यूहन्ने अपु चेली बुच दुई भिआई कइ ई पुछुण जे यीशु केईं लंघाए, “कि परमेश्वरे बोलो से एणे बाड़ा तु भो ना, कि असी कोउं होरा भाड़ण?”

²⁰ त तेन्हि यीशु केईं एई कइ बोलु, “चुसुणे बाड़ा यूहन्ना अस तोउ केईं ई पुछुण जे लंघो असे ‘कि परमेश्वरे बोलो से एणे बाड़ा तु भो ना, कि असी कोउं होरा भाड़ण?’”

²¹ तिखेईं यीशु सुआ बीमार मेह्‍णु ठीक किए, त जे दुष्ट आत्मा बेलि परेशान थिए, त अन्हे थिए से सोब ठीक कइ छड़े।

²² त तेन तेन्हि जे बोलु, “जे बि तुसी हेरो त शुणो असु, घेई कइ सोब यूहन्ने जे बोलीण दिए। बोले कि अन्हे से हेरते, लटे से हंटते, कोढ़ी ठीक भोई घेन्ते, टौणे से शुणते त मरो से जीएईंते, होर जे कंगाल असे तेन्हि खुश खबरी शुणान्ते।

²³ होर धन्य असे से मेह्‍णु, जे मोउं पुठ विश्वास कते, त कदी शक ना कते।”

²⁴ जपल यूहन्ने लंघो चेले घेई गे त यीशु यूहन्ने बारे मेह्‍णु जे बोलुण लगा, “तुस अरुणि धार की हेरण जे गो थिए? ब्यारी बेलिए हिलतु घास हेरण जे गो थिए ना? ना!

²⁵ त फि तुस की हेरुण जे गो थिए? की तुस खरे झिणे डबो मेह्‍णु हेरुण जे ना? हेरे, जे खरे झिणे डबते त खरे खांते पीन्ते से राजमहल अन्तर बिश्ते।

²⁶ फि किस गो थिए? केस भविष्य वक्ता हेरण जे ना? हाँ, अउं तुसी जे बोता कि भविष्य वक्ती केआं बि बोडे हेरण जे गो थिए।

²⁷ से एईएं भो जेसे बारे धरमे कताब अन्तर लिखो असु, ‘हेर, अउं अपु दूत तें अगर अगर लंघान्ता, जे तोउ जे बथ सुसुर जुढ़ेरता।’”

²⁸ “अउं तुसी जे बोता कि जे जिल्हाणु जमो असे, तेन्हि अन्तरा यूहन्ना केआं ज्यादा खास कोई न भो। पर परमेश्वरे राज्य अन्तर सोबी केआं मठुड़ बि यूहन्ना केआं खास असा।”

²⁹ “सोब मेह्‍णु त मामला नेणे बाड़े बि यूहन्ने बेलि पाणि अन्तर चुस कइ ई साबित किआ कि परमेश्वरे मेह्‍णु बचाणे तरीका सही असा।

³⁰ पर फरीसी त धर्मशास्त्री तसे बेलि पाणि अन्तर ना चुसी कइ हरालु कि तेन्हि परमेश्वरे योजना केआं मछोड़ा दुतो असा।”

³¹ तोउं यीशु तेन्हि जे बोलु, “मोउं इस टेमे मेह्‍णु केस जोई बराबरी करीण, से केसे ईं असे?

