लूका 24 - Walangi

यीशु दुबारी जीण त स्वर्ग जे घेण ( 24:1-53 ) यीशु दुबारी जीण

¹ पर, हफ्ते पेहलकण रोज मतलब ऐतवारे रोज पथवारी से जिल्हाणु अब्बल मुश्कदार चीजे त तेल घिन कइ तसे कब्र केईं एई।

² त तेन्हि से कब्री दुआ केआं बोडा पठ घराओ मेआ।

³ कुड अन्तर घेई कइ प्रभु यीशु लाश ना मेई।

⁴ त जपल से हैरान भोई कइ सोचुण लगी त हेरु कि दुई मेह्‍णु चिल-चिलान्ते झिणे डबो तेन्के भेएड़ खड़िए।

⁵ त तपल से सुआ डर गई त इज्जत जुए अपु मुंह उणिहां कइ बिशि त तेन्हि दुई मेह्‍णु तेन्हि जिल्हाणु जे बोलु, “तुस जीन्ते मेह्‍णु मरो तेन्हि अन्तर किस तोपुण लगो असी?

⁶ से एथ नेईं बल्कि मरो तेन्हि केआं जी गो असा। जपल तुस गलील राज्य अन्तर थिए त तेन की बोलो थिउ, तस याद करे। तेन बोलो थिउ,

⁷ ‘ई जरूरी असु कि मनखे कुआ पापी मेह्‍णु के हतेउ अन्तर टोवेईयेल, क्रूस पुठ मरियेल त टेके रोज अन्तर दुबारी जीन्ता भोई घियेल।’”

⁸ तोउं तेन्हि तसे बोके याद एई।

⁹ से कब्र केआं वापस शेहर एई कइ तेन्हि ग्याराह चेली जे त जे होरे थिए तेन्हि सोबी जे ए बोके शुणाई।

¹⁰ जेन्हि ई बोके प्रतिनिधि जे बोली से मगदला ग्रांए मरियम, त योअन्ना, त याकूबे ई मरियम त तस जुए होरी जिल्हाणु बि थी।

¹¹ पर तेन्के बोके तेन्हि ग्यारोही जेईं गभुर के कथा ईं लगी। त तेन्हि तेन्के विश्वास ना किआ।

¹² पर, तोउं पतरस खड़ भोई कइ कुड केईं जे दौड़ा त उनकुशी कइ चादुर काए जे यीशु लाश जोई लपेटो थिए। तोउं, जे भुओ थिउ तस बारे सोच सोच कइ से शेहर जे वापिस घेई गा।

इम्माउसे बथ पुठ चेली जुए यीशु

¹³ तेस रोज जे चेले तथ किठे थिए तेन्हि चेली बुचा दुई चेले इम्माउस नओएं यक ग्रां जे घेण लगो थिए। ए ग्रां यरुशलेम शेहर केआं ग्याराह किलोमिटर दूर थिउ।

¹⁴ से प्रभु यीशु बारे जे सोब घटना भुओ थी तेन्हि पुठ बोक कते-कुते घेण लगो थिए।

¹⁵ त जपल से अपफ बुच बोक विचार करुण लगो थिए त यीशु भेएड़ एई कइ तेन्हि जुए साते हंटण लगा।

¹⁶ पर, परमेश्वरे तेन्के टीर ईं बंद कइ छो थिए कि तेन्हि से पिछाण ना बटा।

¹⁷ तेन तेन्हि केआं पुछु, “तुस अपफ बुच कि बोक कते-कुते हंटो असे?” त से उदास भोई कइ खड़ खड़ रेही गे।

¹⁸ तोउं, तेन्हि बुच क्लियोपास नओएं चेले तेस जे बोलु, “यरुशलेम शेहर अन्तर कि तुईएं यक जातुर असा ना, जेसे कुछ पता नेईं कि एचेल तथ की की भुण लगो असु?”

¹⁹ तेन तेन्हि केआं पुछु, “की भुओ असु, कि गल असी?” त तेन्हि तेस जे बोलु, “नासरत ग्रांए यीशु बारे! जे परमेश्वरे त सोब मेह्‍णु के नजर अन्तर यक ताकतवर भविष्य वक्ता थिआ। तेन सुआ बोडे बोडे कम किए त पूरे हक जुए शिचाले।

²⁰ पर, मुख्य पुजारे त हें खास खास नेते से टोवा त क्रूस पुठ मरवाई छड़ा।

²¹ अब कीं करुं, हें त उम्मीद थी कि शयद ए से भो जेसे बारे नियम त भविष्य वक्ते बोलो असे कि से इस्राएल बचान्ता। एसे बगैर बोक इ असी की तेस मरो आज टेका रोज अओ असा।

²² त हें कुछ जिल्हाणु भ्यागे कब्र धे गो थी दे तेन्हि अस परेशान कइ छड़े।

²³ जिखेईं तथ तेसे लाश न मेई त से बोती कि तेन्हि स्वर्गेदूती काए त तेन्हि स्वर्गेदूती बोलु ‘यीशु जीन्ता असा।’

²⁴ पता हें साथी बुचा केहि जेईं घेई कइ कब्र अन्तर हेरु त तेन बि तिहांणि केउ जीं जिल्हाणु बोलो थी। पर तसे लाश कब्र अन्तर ना थी।”

²⁵ त यीशु तेन्हि जे बोलु, “ए मुर्खो, त भविष्य वक्ताई जे सोब बोलो असे तेस पुठ यकीन ना करणे बाड़िओ!

