लूका 21 - Walangi

गरीब विधवाई दान

¹ तोउं यीशु हेरु कि अमीर मेह्‍णु अपु अपु दान दानपात्र अन्तर छाण लगो असे।

² तोउं तेन यक गरीब विधवा बि तेस अन्तर दुई टामे मेलकी छान्‍ति काई।

³ त तेन बोलु, “अउं तुसी जे बोता कि देहरे दानपात्र अन्तर छाणे बाड़ी बुच इन विधवाई सोबी केआं ज्यादु छउ।

⁴ किस कि सोबी अपु अपु सुआ धन अन्तरा दान दुतो असा, पर एन अपु गरीबी अन्तरा बि अपु पूरी कमाई दान अन्तर दी छइ।”

देहेर उजुड़णे भविष्य वाणि

⁵ फि जिखेईं कुछ मेह्‍णु देहेर बारे बोलु लगो थिए कि से कीं बधिआ बधिआ घोड़ी बइ त मेह्‍णु दुतो अब्बल अब्बल कीमति चीजी बइ बणो असा। त यीशु बोलु,

⁶ “से रोज बि एन्ते, जेस अन्तर ए जे सोब तुस हेरण लगो असे ए सोब उपीड़ घेन्तु त एठि घोड़ पुठ घोड़ बि ना रेहन्ते।”

बुखता एण बारे निशाण

⁷ त तेन्हि यीशु केआं पुछु, “ए गुरु, ए सोब कपल भुन्तु त ए सोब बोक पूरी भुणे निशाण की की भुन्ते?”

⁸ तेन बोलु, “खबरदार बिशे कि तुसी कोई ना ठगयाल। किस कि में नओं नी कइ सुआ जेईं एन्ते त बोते, ‘अउं सेईंए भो’ त ईं बि बोते कि, ‘से टेम एई गो असा’। तुस तेन्के बोक ना माने।

⁹ जिखेईं तुस लड़ाई त बगावती बारे शुणते त न डरुं, किस कि एन्के पेहले भुण जरूरी असु; पर से टेम झट ना मुकता।”

¹⁰ यीशु तेन्हि जे हउ बि बोलु, “जाति जाति बुच त राज्य राज्य बुच लड़ाई भुन्ति।

¹¹ बोडे बोडे भुंजल एन्ते। जगाई जगाई अकाल एन्ते त महामारी एन्ती। अम्बर पुठ भयंकर घटना भुन्ति त डरौणी डरौणी अवाजे शुणती।

¹² पर इन्हि सोब बोकी केआं पेहले से में नओं बझई जुए तुसी टान्ते, त भुंजान्ते, त टजे हवाले कइ छते। त अफसर त राजी के सम्हाणि पेश कर कइ तुसी पुठ दोष लान्ते, त से तुसी जेहेल अन्तर छते।

¹³ पर ए तुसी जे में बारे उगाह देणे मौका बणता।

¹⁴ तोउं त अपु अपु मन अन्तर सोच रखे, कि तुसी पेहला ईं केआं कुछ बोलुणे चिन्ता ना करीण।

¹⁵ किस की अउं तुं धे ईं बोक त बुद्धि देन्ता कि जेस कोई दुश्माण काट ना सकते होर ना केसेरी पुग बटते।

¹⁶ में चेला भुणे बझई जुए तुं अविश्वासी ई बोउ, भाई भेण, होरे रिश्तेदार त मितर बि तुसी भुंजान्ते त सपाही केआं टोवाई छते; बल्कि केसे केसे त मार बि छते।

¹⁷ में चेला भुणे बझई जुए सोबी जाति मेह्‍णु तुसी जोई बैर कते।

¹⁸ पर से तुं अमर जीवन जुए कुछ बि ना कइ बटते।

¹⁹ तुस ई सोब सेही कइ अपु जीवन बचान्ते।”

यरुशलेम शेहर उजुड़णे बारे भविष्य वाणि

²⁰ “जपल परदेशी सेना यरुशलेम शेहर बटेरती, त ईं समझे की इसे उजुड़णे टेम भोई गो असा।

