यूहन्ना 21 - Walangi

यीशु अपु सत चेली जुए मीण

¹ तढ़ेया पता, यीशु अपफ गलीले तथे औत पुठ अपु चेली जुए मिआ। से घटना ईं भुई।

² शमौन पतरस, थोमा जेस जे जूंठ बि बोतेथ, त गलील राज्ये काना ग्रांए नथानयेल त जबदी दुई कुआ त यीशु चेली बुचा होरे दुई चेले किठिए थिए।

³ त शमौन पतरसे तेन्हि जे बोलु, “अउं मछली टाण जे गो असा” त तेन्हि तस जे बोलु, “अस बि तोउ जुए एन्ते।” त से तठिआ घेई कइ नाव पुठ जे गे। त मछली टाण जे तथ पुठ गे। पर तिएस ब्यादि कुछ ना टाइ बटु।

⁴ त पथवारी ईं यीशु तथे औत एई गा; पर तसे चेली से ना पिछाणे कि “ए यीशु भो।”

⁵ त यीशु तेन्हि जे बोलु, “में मितरों! तुसी कि मेउ ना?” तेन्हि तस जे बोलु, “ना!”

⁶ तेन तेन्हि जे बोलु, “नावे सुमले कना अपु जाल छड़े त मेतु।” त तेन्हि जाल छड़ा त सुआ मछली जाल अन्तर फसी त तेन्हि से थूस ना बटा।

⁷ त तेन चेले, जेस यीशु होरी केआं ज्यादा परेम कताथ, पतरस जे बोलु, “ए त प्रभु भो!” ईं शुण कइ कि “प्रभु भो” पतरसे झट अपु झिणे डबे (किस कि तेन कच्छा छड़ कइ कुछ नेओथ डबो।) त तथ अन्तर टाउ दी कइ औत पुठ जे आ।

⁸ पर होरे चेले, मछली जुए भरो जाल थूसते थूसते मठे औत पुठ पुजे। किस कि से सुआ दूर नेओथ, पर कोई यक सौ मिटर दूर थिए।

⁹ जपल से औत पुठ पुजे त हेरु कि अंगारी के आग जाओ असी त तस पुठ मछली रखो असी त कुछ रौठि बि असी।

¹⁰ यीशु तेन्हि जे बोलु, “जे मछली तुसी अभेईं टातो असी, तेन्हि बुचा कुछ इठि अण्हे।”

¹¹ शमौन पतरस नाव पुठ घेई कइ 153 बोडी बोडी मछली के भरो जाल औत पुठ जे थूसा। जाल अन्तर एती मछली थी, तोउं बि से जाल ना टूंटा।

¹² त यीशु तेन्हि जे बोलु, “एईए, कुछ खे!” पर तेन्हि चेली बुचा केसे बि हिम्मत ना भुई कि तस पुछ सकियेल कि “तुस कोउं भीन्‍थ?” किस कि तेन्हि पता थिआ कि से प्रभु भो।

¹³ त यीशु अगर घेई कइ रौठि टाती त तेन्के धे दिती, त मछली बि तीं की।

¹⁴ ईं टेकी बार भु कि यीशु मरुण केआं दुबारी जी कइ अपु चेली दर्शण दिता।

यीशु त शमौन पतरस

¹⁵ खाणे पता, यीशु शमौन पतरस जे बोलु, “ए शमौन! यूहन्ने कोईया! तु कि सच्चे इन्हि सोबी केआं ज्यादा मोउं जुए परेम कता ना?” त तेन तस जे बोलु, “आं प्रभु, तुसी पता असा कि अउं तुसी जुए परेम कता।” त तेन तस जे बोलु, “में दुन्थ चरीण दे!”

¹⁶ तोउं तेन दुबारी तस जे बोलु, “ए शमौना! यूहन्ने कोईया! तु कि सच्चे मोउं जुए परेम कता ना?” त पतरसे बोलु, “आं प्रभु, तुस जाणते कि अउं तुसी जुए परेम कता।” त तेन तस जे बोलु, “में ढडुड़ के ख्याल रख!”

¹⁷ तोउं तेन टेके लिंगि तस केआं पुछु, “ए शमौना! यूहन्ने कोईया! तु कि सच्चे मोउं जुए परेम कता ना?” त पतरस दुखी भुआ कि तेन टेके लिंगि तस केआं पुछु कि “तु सच्चे मोउं जुए परेम कता ना।” त तेन यीशु जे बोलु, “ए प्रभु, तोउ सम्हाई कुछ पता असा। तु ई बि जाणता कि अउं तुसी जुए परेम कता।” यीशु तस जे बोलु, “में ढडुड़ु चरीण दे।

¹⁸ अउं तोउ जे बोता कि जपल तु जवान थिआ, त अपफ तेयार भोई कइ जेठि मर्जी तठि घेन्ताथ। पर जपल तु स्याणा भोई घेन्ता त अपु हतेउ टडता त कोई होरा तोउ तेयार कइ कइ जेठि तु ना चहन्ता, तठि तोउ नेन्ता।”

¹⁹ तेन इस बोकी बेलि इशारा किआ कि पतरस कीं मर कइ परमेश्वर जे सुआ इज्जत देन्ता। ई बोल कइ तस जे बोलु, “में पता एन्ता रेह!”

²⁰ पतरस खिरक कइ हेरु कि से चेला तेन्के पता एण लगो असा जेस यीशु होरे केआं ज्यादा परेम कताथ, त जे बचणे त्योहारे रौठि खाणे टेम यीशु छाति कना जे उनकुशी कइ तस केआं पुछो थिउ कि “ए प्रभु, कोउं तोउ टोवान्ता?”

²¹ तस हेर कइ पतरस यीशु जे बोलु, “इसे की हाल भुन्ता?”

²² त यीशु तस जे बोलु, “अगर अउं चहाल कि से में दुबारी एण तकर जीन्ता रेह, त तोउ तसे बारे कीं स्यापा? तु बस में पतोती हंटता रेह।”

²³ त सम्हाई विश्वासी बुच इ बोक भुण लगी कि से चेला ना मरता। पर यीशु तस जे ई नेओथ बोलो थिउ कि से ना मरता, पर ईं कि “अगर अउं चहाल कि ए में दुबारी एण तकर जीन्ता रेह, त तस बारे तोउ की स्यापा?”

²⁴ अउं, यूहन्ना सेईंए चेला भो, जे इन्हि सोबी बोकी के उगाही देन्ता त इ सोब बोक लिखो असी। त असी सम्हाई जेईं पता असा कि जे उगाही मेईं लिखो असी, से सच्ची असी।

²⁵ बोक त इ असी कि यीशु होरे बि सुआ कम किए। अगर तेन्हि सोबी यक यक कइ कताब अन्तर लिखण बिशियेल त सुआ कताब बणती। अउं त ई बोता कि पूरी धरती अन्तर तेन्हि कताबी रखुंण जे बि जगाह ना मेईंयेल।