यूहन्ना 8 - Walangi

पापी जिल्हाणु त यीशु

¹ पर यीशु जैतुने फाट पुठ गा।

² त पथवारी देहेर अन्तर आ, त सम्हाई मेह्‍णु तस केईं ए। से भीं बिश कइ तेन्हि शिक्षा देण लगा।

³ तपल धर्मशास्त्री त फरीसी यक जिल्हाणु अण्ही, जे तेन्हि होर मेह्‍णु जुए टातो थी। तस बीचो बुच खड़ कर कइ तेन्हि यीशु केआं पुछु

⁴ “ए गुरु! असी ए जिल्हाणु नाजायज रिश्ता रखते टातो असी।

⁵ मूसे नियम अन्तर त असी जे निआंग असी कि ईं जिल्हाणु घोड़िआई घोड़िआई मारीण। पर तु इस जिल्हाणु बारे की बोता?”

⁶ तेन्हि तस खरे चलाक जुए गलत बोलुण जे ई पुछु, ताकि तेस पुठ दोष लाई बटियेल। पर यीशु उनकुशी कइ भीं लिखुण लगा।

⁷ जपल से तस पुछुण लगे त तेन सुसुर भोई कइ तेन्हि जे बोलु, “तुं बुच जेन कदी पाप नेईं किओ, पेहले तस घोड़े देण दिए।”

⁸ तोउं दुबारी से उनकुशी कइ अपु अंगुलु बइ लिखुण लगा।

⁹ पर तसे ई बोक शुण कइ बुढे केआं गभुर तकर सम्हाई यक यक कइ तठिआ नश गे, त यीशु अकेला रेही गा। से जिल्हाणु बुच खड़ खड़ थी।

¹⁰ यीशु सुसुर भोई कइ तस जे बोलु, “जिल्हाणुआ! से सम्हाई को गे? तोउ पुठ कि केनि कोई दोष ना ला ना?”

¹¹ त तेन तस जे बोलु, “ए प्रभु, केनि ना।” त यीशु तस जे बोलु, “अउं बि कोई दोष ना लान्ता। गा त दुबारी कदी पाप ना कर!”]

यीशु, धरती टगड़ियार

¹² पता, यीशु दुबारी मेह्‍णु जे बोलुण लगा, “अउं धरती टगड़ियार भो; जे में पतोती एन्ता, से कदी अन्हारे अन्तर ना हंटता। पर से टगड़ियार तस जीवने बथ हरालती।”

¹³ त फरीसी तस जे बोलु, “तु अपफ अपु उगाही देन्ता; त तें उगाही कोई ना मानता।”

¹⁴ यीशु तेन्हि जे जवाब दी कइ बोलु, “अउं अपु उगाही अपफ बि दिउं त, तोउं बि से सही असी, किस कि मोउं पता असा कि अउं कोठिआ अओ असा त को जे घेन्ता। पर तुसी पता नेईं कि अउं कोठिआ अओ असा त को जे घेन्ता।

¹⁵ तुस इस धरती हेसाब जुए पंची कते; पर अउं केसे पंची ना कता।

¹⁶ अगर अउं पंची बि करुं तोउं बि में पंची सच्ची असी; किस कि अउं अकेला ना कता, अउं त में बोउ जेन अउं लंघो असा, अस दुहिए कते।

¹⁷ तुं नियम अन्तर बि ई लिखो असु कि दुई उगाही के कोई बि बोक पक्की भुन्ति।

¹⁸ यक उगाह त अउं अपफ असा, होरा उगाह में बोउए असा जेन अउं लंघो असा।”

¹⁹ तेन्हि तस केआं पुछु, “तें बोउ कोठि असा?” त यीशु तेन्हि जे बोलु, “अगर तुसी में पता भुन्ताथ त में बोउए बि पता भुन्ताथ।”

²⁰ ई सोब बोक तेन देहरे बहोड़ भण्डार भेएड़े शिक्षा देण टेम बोली, पर केनि से ना टाता; किस कि तसे टेम अपल तकर नेओथ अओ।

²¹ तेन तोउं तेन्हि जे बोलु, “अउं घेन्ता, त तुस मोउं तोपते त अपु पापे बजन माफी मरते। जेठि अउं घेन्ता, तठि तुस एई ना सकते।”