³² से बाजार अन्तर बिशो तेन्हि गभुरु केईं लगते, जे यक होरी जे हक दी कइ बोते ‘असी तोउ जे ढोंस बेईंछ बजाई, पर तु ना नचा; असी रोलो-गाश की, पर तेईं ना रोलु।’

³³ किस कि चुसुणे बाड़ा यूहन्ना ना रौठि खांते आ होर ना दाखरस पीन्ते आ। त तुस बोते कि तस अन्तर दुष्ट आत्मा असी।

³⁴ पर जपल मनखे कुआ खांता पीन्ता आ त तुस बोते, ‘हेरे, बोडपेटि त प्याकड़ मेह्‍णु, मामला नेणे बाड़े त पापी मेह्‍णु के मितर।’

³⁵ तोउं बि कमी के फले बइ मेह्‍णु पता लगता कि परमेश्वरे ज्ञान सच्चा असा।”

फरीसी गी यक पापण जिल्हाणु माफी

³⁶ यक रोज, शमौन नोउए यक फरीसी यीशु जे धाम की। त यीशु तसे गी घेई कइ रौठि खाण जे बिठा।

³⁷ तेस ग्रांए यक पापण जिल्हाणु ई पता लगा कि फरीसी गी से रौठि खाण जे अओ असा, त तेन यक संगमरमरे बोतुल अन्तर मुश्कदार तेल अण्हा।

³⁸ त तसे भेएड़ एई कइ तसे खुरी पुठ रोलुण लगी। अपु आंखु बइ तसे खुर सैले। अपु झशुड़े बइ तसे खुर साफ की त तसे खुर घड़ी घड़ी फोकड़ियाई कइ मुश्कदार तेल ला।

³⁹ ई हेर कइ से फरीसी, जेन तस धाम किओ थी, अपु मन अन्तर सोचुण लगा, “अगर ए भविष्य वक्ता भुन्ताथ त एस पता लग घेन्ताथ कि ए जे जिल्हाणु तस छूण लगो असी ए कोउं भिन्थ त असे गुण कीं असे? किस कि ए त यक पापण असी।”

⁴⁰ जे से सोचुण लगो थिआ यीशु पता लग गा त तेन बोलु, “ए शमौना, मोउं तोउ जे कुछ बोलुण असु।” त तेन बोलु, “हाँ गुरु, बोलीण दिए।”

⁴¹ यीशु बोलु, “केस यक लाले दुई कर्जदार थिए। यक पंज सौ दीनारे त होरा पंझा दीनारे।

⁴² जपल तेन्हि केईं तसे ऋण देण जे कुछ ना रेहु त तेन लाले दुहि के ऋण छड़ दुतु। त तेन्हि बुच कोउं जेईं तेस जिमदारे गुण ना बिसरीन्‍ता?”

⁴³ शमौने बोलु, “में हिसाब जुए त से, जेसे ज्यादा ऋण छड़ दुतो थिउ।” यीशु तस जे बोलु, “आं, तेईं ठीक बोलु।”

⁴⁴ त तेस जिल्हाणु कना जे खिरक कइ शमौन जे बोलु, “तु इस जिल्हाणु हेर! अउं तें गी आ, तेईं में खुर धूण जे मेन्धे पुओणि ना दुतु। पर एन अपु टीरे आंखु बइ में खुर सैले त अपु झशुड़ बइ साफ किए।

⁴⁵ तेईं में खुर ना बिने, पर जपल केआं अउं अओ असा, एन में खुर फोकड़िआ बन्न किओरे नेईं।

⁴⁶ तेईं में मगिर तेल ना ला, पर एनि में खुरी जुए मुश्कदार तेल ला।

⁴⁷ तोउं त अउं बोता कि एसे सुआ परेम जोई मोउं धराण हरालतु कि एसे सुआ पाप माफ भोई गो असे। पर जेसे धिक भइ पाप माफ भो असा, से घट परेम कता।”

⁴⁸ तोउं तेन तेस जिल्हाणु जे बोलु, “तें सोब पाप माफ भुए।”

⁴⁹ तपल जे मेह्‍णु तस जुए रौठि खाण बिशो थिए अपु अपु मन अन्तर सोचुण लगे कि ए कोउं भो जे पाप बि माफ कता?

⁵⁰ त यीशु तेस जिल्हाणु जे बोलु, “मोउं पुठ तें विश्वासे ईं तु बचाई छइ। खरी भोई कइ गा।”