लूका 4 - Walangi

शैतान यीशु परीक्षा नेण

¹ यीशु यरदन दरेउ केआं शुची आत्माई जुए भरी कइ वापिस एई गा। त से शुची आत्माई बेलि अरुणि धार जे नी गा।

² तठि चढ़ी रोज तकर शैतान तस लचेरता रेहा। तेन्हि रोजी यीशु कुछ नेओथ खओ। त जपल से रोज पूरे भुए त तस ढुक लगी।

³ त शैताने तस जे बोलु, “अगर तु परमेश्वरे कुआ भो त इस घोड़ जे बोल कि रौठि बण!”

⁴ यीशु तस जे बोलु, “धरमे कताब अन्तर लिखो असु: ‘मेह्‍णु सद रौठि बइ ना जीन्ता।’”

⁵ त शैतान से खड़िया नीआ त यक म्नट अन्तर पूरे मतोके राज्य हराले।

^6-7 होर तेन तस जे बोलु, “अगर तु उटेऊ में खुर बिन कइ में पूजा कराल, त एन्हि सोब राज्ये हक त शान अउं तेन्धे देन्ता। किस कि ए सोब मेन्धे दुतो असे त अउं जेस चहूं तसे धे दी सकता।”

⁸ यीशु तस जे बोलु, “धरमे कताब अन्तर लिखो असु कि ‘तु सद प्रभु अपु परमेश्वरे सेवा कर त हमेशा तसेरी पूजा कर।’”

⁹ तोउं शैतान से नी कइ यरुशलेम देहरे पुठे कुणे पुठ खड़ियेर छड़ा। त तेस जे बोलु, “अगर तु परमेश्वरे कुआ भो, त अपफ इठिआ उणिहां टऊ दी छड़;

¹⁰ किस कि धरमे कताब अन्तर लिखो असु: ‘से तोउ केईं जे अपु स्वर्गेदूत लंघान्ता कि तें रक्षा करे,

¹¹ त से तोउ अपु कल्हाई कइ छते ताकि घोड़े बइ तें खुर ना लगियेल।’”

¹² त यीशु तेस जे बोलु, “ई बि त लिखो असु ना कि ‘तु अपु प्रभु परमेश्वर न परख।’”

¹³ जपल शैताने यीशु सम्हाई परीक्षा नी त सही टेमे एणे तकर से तसे भेएड़ केआं नश गा।

यीशु सेवाई कम शुरु करण त चेला बणाण ( 4:14—6:49 ) यीशु अपु सेवाई कम शुरु करण

¹⁴ तोउं यीशु शुची आत्माई ताकत जुए भरी कइ गलील राज्य जे वापस एई गा त तसे बोके अपु नीड़े भेएड़े इलाके अन्तर पुजी।

¹⁵ से तेन्के अराधनालय अन्तर घेई कइ शिचालताथ त सोब तस जे खरु बोतेथ।

यीशु पुठ नासरत ग्रां मेह्‍णु विश्वास ना करण

¹⁶ पता यीशु नासरत ग्रां जे आ, जेठि से जीओ धरो थिआ, त अपु रिवाज हेसाब जोई, भक्ति करणे रोज अराधनालय जे गा। तठि तेन्के बोलुण पुठ धरमे कताब पढ़ूं जे खड़ भुआ।

¹⁷ तसे धे यशायाह भविष्य वक्ते कताब दिती। त तेनि तस खोल कइ ईं पढ़ु जेठि लिखो असु:

¹⁸ “प्रभु परमेश्वरे आत्मा में अन्तर असी। किस कि तेन अउं गरीब मेह्‍णु खुश खबरी शुणाण जे नियुक्त किओ असा। त अउं इस लिए लंघो असा कि जे कोउं शंकीड़ी बेलिए बन्हिए असे, तेन्हि खोलणे, त जे अन्हे असे तेन्हि सारेरणे खुश खबरी प्रचार करुं त जे मेह्‍णु के भुंजो असे तेन्हि सुख दिउं,

¹⁹ त परमेश्वर मेह्‍णु बचाणे घड़ी बारे प्रचार करुं।”

²⁰ तोउं तेनि धरमे कताब बन्न कर कइ, जे सेवक थिआ तसे धे दिती त भीं बिशा। त जे मेह्‍णु अराधनालय अन्तर थिए से सोब तसे धे हेरण लगो थिए।

²¹ त तेन तेन्हि जे बोलु, “आज जे बि मेईं तुसी जे पढ़ु, से तुं सामणे सच्चु भु।”

²² सम्हाई मेह्‍णु तस जे खरु बोलु त तेन जे बोक बोलो थी से शुण कइ से सोब हैरान भुए त बोलु लगे, “ए कि यूसुफे कुआ ना भो ना?”