²² त यहूदी नेते अपफ बुच बोलु, “ए कि अपु मारणी मरता ना त किस बोता, ‘जेठि अउं घेन्ता, तठि तुस एई ना सकते।’”

²³ त तेन तेन्हि जे बोलु, “तुस उन्‍होरी भीन्‍थ, त अउं खड़ोरिया अओ असा। तुस धरती भीन्‍थ, पर अउं धरती ना भो।

²⁴ तोउं त मेईं तुसी जे बोलु कि तुस अपु पापे बजन माफी मरते। अगर तुस विश्वास ना कते कि ‘अउं सेईंए भो’, त तुस अपु पापे बजन माफी मरते।”

²⁵ त तेन्हि तस केआं पुछु, “तु कोउं भो?” यीशु तेन्हि जे बोलु, “जीं अउं शुरुवात केआं बोता अओ असा, ‘अउं सेईंए भो’।

²⁶ तुं बुराई बारे मोउं सुआ बोलुण त पंची बि करीण असी। पर अउं ना कता। किस कि अउं सद सेईंए बोता, जे मेईं तस केआं शुणो असु, जेन अउं लंघो असा। से सच्चा असा।”

²⁷ पर से ईं ना समझे कि यीशु तेन्हि जे परमपिता परमेश्वरे बारे बोलुण लगो असा।

²⁸ त यीशु तेन्हि जे बोलु, “जपल तुस मनखे कुआ खड़िया ढनान्ते, तपल तुसी पता लगता कि ‘अउं सेईंए भो’ त अउं अपफ कुछ ना कता, पर जीं बोउ शिचालता, तीं अउं बोक कता।

²⁹ त जेन अउं लंघो असा, से मोउं जोई साते असा; तेन अउं अकेला नेईं छोओ, किस कि अउं हमेशा सेईंया कम कता, जे तस खुश कते।”

³⁰ यीशु ई बोलुण लगो थिआ कि सुआ मेह्‍णु तस पुठ विश्वास किआ।

सच्चाई अजाद कती

³¹ तपल यीशु तेन्हि यहूदी मेह्‍णु जे बोलु, जेन तसे बोक मनो थी, “अगर तुस में बोक मानते रेहन्ते त तुस सच्चे में चेले बणते।

³² तुसी सच्चाई पता लगता, त से सच्चाई तुसी अजाद कती।”

³³ त तेन्हि तस जे बोलु, “अस अब्राहमे ऊड़ी भो त कदी केसे गुलाम नेईं बणो; त तु कीं बोता कि असी अजादी मेती?”

³⁴ यीशु तेन्हि जे बोलु, “अउं तुसी जे बोता कि जे बि पाप कता, से पापे गुलाम भो।

³⁵ त गुलाम हमेशा गी ना बिश्ता; पर कुआ बिश्ता।

³⁶ त अगर कुआ तुसी अजाद कता, त तुस सच्चे अजाद भोई घेन्ते।

³⁷ मोउं पता असा कि तुस सम्हाई अब्राहमे ऊड़ी भो; तोउं बि तुस मोउं मारण चहन्ते, किस कि में बोक पुठ विश्वास करणे तुं मन नेईं।

³⁸ अउं तसे बोता, जे अपु बोउ परमेश्वर केईं काओ असु, त तुस तसे कते, जे तुस अपु बोउ केआं शुणते।”

³⁹ त तेन्हि तस जे जवाब दिता, “हें बोउ अब्राहम भो।” त यीशु तेन्हि जे बोलु, “अगर तुस सच्चे बि अब्राहमे गभुर भुन्तेथ त तुस बि तसे ईं कम कतेथ।

⁴⁰ पर तुस त मोउं मारण चहन्ते, जे तुसी परमेश्वर केआं शुणो सच्चा वचन शुणान्ता। अब्राहमे त कदी ईं किओरु नेओथ।

⁴¹ पर तुस अपु बोउए ईं कम कते।” त तेन्हि तस जे बोलु, “अस तें ईं हलड़ नेईं जमो; हें यके बोउ असा, जे परमेश्वर भो।”