²⁶ कि ए जरूरी नेओथ ना कि मसीह कष्ट सेहे, तोउं, इज्जत त कदर मेईंयेल?”

²⁷ त से मूसे केआं शुरु कर कइ सोब भविष्य वक्ते त पूरी धरमे कताब अन्तर तसे बारे जीं जीं बि लिखो असु से समझाई छोउ।

²⁸ तोउं से तेस ग्रांए भेएड़ पुजे जेठि तेन्हि घेण थी। त तेसे ढंग केआं ईं लगतुथ कि तस अगर घेण असु।

²⁹ पर, तेन्हि तस जे ई बोल कइ रोक छड़ा कि अन्हारु भुण लगो असु, दिस बि ओली गो असु, त असी जुए साते इठि बिश। त से तेन्हि जुए बिशुण जे अन्तर घेई गा।

³⁰ जपल से तेन्हि जुए रौठि खाण जे बिशा त तेन रौठि नी कइ परमेश्वरे धन्यवाद किउ त टुकड़ेर कइ तेन्के धे देण लगा।

³¹ तपल परमेश्वर तेन्के टीर खोले त तेन्हि से पिछाण छड़ा। पर यीशु तपले छपत भोई गा।

³² त तेन्हि अपफ बुच बोलु, “जपल तेन बत असी जुए बोके की त धरमे कताबे मतलब असी समझाई त कि हें मन अन्तर खुशी ना भुई ना?”

³³ त से तिखेईंए खड़ी कइ यरुशलेम जे नश गे त ग्याराह चेले तेन्हि साते मेईंए।

³⁴ से होरे चेले बोतेथ कि “प्रभु सच्चे ईं जी गो असा त शमौन पतरस दर्शण दुतो असा।”

³⁵ त तेन्हि दुई बि बते बोक चेली बताई छइ त तेन्हि रौठि टुकड़ेरणे वकत कीं पिछाणा।

यीशु अपु चेली दर्शण देण

³⁶ से होता एन्हि बोके बोलुणे लगो थिए कि यीशु अपफ तेन्के बुच एई कइ खड़ी गा त तेन बोलु, “परमेश्वर तुसी शान्ति दिए।”

³⁷ पर, से सोब चेले डर कइ बटी गे। तेन्हि सोचु कि शयद तेन्हि कोई भूत काओ असा।

³⁸ त तेन तेन्हि जे बोलु, “किस डरुण लगो असे? तुं मन अन्तर अभेईं बि में बारे किस सवाल खड़िन्‍ते?

³⁹ में हतेउ त में खुरी कें धे हेरे त विश्वास करे कि अउं यीशु भो। मोउं छूण दिए, किस कि आत्मा अन्तर हड मास ना भुन्ते।”

⁴⁰ ईं बोल कइ तेन तेन्हि अपु हथ खुर हराले।

⁴¹ जिखेईं खुशी बेलि तेन्हि कुछ समझ ना आउ त से हैरान भोई गे। त यीशु तेन्हि केआं पुछु, “इठि तुसी केईं रौठि असी ना?”

⁴² तेन्हि तसे धे पघारो मछली टुकुड़ दुतु।

⁴³ तेन टाइ कइ तेन्के साम्हणे खउ।

⁴⁴ तोउं, तेन तेन्हि जे बोलु, “ई में से बोके भीन्‍थ, जे मेईं तुसी जोई बिश कइ बोलो थी कि जरूर असु कि जती बोके मूसे नियम अन्तर त भविष्य वक्ती के त छुआंरी के कताबी अन्तर में बारे लिखो असी, से पूरी भुन्ति।”

⁴⁵ तोउं तेन धरमे कताब समझणे जे तेन्के सोबी कें धे बुद्धि दिती।

⁴⁶ त तेन्हि जे बोलु, “इ लिखो असु कि मसीह कष्ट सेहन्ता, त टाई रोज अन्तर मरो तेन्हि अन्तरा दुबारी जी घेन्ता।

⁴⁷ होर यरुशलेम केईआं धरती सोबी जाति के मन बदलण त पापी जे माफ करणे प्रचार तसेरी नओएं बेलि करिन्ता।

⁴⁸ तुस एन्हि सोबी बोकी के उगाह असे।

⁴⁹ त हेरे, जे जुबान में बोउए मेन्धे दुतो असी अउं तेस तुन्धे देन्ता। त जपल तकर स्वर्ग केआं परमेश्वरे ताकत ना मेईंयेल तोउं तकर तुस इस शेहर अन्तर बिशे।”

यीशु स्वर्ग अन्तर घेण

⁵⁰ तोउं कुछ रोज पता से तेन्हि बैतनिया ग्रां सोंख यरुशलेम केआं बाहर घिन गा त अपु हतेउ खड़ कइ कइ तेन्हि अशुश दिती।

⁵¹ तेन्हि अशुश देन्ते देन्ते से तेन्के टीरी के उलाठ घेई गा त परमेश्वरे से स्वर्ग जे नेण ला।

⁵² तपल से बोडी खुशी जुए यीशु महिमा कते-कुते यरुशलेम पैठे गे।

⁵³ त से दन रात देहेर अन्तर परमेश्वरे गुणगान कते रिहे।