लूका 5 - Walangiपेहले चेले भिआण मत्ती 4:18-22 ; मरकुस 1:16-20 1 यक रोज, यीशु गन्नेसरत तथे औत पुठ परमेश्वरे वचन शिचालण लगो थिआ, त तस शुणुण जे सुआ हुसुड़ा तसे बियेर बइ कठा भोई गे। 2 तेन हेरु कि दुई नाव तथे औत खड़ खड़ असे त मछवारे तेनि पुठा भीं एई कइ अपु जाल धूण लगो असे। 3 त तेन तेन्हि नाव बुचा यक जे शमौने थी, तस पुठ चढ़ गा त तेस जे नाव औत केआं थोड़ा दूर नेण जे बोलु। त तेन नाव पुठ बिश कइ तेन्हि मेह्णु जे शिक्षा दिती। 4 जपल से बोक कइ बिठा त शमौन जे नाव तथे डुघो पाणि बुच नेण जे त अपु जाल फटाण जे बोलु ताकि मछली टाइ बटियेल! 5 शमौने तस जे बोलु, “गुरुजी, असी पूरी रात मेहनत की तोउं बि कुछ ना टाइ बटु। फि बि अउं तुं बोलुण पुठ जाल छता।” 6 जपल तेन्हि जाल छड़े त सुआ मछली जाल अन्तर फसी, त तेन्के जाल टुटुण लगा। 7 ई हेर कइ तेन्हि अपु साथी जे, जे कि होर नाव पुठ थिए तेन्हि जे हथे बइ भाश की “एई कइ हें मदत करे”। त तेन्हि एई कइ दुई नाव ईं भरी कि से डूबणे भोई गई। 8 ई हेर कइ शमौन पतरस यीशु खुरी पुठ बिठा त बोलु, “ए प्रभु, अउं यक पापी भो। में भेएड़ केआं ओ गा।” 9 तेन ईं तोउं त बोलु, किस कि एती मछली टाणे बेलिए से त तसे साथी हैरान भोई गो थिए। 10 त इरुह ईं जबदी कुआ याकूब त यूहन्ना, जे शमौन पतरसे साथी थिए हैरान भोई गे। तपल यीशु शमौन जे बोलु, “ना डर, अब तु परमेश्वर जे मेह्णु कठा कता।” 11 त जपल तेन्हि नाव औत पुठ अण्हती त सोब कुछ छड़ दी कइ यीशु पता पता गे। यीशु यक कोढ़ी ठीक करण मत्ती 8:1-4 ; मरकुस 1:40-45 12 यक फेरि जपल यीशु केसे यक ग्रां अन्तर थिआ, तठि यक कोढ़ी मेह्णु आ। यीशु हेर कइ से उटेऊ झड़ा त छनेअरे कते बोलु, “ए प्रभु, अगर तु चहाल त मोउं शुचा कइ सकता।” 13 त यीशु अपु हथे बइ से छुआ त बोलु, “अउं बि ई चहन्ता कि तु शुचा भो” त तिखेईंए तसे कोढ़ मुक गा। 14 तोउं, तेन तस जे निआंग दी कइ बोलु, “एसे बारे केसे जे बि ना बोलुण, पर घेई कइ अपु अपफ पुजारी हराल त शुचा भुण जे, जे भकत चढ़ाण जे मूसा बोलो असु तीं सोब कर, ताकि तस हेर कइ मेह्णु पता लगियाल कि तु शुचा भोई गो असा।” 15 यीशु ठाकणे बावजूद बि तसे ताकती बारे चर्चा पेहले केईआं बि ज्यादी फैलती गई। त मेह्णु के सुआ हुसुड़ा तसे बोक शुणुण जे त अपु अपु बीमारी ठीक कराण जे तस केईं एण लगे। 16 पर से हुसुड़ा छड़ दी कइ, अकेला अरुणि धार अन्तर घेन्ताथ त प्रार्थना कता रेहन्ताथ। अदरंग मेह्णु ठीक करण मत्ती 9:2-8 ; मरकुस 2:1-12 17 यक रोज भु ईं कि यीशु परमेश्वरे वचन शिचालण लगो थिआ त तेस जुए बीमारी ठीक करणे परमेश्वरे शक्ति बि थी। होर गलील त यहूदिया राज्ये सुआ ग्राईं केआं त यरुशलेम शेहर केआं अओ फरीसी त धर्मशास्त्री बि तठि थिए। 18 तपल केहि मेह्णु डानी पुठ कर कइ यक मेह्णु अण्हतो थिए, जेस कि अदरंग थिआ। से तेस अन्तर जे घिन कइ यीशु सम्हाणि रखणे कोशिश अन्तर थिए। 