⁴² त यीशु तेन्हि जे बोलु, “अगर परमेश्वर तुं बोउ भुन्ताथ त तुसी अउं बि ट्यारा भुन्ताथ; किस कि अउं परमेश्वर केआं अओ असा। अउं अपफ नेईं अओ, पर परमेश्वरे अउं लंघो असा।

⁴³ तुसी में बोक तोउं ना समझ एन्ती किस कि तुस में बोक ना मानते।

⁴⁴ तुसी सम्हाई के बोउ शैतान भो त तुस तसे इच्छाई मुताविक जीण पसंद कते। से त शुरुवात केआं ईं मेह्‍णुमार असा त तस कदी परमेश्वरे सच्चा वचन ट्यारे ना लगे, किस कि सच्चाई तस अन्तर नेईं। जपल से झूठ बोता, त अपु सभावे हिसाब जुए बोता किस कि से झूठा असा त झूठ बोलुणे बाड़ी के बोउ असा।

⁴⁵ तोउं त जपल अउं सच्चाई बतान्ता, त तुस मोउं पुठ विश्वास ना कते।

⁴⁶ तुं बुच कि कोई बि में दोष किढ़ बटता ना? त अगर अउं सच्चु बोता त तुस मोउं पुठ विश्वास करिये लौता।

⁴⁷ जे परमेश्वर केआं असा, से परमेश्वरे बोक शुण कइ मानता। पर तुस तोउं शुणुण नेईं लगो, किस कि तुस परमेश्वर केईआं नेईं।”

यीशु अब्राहम केआं बि बोडा

⁴⁸ ई बोक शुण कइ यहूदी नेती तस जे बोलु, “कि असी ठीक ना बोलु ना कि तु यक सामरी ईं असा त तें अन्तर दुष्ट आत्मा असी।”

⁴⁹ यीशु तेन्हि जे बोलु, “मोउं अन्तर कोई दुष्ट आत्मा नेईं। पर अउं अपु बोउए इज्जत कता त तुस में बेज्जती कते।

⁵⁰ अउं अपु शान ना चहन्ता, पर यक असा जे में शान चहन्ता। से सम्हाई के पंची कता।

⁵¹ अउं तुसी जे बोता कि जे मेह्‍णु में बोक मानता, से कदी मरते नउ, पर तेन्हि अमर जीवन मेता।”

⁵² त यहूदी नेती तस जे बोलु, “अब असी पता चला कि तें अन्तर सच्चे बि दुष्ट आत्मा असी; किस कि अब्राहम त जाई कपल मरि गो असा, भविष्य वक्ते बि जाई कपल मरि गो असे त तु बोता कि ‘अगर कोई में बोक मनाल त से अमर भोई घेन्ता, त कदी ना मरता।’

⁵³ हें लकड़ दादु अब्राहम त मर गा, त तु कि तस केआं बि बोडा असा ना? भविष्य वक्ते बि मर गे, त तु अपफ जे की समझता?”

⁵⁴ यीशु जवाब अन्तर बोलु, “अगर अउं अपफ अपु इज्जत कता त में इज्जत कुछ नेईं। पर में इज्जत करणे बाड़ा में बोउ असा, जेस तुस ‘हें परमेश्वर’ बोते।

⁵⁵ पर तुस तस ना जाणते, अउं जाणता। अगर अउं बोता कि ना, तसे मोउं पता नेईं, त अउं बि तुं ईं झूठा बणता। पर अउं तस जाणता त तसे बोक मान कइ जीन्ता।

⁵⁶ में धरती पुठ बिशणे रोज हेरण जे तुं लकड़ दादु अब्राहम सुआ हप्पड़िये थिआ, त तेन काओ बि त सुआ खुश भुआ।”

⁵⁷ तेन्हि यीशु जे बोलु, “तोउ होता पंझा साल बि नेईं भो, त तु बोता कि अब्राहम काओ असा।”

⁵⁸ यीशु तेन्हि जे बोलु, “अउं तुसी जे बोता कि अब्राहम जमुण केईआं पेहलाई अउं असा।”

⁵⁹ तपल तेन्हि तस मारण जे घोड़ टाते पर यीशु नियोख कइ देहेर केआं नश गा।