लूका 14 - Walangiयीशु यक बीमार मेह्णु ठीक करण 1 तोउं इ भु कि भक्ति करणे रोज यीशु केसे मुखिया फरीसी गी रौठि खाण जे गा। त कुछ फरीसी मेहमान जे यीशु दुश्माण थिए, तेन्हि तेस पुठ नजर रखो थी। 2 तठि यक मेह्णु तसे सम्हाणि थिआ, जेस हत-खुर शुणणे बीमारी थी। 3 एस पुठ यीशु धर्मशास्त्री त फरीसी जे बोलु, “तुं नियम अन्तर भक्ति करणे रोज केसेरी खरु करुण ठीक भुन्तु कि ना भुन्तु?” 4 पर से चुपचाप बिशे। तिखेईं तेन से छुई कइ सुसुर किआ त लंघाई छड़ा। 5 होर तेन तेन्हि जे बोलु, “तुं बुच ईं कोउं असा ना अगर भक्ति करणे रोज तसे खेचरा या चूर खोपर अन्तर झाड़ी घेयाल त से तिएसे तस झठ बाहर ना किढ़ता?” 6 तेन्हि एस पुठ कोई जवाब ना दी बटा। सेवा पाणि त अपफ घटाणे बारे शिक्षा 7 जपल यीशु हेरु कि धामो मेह्णु कीं खरी खरी जगाह हेर हेर कइ बिश्ते त तेन तेन्हि जे यक बोक लाई कइ बोलु, 8 “जपल कोउं तुसी ब्याहे धाम करियेल त तुस खरी खरी जगाह हेर कइ ना बिश। ई ना भुओल कि तेन तुसी केईआं बि केसे मोटे जे धाम किओ भुओल। 9 त जेन तुसी दुहि जे धाम किओ असी, एई कइ तोउ जे बोलियाल, ‘इसे धे जगाह दे’ त तोउं तुसी लजेई कइ सोबी केआं कुस्तुरी जगाह पुठ बिशुण एईयेल। 10 पर जपल तुसी धाम भुओल त तुस सोबी केआं कुस्तुरी जगाई बिशे, ताकि जपल से जेन तुसी जे धाम किओ असी, एईयेल त तोउ जे बोलियेल ‘ए मितरा! अगर एई कइ बिश।’ तिखेईं तोउ जुए बिशुणे बाड़ी बुच तें इज्जत बधती। 11 किस कि जे कोउं बि अपफ बोडा बणान्ता से मठुड़ करिन्ता, त जे कोउं बि अपफ मठुड़ बणान्ता, से बोडा करिन्ता।” 12 तिखेईं तेन अपफ जे धाम करणे बाड़ा जे बि बोलु, “जिखेईं तु दिसाई या ब्यादि धाम दियेल त सद अपु मितरी, भाई, रिश्तेदार या अमीर भेयाड़ जे धाम ना कर। इ ना भुओल कि से बि तोउ धाम कर कइ तें हिसाब कइ छड़ियेल। 13 पर तु जपल धाम करियेल त गरीब, अन्हे, लटे त टटे जे धाम कर। 14 तोउं तु धन्य भुन्ता, किस कि तेन्हि केईं तोउ तबादला देण जे कुछ नेईं। पर जपल धर्मी दुबारी जीन्ते, तपल परमेश्वर तेन्धे तेसे तबादला देन्ता।” बोडी धामी कथा 15 यीशु जुए रौठि खाणे बाड़ी बुचा यक जेईं अपफ जे बोडा धर्मी समझताथ। ईं शुण कइ तेनि यीशु जे बोलु, “सुआ सुखी से धर्मी मेह्णु भुन्ता, जे परमेश्वरे राज्य जपल एन्ता, तठि बिश कइ रौठि खांता।” 16 त यीशु तस जे बोलु, “केन यक मेह्णु यक बोडी धाम दिती त सुआ मेह्णु भिए। 17 जिखेईं रौठि बणि गई त तेन अपु नौखरे केआं धाम किओ मेह्णु जे बोलाउ, ‘एईए, अब रौठि बणि गो असी।’ 