लूका 6 - Walangi

भक्ति करणे रोजे प्रभु

¹ यक भक्ति करणे रोज यीशु त तसे चेले बगे बुच बइ हंटण लगो थिए त तसे चेले गिहुंए सियुड़ पुरोड़ पुरोड़ कइ खाण लगे।

² त कोई फरीसी बोलुण लगे, “भक्ति करणे रोज जे करुण ठीक नेईं, तेस कम तुस किस कते?”

³ यीशु तेन्हि जे बोलु, “धरमे कताब अन्तर तुसी ई नेईं ना पढ़ो कि जपल दाऊद त तसे साथी ढुके थिए त तेन की किओ थिउ?

⁴ से परमेश्वरे गी गा, त से चढ़ो रौठि, जेस खाणे इजाजत सद पुजारे थी, तेन से खेई त अपु साथी कें धे बि दी।”

⁵ तोउं यीशु तेन्हि जे बोलु, “अउं, मनखे कुआ त भक्ति करणे रोजे मालिक भो।”

शुखो हथे बाड़ा मेह्‍णु ठीक करण

⁶ यक होरे भक्ति करणे रोज यीशु अराधनालय अन्तर घेई कइ शिचालुण लगा। तठि यक ईं मेह्‍णु थिआ जेसे देहणु हथ शुख गो थिउ।

⁷ तठि फरीसी त धर्मशास्त्री यीशु भाड़ बिशो थिए कि भक्ति करणे रोज यीशु अगर एस ठीक कता त से तेस पुठ दोष लाई सकते।

⁸ पर से तेन्के मने भियो जाणताथ त तेन शुखो हतेउ बाड़े मेह्‍णु जे बोलु, “बुच खड़ भो!” त से बुचो बुछ खड़ भोई गा।

⁹ त यीशु तेन्हि फरीसी त धर्मशास्त्री केईआं पुछु, “मोउं बताण दिए कि भक्ति करणे रोज की ठीक असु - भलाई करीण या बुराई करीण, केसे जीवन बचाण, ना मुकाण?”

¹⁰ तोउं तेन तेन्हि सोबी पुठ नजर घुमाई कइ तेस मेह्‍णु जे बोलु, “अपु हथ अगर कर।” त तेनि मेह्‍णु तिरुह किउ त तसे हतेउ ठीक भोई गोउ।

¹¹ इस पुठ से फरीसी त धर्मशास्त्री लेहरी कइ लाल भोई गे त अपफ बुछ मेझर करण लगे कि अब यीशु जोई की करुण।

यीशु अपु बाराह प्रतिनिधि चुणुण

¹² तेन्हि रोजी अन्तरा यक रोज यीशु फाट पुठ प्रार्थना करण जे गा त रात भइ से परमेश्वर जे प्रार्थना कते रेहा।

¹³ जपल दिस नुथु त तेन अपु चेले अपफ केईं भिआई कइ तेन्हि बुचा बाराह चेले चुणे, त से प्रतिनिधि बणाए;

¹⁴ होर से ईं असे: शमौन, जेसे नओं तेन पतरस बि रखु, त तसे भाई अन्द्रियास त याकूब, त यूहन्ना त फिलिप्पुस, त बरतुलमेई,

¹⁵ त मत्ती, त थोमा त हलफई कुआ याकूब, त शमौन, जेस जे जेलोतेस बि बोतेथ,

¹⁶ त याकूबे कुआ यहूदा त यहूदा इस्कारियती, जेन पता तस धोखा दिता।

यीशु मेह्‍णु शिचालण त सुसुरेरण

¹⁷ तोउं यीशु तठिआ तेन्हि जुए एई कइ यक खुली जगाई पुठ खड़ भुआ। तसे होरे चेली के बोडा हुसुड़ा तेन्हि जोई मीण जे तठि थिआ। होर पूरे यहूदिया राज्य, यरुशलेम शेहर, त समन्दर औत बसो सूर त सैदा राज्य केआं सुआ बोडा हुसुड़ा