²¹ तिखेईं जे यहूदिया राज्य अन्तर भोल से पहाड़ी इलाके जे नश घिए; त जे यरुशलेम शेहर अन्तर भोल से तठिआ बाहर घेई गे; होर जे बाहर कमाण लगो असे, से तेस अन्तर ना घिए।

²² किस कि ए बदला नेणे रोज असा जिखेईं परमेश्वर बदला नेन्ता। जे जे बि नियम अन्तर त भविष्य वक्ते लिखो असु से एन्हि रोज अन्तर पूरा भोई घेन्तु।

²³ तेन्हि रोजी अन्तर जे जिल्हाणु गभुरवाल असी, त जे गभुर दुध पिआन्ती, तस सुआ दुख भुन्ता, किस कि देश अन्तर सुआ कष्ट भुन्ता त सोबी मेह्‍णु पुठ परमेश्वरे लेहेर एन्ती।

²⁴ से तलवारी बइ मर घेन्ते त कुछ कैद भुई कइ सोब देशे मेह्‍णु बुच पूज घेन्ते। त जपल तकर गैर यहूदी राज करणे टेम खतम ना भुन्ता, तोउं तकर यहूदिया राज्य अन्तर गैर यहूदी राज कते।”

मनखे कोईये दुबारी एण

²⁵ “दिस, जोसुण त तारे पुठ डरौणे निशाण केते त धरती पुठ हर देशी मेह्‍णु समन्दरे अवाजे बेलि त बोडे बोडे छल्हारे बेलिए डरी कइ बुरे हाल भुन्ते।

²⁶ सुआ डरे बझई जुए त धरती पुठ एणे बाड़े कष्ट हेरते हेरते मेह्‍णु कांया अन्तर कांया ना रेहन्ती, किस कि अम्बरे सम्हाई शक्ति खतम भोई घेन्ति।

²⁷ तोउं से मनखे कुआ बोडी ताकत जुए त पूरे महिमा जुए बदेए पुठ एन्ता हेरते।

²⁸ जिखेईं ए सोब बोक भुण लगियेल त विश्वास पुठ सुसुर खड़ भुई कइ इ सोब कष्ट सेहण जे तेयार बिशे; किस कि तुं बचुण नीड़ु असु।”

अंजीरे बुटे कथा

²⁹ फि यीशु तेन्हि जे यक कथा लाई। “अंजीरे त होरे बुटी कें धे हेरिण दिए।

³⁰ जिखेईं तेन्हि पुठ डुन एन्ते त तुसी पता लगता कि बरशाड़ एई गा।

³¹ तिहांणि जिखेईं तुस ई सोब निशाण हेरियेल त बिझ घिए कि परमेश्वरे राज्य पूरी ताकत जुए एण बाड़ी भोई गो असी।

³² अउं तुसी जे बोता कि जपल तकर ई सोब पूरी न भोल, इस पीढ़ी अन्त न भुन्ता।

³³ अम्बर त धरती खतम भोई घेन्ति, पर में बोक कदी ना मुकती।”

खबरदार बिशे

³⁴ “तोउं त, खबरदार बिशे! ईं ना भोल कि तें मन मौज मस्ती, खाण पीण त जीवन होरी चिन्ताई जुओई सुस्त भोई घियेल। त से रोज तोउ पुठ अचानक एई घियेल।

³⁵ किस कि से रोज इस धरती सोबी मेह्‍णु पुठ इहांणि एन्ता।

³⁶ तोउं त खबरदार बिशे त हर वकत प्रार्थना कते रिहे कि तुस एणे बाड़ा कष्ट त दुख केआं बच सकियेल त मनखे कोईये अगर खड़ भुणे लेएक भोई सकियेल।”

³⁷ तेन्हि दिनि से दिसाई देहेर अन्तर शिचालताथ त राति बाहर घेई कइ जैतुन नओएं फाट पुठ घेई बिश्ताथ।

³⁸ त रोज पथवारी सोब मेह्‍णु तसे बोके शुणुण जे देहेर एन्तेथ।