18 पर से सोब जेईं बहाना बणुण लगे। पेहले मेह्णु तस जे बोलु, ‘मेईं यक जिम खरीदो असी, त जरूरी असु कि तेस हेरुं। छने! मोउं माफ कर।’ 19 त दोके मेह्णु बोलु, ‘होता, मेईं पंज जोड़ा चूर खरीदो असे, त तेन्हि परखुण जे घेण असु। तें छने, मोउं माफ कर।’ 20 टेके मेह्णु बोलु, ‘मेईं होता अभेईं ब्याह किओ असा, त अउं ना एई सकता।’” 21 “तेन नौखर एई कइ अपु मालिक जे सोब बोके शुणाई छइ। त तेन मालिके लेहरी कइ अपु नौखर जे बोलु, ‘झट शेहरे बाजार गा त जतु बि कंगाल, अन्हे, लटे, टटे असे सोब इए घिन आई।’ 22 तेन नौखरे दुबारी एई कइ बोलु, ‘ए मालिका, जीं तुसी बोलो थी, मेईं तिहांणि किउ। पर हउ बि जगाह बचो असी।’ 23 त मालिके नौखर जे बोलु, ‘सम्हाई बत त बग बघुईं गा त मेह्णु जब्बरदस्ती घिन आई ताकि में गी भरी घियेल। 24 किस कि अउं तोउ जे बोता कि धामो मेह्णु बुचा कोई बि में रौठि ना चखता।’” यीशु चेला बणणे मुल 25 जिखेईं बोडा हुसुड़ा यीशु जुए घेण लगो थिआ त तेन पतूं हेर कइ तेन्हि जे बोलु, 26 “कोई बि जे में चेला बणुण जे एईयेल त अपु ईया बोउ, धाणि, जुएली, गभुर, भाई भेण, आं, अपु जिन्दगी बि तेस अगर मोउं केआं सुआ ट्यारे भुओल त से में चेला ना बण सकता। 27 होर जे कोउं अपु क्रूस ढीड़ कइ मरुण तकर में पता न एईयाल, से में चेला ना बण सकता।” 28 तोउं तेन तेन्हि जे हउ बि बोलु कि “तुसी बुच ईं कोउं असा, जे यक गी बणाण चहन्ता त पेहले बिश कइ जोड़ा-जामा ना कता कि गी बणाण जे तस केईं रज्जि रुपेई असे कि नेईं? 29 ईं ना भुओल कि से खाई दी कइ गी पूरु बणाई ना बटियेल। त सम्हाई मेह्णु तस हेर कइ ईं बोते बोते मखोल बणाण लगियेल कि, 30 ‘ए मेह्णु गी त बणाण लग गो थिआ, पर पूरु ना बणाई बटु’। 31 कोई बि राजा होरे राजे जुए लड़ाई करण जे घेण केआं पेहले बिश कइ सोच विचार कता। त से हेरता कि जे बिह हजार सपाही घिन कइ में खिलाफ एन्ता, अउं कि दस हजार सपाही नी कइ तस हराई सकता ना? 32 ना त से तेस केआं दूर बिशोरे राजदूत लंघाई कइ तेस जुओई समझौता करण चहन्ता। 33 अउं ए सोब तोउं बोलुण लगो असा, ताकि तुसी बुचा जे बि में चेला बणुण चहन्ता तस पता लगियेल कि जोउं तकर से अपु सोब कुछ ना छड़ियाल, तोउं तकर से में चेला ना बण सकता।” बजन स्वादे लुण 34 “लुण त खरु असु, पर अगर लुणे स्वाद खतम भोई घेईयाल त केस चीजे बइ से दुबारी लुणकी बणतु? से केसे चीजी बेलि बि लुणकी ना भुन्तु। 35 ना त से जिमि, होर ना खादी कम एन्तु। तस त मेह्णु बाहर फटाई छते।” तोउं तेन जोर जुओई बोलु, “अगर तुस में बोक ध्यान जोई शुणियेल त तुस समझ घेन्ते।” |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.