¹⁸ तसे शुणुण जे त अपु अपु बीमारी केआं ठीक भुण जे तस केईं पुजो थिए। त जे दुष्ट आत्माई केआं परेशान थिए से बि ठीक भोई गे।

¹⁹ सोब तस छूण चहन्तेथ, किस कि तस केआं ठीक करणे शक्ति निसतीथ त सोब ठीक भोई घेन्तेथ।

अशुश वचन

²⁰ तपल यीशु अपु चेली हेर कइ बोलु, “धन्य असे तुस, जेन्के मन अन्तर परमेश्वरे जरूरत बिझिन्ती, किस कि परमेश्वरे राज्य तुं भो।”

²¹ “धन्य असे तुस, जे कि अभेईं ढुके टिशे असे, किस कि परमेश्वर तुसी रज्जाणता। धन्य असे तुस, जे कि अभेईं रोलुण लगो असे, किस कि परमेश्वर तुसी हसाणता।”

²² “धन्य भुन्ते तुस, जपल मेह्‍णु मनखे कोईये बझई जुए तुसी जोई बैर कते, त तुसी बखरे छते त तुं बेज्जती कते, होर तुं बुराई कर कइ तुं नओं बदनाम कते।

²³ तेस रोज खुश भोई कइ नचे, किस कि हेरे, तुसी स्वर्ग अन्तर अब्बल फल मेता। किस कि तेन्के बाव दादु बि भविष्य वक्ती जुए तिरुह कतेथ।”

शोक वचन

²⁴ फि यीशु बोलु “पर तुं खेया खाट भोई घेन्तु, जे अमीर असे, किस कि तुसी अपु सुख चैन मेई गो असा।”

²⁵ “तुं खेया खाट भोई घेन्तु, जे अभेईं रज्जो असे, किस कि तुस ढुके भुण असे।” “तुं खेया खाट भोई घेन्तु, जे अभेईं हसुंण लगो असे, किस कि तुसी रोलुण असु।”

²⁶ “तुं खेया खाट भोई घेन्तु, जपल सोब मेह्‍णु तुसी जे खरु बोते, किस कि तेन्के बाव दादु बि झूठे भविष्य वक्ते जे तिरुह बोतेथ।”

दुश्माण जोई परेम करण

²⁷ “पर अउं तुसी जे, जे ध्यान जुए में शुणते, बोता कि अपु दुश्माण जोई परेम करे। जे तुसी हेर नफरत कते, तेन्के भलु करे।

²⁸ जे तुसी शराप देन्ता तेन्हि जे तुस अशुश दिए। जे तुं बेज्जती कते, तेन्के लिए तुस दुआ करे।

²⁹ जे तुं यक अलोकड़ि पुठ चटाका देन्ता त होरी अलोकड़ि बि धरे; त जे तुं झिणे जब्बरदस्ती नेन्ता, तेस अपु फुलोणे टलिड़ नेण केआं बि ना रोके।

³⁰ जे कोउं तुसी केआं मगेल तसे धे दिए, होर जे कोउं तुसी केआं छुड़काल, तेस वापिस ना मगे।

³¹ जीं तुस चहन्ते कि मेह्‍णु तुसी जोई करे, तुस बि तेन्हि जोई तिहांणि करे।”

³² “अगर तुस सद अपफ जुए परेम अन्तर बिशणे बाड़ी जोई परेम जोई बिशियेल त तुं कीं इज्जत भोल? किस कि पापी मेह्‍णु बि त अपु परेम करणे बाड़ी जुएई परेम जुए बिश्ते।

³³ अगर तुस सद अपु भलाई करणे बाड़ी जुएई भलाई कते त कोई बोडी बोक नेईं, किस कि पापी मेह्‍णु बि इरुह कते।

³⁴ अगर तुस सद तेन्के धे उधार देन्ते, जेन्हि केईआं वापिस मेणे उम्मीद असी त तुं की इज्जत भोल? किस कि पापी मेह्‍णु बि पापी कें धे ई उम्मीद अन्तर उधार देन्ता कि तेन्हि ततुरु वापिस मेईंयेल।