19 पर मेह्णु के हुसुड़े बझई जुओई जपल से यीशु भेएड़ ना पूज बटे त लहाड़ चढ़ कइ लहाड़ पुटे। तोउं तेन्हि से बीमार मेह्णु डानी समेत यीशु साम्हाणि रखा। 20 यीशु तेन्के विश्वास हेर कइ तेस जे बोलु, “दोस्ता! तें पाप माफ भोई गे।” 21 तपल धर्मशास्त्री त फरीसी अपफ बुच बोकी लगे “ए कोउं भो, जे परमेश्वरे बेज्जती करण लगो असा? परमेश्वर छड़ दी कइ कि कोउं पापे माफी दी सकता ना?” 22 यीशु तेन्के मने बोक समझ कइ तेन्हि जे बोलु, “तुस इसे बारे अपु मन अन्तर ईं किस सोचुण लगो असे? 23 करणे सुख्तु की असु, बोले: पाप माफ करणे, या ईं बोलुण कि ‘खड़ भो त हंटिण दे’? 24 पर अउं तुसी ई हरालता कि मोउं, मनखे कुआ धरती पुठ पाप माफ करणे हक असा”। त तेन तेस अदरंग मेह्णु जे बोलु, “अउं तोउ जे बोता, खड़ भो त अपु डानी घिन कइ अपु गी जे गा।” 25 से तपले तेन्के साम्हाणि खड़िया त जेस पुठ से अण्हतो थिआ तस टाइ कइ त परमेश्वरे गुणगान कते-कुते अपु गी जे गा। 26 ईं हेर कइ सोब हैरान भोई गे त परमेश्वरे गुणगान करण लगे। से सुआ डर कइ ईं बोलुण लगे कि “आज असी यक अनोखी बोक हेरी!” यीशु लेवी भिआण मत्ती 9:9-13 ; मरकुस 2:13-17 27 तढ़ेया पता शेहर केआं घेन्त पेंत यीशु लेवी नओएं यक मामला नेणे बाड़ा अपु दफतर बिशो का त तस जे बोलु, “में पता आई!” 28 तिखेईंए से सोब कुछ छड़ दी कइ तस जुए घेई गा। 29 त लेवी तस अपु गी यक बोडी धाम दिती। त मामला नेणे बाड़े त होरे सुआ मेह्णु बि यीशु जुए धाम खाण बिशो थिए। 30 ईं हेर कइ फरीसी त धर्मशास्त्री यीशु चेली जे चरचर कर कइ बोलु, “तुस किस मामला नेणे बाड़े त पापी मेह्णु जुएई बिश कइ खाण पीण लगो असे?” 31 यीशु तेन्हि जे बोलु, “वैद खरे त चंगे मेह्णु जे नेईं, बल्कि जे बीमार असे, तेन्हि जे असे। 32 अउं जे अपु अपफ धर्मी समझते तेन्हि ना, बल्कि पापी मेह्णु मन बदलीणे बारे बोलुण जे अओ असा।” ब्रत बारे सवाल मत्ती 9:14-17 ; मरकुस 2:18-22 33 पता कुछ मेह्णु यीशु जे बोलु, “यूहन्ने त फरीसी के चेले त घड़ी घड़ी ब्रत कते, होर प्रार्थना बि कते, पर तुं चेले त बस खांते पीन्ते रेहन्ते।” 34 यीशु तेन्हि जे बोलु, “जपल तकर नोउआं लाड़ा म्हाराई जोई असा, तुस तेन्हि जे ई बोल सकते ना कि तुस ब्रत रखे? 35 पर से रोज बि एन्ता जिएस कि नोउआं लाड़ा तेन्हि केआं केहरी छते त तिएस से बि ब्रत कते।” 36 तोउं यीशु तेन्हि जे ई बोक लाई “कोई बि मेह्णु नोउए झिणे चीर कइ पुराणि झिणे पुठ टलि ना छता। ना त नोउए चीरी घेन्ते त पुराणे झिणि पुठ से टलि मेल बि ना खांती। 37 होर कोई बि मेह्णु नोउआं सरा पुराणे खलोठु अन्तर ना छता, ना त नोउआं सरा पुराणे खलोठु चीर कइ बाहर निस घेन्ता त खलोठु बि खराब भोई घेन्तु। 38 पर नउआं सरा नोउए खलोठु अन्तर रखो लौता। 39 कोई बि मेह्णु पुराणा सरा पी कइ नोउआं ना मगता, किस कि से बोता ‘पुराणा अब्बल असा।’” |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.