²³ त यीशु तेन्हि जे बोलु, “तुस जरूर मोउं पुठ ए ऊजवाण बोते कि ‘ए वैदा, पेहले अपफ ठीक भो! जे सोब चमत्कार कफरनहुम शेहर अन्तर करण असी शुणो असे, तेन्हि इठि अपु ग्रां अन्तर बि कर।’”

²⁴ त तेन हउ बि बोलु, “केसे बि भविष्य वक्ते अपु देश अन्तर इज्जत ना मेती।

²⁵ पर सच्चाई त अउं तुसी जे बतान्ता कि एलिय्याह भविष्य वक्ते टेम, जपल सढ़े टाई साल तकर मेघे ना लगी, त पूरे देश अन्तर अकाल थिआ। तेन्हि रोजी इस्राएल अन्तर सुआ विधवा थी।

²⁶ पर एलिय्याह भविष्य वक्ता तेन्हि बुच केसेरी गी ना लंघा। सद सैदा राज्ये सारफत ग्रांए विधवा केईं लंघा।

²⁷ त एलीशे भविष्य वक्ते टेम बि इस्राएल अन्तर सुआ कोढ़ी थिए, पर सीरियाई मेह्‍णु नामान छड़ कइ होर कोई शुचा नेओथ किओ।”

²⁸ इ बोक शुण कइ तेस अराधनालय अन्तर जतु मेह्‍णु थिए सोब लेहरी कइ लाल भोई गे,

²⁹ त तेन्हि सोबी खड़ भुई कइ से फाटे जिन्‍घाल जे नीआ, जेस फाट पुठ तेन्के ग्रां बसो थिउ, ताकि तस तठिआ बुन्ह फटाल।

³⁰ पर से तेन्हि केआं छुड़क कइ तठिआ नश गा।

यीशु दुष्ट आत्माई भुंजो यक मेह्‍णु ठीक करण

³¹ तोउं से गलील राज्ये, कफरनहुम शेहर गा त हर भक्ति करणे रोज मेह्‍णु शिचालताथ।

³² से सम्हाई तसे शिक्षा शुण कइ हैरान भोई घेन्तेथ, किस कि से पूरे हक जुए शिक्षा देन्ताथ।

³³ यक लिंगि, तेस अराधनालय अन्तर दुष्ट आत्माई बेलि भुंजो यक मेह्‍णु थिआ। तेन जोरी जुए बोलु,

³⁴ “ए नासरत ग्रांए यीशु, तु असी बुच किस अओ असा? कि तु असी खतम करण जे अओ असा ना? अस सोब तोउ जाणता कि तु कोउं भो। तु परमेश्वरे शुचा मेह्‍णु भो।”

³⁵ यीशु तस दुष्ट आत्मा डराई कइ बोलु, “चुप बिश त एसे अन्तरा नश गा!” तपल दुष्ट आत्माई से बुच फटा, त बगैर कोई कष्ट दी कइ तसे अन्तरा नश गई।

³⁶ ईं हेर कइ सोब हैरान भोई गे त से अपफ बुच बोलुण लगे, “ई की बोक असी? किस कि से ताकत त शक्ति जुए दुष्ट आत्मा जे निआंग देन्ता त से नश घेन्ति।”

³⁷ ई भोई कइ चोहरो कना तसे बारे बोक भुण लगी।

शमौन पतरसे शशु ठीक करीण

³⁸ पता यीशु अराधनालय केआं खड़ भोई कइ शमौने गी गा। शमौने शशु सुआ सेक चढ़ो थिआ त तेन्हि तस ठीक करण जे यीशु जे हथ जोड़े।

³⁹ त यीशु तसे भेएड़ खड़ भोई सेक डरा त सेक झट मुक गा। त से तिखेईं खड़ भोई कइ तेन्के सेवा पाणि करण लगी।

⁴⁰ त दिस ओलुणे टेम जेसे जेसे गी बीमार मेह्‍णु थिए, से यीशु भेएड़ अण्हे त तेन तेन्हि सोबी पुठ हतेउ रख कइ से सुसुरेरि छड़े।

⁴¹ होर त होर, यीशु सुआ जेईं केआं दुष्ट आत्मा नशाणि। से लियार दी दी त ईं बोते बोते कि “तु परमेश्वरे कुआ भो” सुआ मेह्‍णु अन्तरा नश गई। पर से तेन्हि डरान्ताथ त बोलुण ना देन्ताथ, किस कि तेन्हि तसे बारे पता थिआ कि से मसीह भो।

⁴² त पथवारी ईं यीशु खड़ भोई कइ यक रुण घेई गा। सुआ मेह्‍णु तस तोपते तोपते तस केईं पुजे त तस रोकुण लगे कि असी छड़ दी कइ ना गा।

⁴³ पर तेन तेन्हि जे बोलु, “मोउं होर ग्रां बि घेई कइ परमेश्वरे राज्य एणे बारे खुश खबरी शुणाण असी, किस कि तोउं त परमेश्वरे अउं लंघो असा।”

⁴⁴ त से तठिआ घेई कइ पूरे यहूदिया राज्ये अराधनालय अन्तर शिचालते रिहा।