³⁵ पर तुस अपु दुश्माण जोई परेम करे। होरी के भलाई करे त दुबारी ना मेणे उम्मीद रख कइ उधार दिए। तोउं, तुं लिए बोडा फल भुन्ता त तुस सर्व शक्तिमान परमेश्वरे गभुर बोलिन्ते, किस कि से बुरे त गुणे लिहाज न रखणे बाड़ी पुठ बि दाह कता।

³⁶ जिरुह तुं स्वर्गे बोउ दाहपोरा असा, तिरुह तुस बि दाहपोरे बणे।”

दोष ना लाण

³⁷ “केसेरी पंची ना करे त तुं बि पंची ना भुन्ति। केसे पुठ दोष ना ला ताकि तुसी पुठ बि कोई दोष ना लगाल। माफ करे त तुस बि माफ करिन्‍ते।

³⁸ देण दिए त तुन्धे बि दीइन्तु। परमेश्वर तुन्धे तेस मेह्‍णु ईं देन्ता, जे राउन बइ सुसुर नाप नुपि, हउ दबाई कइ, त भरी कइ देन्ता। किस कि जेन नापे बइ तुस होरी जे नापते, तसे नापे बइ मेह्‍णु तुसी जे नापते।”

³⁹ फि तेन तेन्हि जे यक होरी बोक लाई, “कि यक अन्हा होरे अन्हे बथ हराली सकता ना? कि से दुहिए खोपर अन्तर ना घेन्ते ना?

⁴⁰ चेला अपु गुरु केआं बोडा नेईं। पर जेन केनि अपु गुरु केआं सुसुर शिचो असु, से अपु गुरु बराबर भुन्ता।

⁴¹ तु किस अपु भाई टीरी अन्तर टख हेरते? तोउ अपु टीरी अन्तरी डड न केता ना?

⁴² जपल तोउ अपु टीरे डड ना केता त तु अपु भाई जे कीं बोता कि, ‘मोउं तें टीरे टख किढ़ण दिए?’ ओई कपटिया! पेहले अपु टीरे डड भीं किढ़। तोउं तोउ सुसुर केतु त तु अपु भाई टीरे टख किढ़ बटता।”

जीं बुटा तीं फल

⁴³ “कोई बि ईं अब्बल बुटा नेईं जे कि कुस्तुरा फल देन्ता, होर ना कोई कुस्तुरा बुटा असा जे कि अब्बल फल देन्ता।

⁴⁴ हर यक बुटा अपु फल जुए पिछाणीन्ता। किस कि मेह्‍णु कांटे बाड़े बुटी केआं अंजीर ना चुणते, होर ना किय्हामिलि केआं दछि किढ़ते।

⁴⁵ खरा मेह्‍णु अपु मन अन्तर जे खरु असु तस बेलि भली बोक बोता, त दुष्ट मेह्‍णु बि अपु दिले अन्तर जे बुरु असु तस बेलि बुरी बोक बोता। किस कि जे मन अन्तर भरिए असु, सेईंए मुंह बइ निस्तु।”

गी बणाणे बाड़े दुई मेह्‍णु के कथा

⁴⁶ “तुस जे में बोक ना मानते, किस मोउं जे ‘ए प्रभु, ए प्रभु’ कते?

⁴⁷ जे कोउं मोउं केईं एन्ता, त में बोक शुण कइ तस मानता, से कीं भुन्ता अउं तुसी जे बोता।

⁴⁸ से तेस मेह्‍णु ईं भुन्ता जे गी बणाणे टेम सुसुर खाई खन कइ फाट पुठ अपु गीहे खाई भरो असी। त जिखेईं बदेए फटते त हड़ एन्तु, से गी सुसुर रेहन्तु, किस कि तसे खाई सुसुर भरो असी।

⁴⁹ पर जे शुण कइ ना मानता, से तस मेह्‍णु ईं असा जेन रेत पुठ बिना खाई खनणे गी बणो असु। जपल बदेए फटता त तेन बइ हड़ एन्तु त से गी सोब उजीड़ कइ खतम भोई घेन्तु।”