यूहन्ना 2 - Walangi

मनखे बुच यीशु मसीहे सेवाई कम ( 2:1—12:50 ) यीशु पेहला चमत्कारे कम करण

¹ तोउं टेके रोज, गलील राज्ये, काना नओएं शेहर अन्तर केसे ब्याहे धाम थी। त यीशु ई तठि थी।

² ब्याह जे यीशु त तसे चेले बि धामो थिए।

³ त जपल धामी बाड़ी के अराख मुक गा त यीशु ईये तस केईं एई कइ बोलु, “कोईया, अन्के अराख मुक गो असा।”

⁴ त यीशु तस जे बोलु, “ईया, ई बोक तुस मोउं जे किस बोलुण लगो असे। में शक्ति हरालणे टेम अभेईं तकर नेईं ओ।”

⁵ त तसे ईये नौखरी जे बोलु, “जे बि ए बोलाल, तीं करे”।

⁶ तठि छेआ बोडे बोडे घाड़ु थिए, जेन्हि अन्तर घट से घट 80-115 सीस पुओणि भरीन्तुथ। यहूदी मेह्‍णु तेस अपु रीति रिवाज जुए अपफ शुचा भुण जे बरततेथ।

⁷ तोउं यीशु तेन्हि नौखरी जे बोलु, “घाड़ु अन्तर पुओणि भरीण दिए।” नौखरी सम्हाई घाड़ु पुओणि बइ भरीं किए जीं उधार भरो असु।

⁸ तोउं तेन तेन्हि जे बोलु, “अब इठिआ धिक किढ़ कइ सरबेंटु धे दिए।” तोउं तेन्हि नौखरी जीं तेन बोलु, तीं किउ।

^9-10 त घाड़ु पुओणि अराख बण गा। पर सरबेंट पता नेओथ कि ए कोठिआ अण्हो असा। सद तेन्हि नौखरी पता थिआ कि ए कोठिआ अण्हतो असा। त जपल सरबेंटु से पुओणि चखु जे अराख बणि गो थिआ त नोउआं लाड़ा भिआई कइ बोलु, “सोब पेहले तेज अराख देन्ते त जपल मेहमानी धिक धिक लग चढ़ती त पुओणि ईं पिआन्ते। पर तेईं त अभेईं तकर तेज अराख रखो असा”।

¹¹ यीशु गलील राज्ये, काना शेहर अन्तर पेहले ए चमत्कारे कम कर कइ अपु शक्ति हराली त तसे चेली तेस पुठ विश्वास किआ।

¹² तढ़िया पता, यीशु अपु ई, भाई, त अपु चेली जुओई कफरनहुम शेहर जे गा त तठि किछ रोज बिशा।

यीशु यरुशलेम शेहरे देहेर घेण।

¹³ जपल यहूदी के बचणे त्योहारे टेम भुआ त यीशु यरुशलेम शेहर जे गा।

¹⁴ तठि यहूदी के देहरे औत-कोत बइ तेन हेरु कि मेह्‍णु गौड़े, ढडुड़ त अलिण भकत देण जे बेचण लगो असे त दलाल मेज पुठ बिश कइ रुपेई बटाण लगो असे।

¹⁵ तेन लेहरी कइ रेजुड़ दुणेर कइ, सोब जेईं तठिआ दौड़ाई छड़े, दलाली के रुपेई छिंगेई छड़े त तेन्के मेज सम्हाई इएर-ओवर फटाई छड़े।

¹⁶ जे अलिण बेचण लगो थिए तेन्हि जे बोलु, “इन्हि इठिआ घिन घिए; ए देहेर में बोउए गी भो; अस बाजार ना बणाए!”

¹⁷ (पता तसे चेली याद आई कि धरमे कताब अन्तर लिखो असु कि “तुं गी मोउं अतु ट्यारु असु कि एस बझई जुए अउं मर घेन्ता।”)

¹⁸ पर यहूदी के कुछ नेती यीशु जे बोलु, “तु असी ईं की निशाणी हराल सकता, जेसे बेलि असी पता लगियेल कि ए सोब करण जे तें हक असा?”

¹⁹ यीशु जवाब दिता, “ठीक असु! तुस इस देहेर ढाई छड़े, त टाई रोज अन्तर अउं इस दुबारी बणाई छता।”

²⁰ त तेन्हि बोलु, “की! इस देहेर बणाण जे छेताड़ी साल लग गो थिए, त तु इस टाई रोज अन्तर बणान्ता ना?”

²¹ पर यीशु अपु बोकी बोकी अन्तर जेस देहरे बारे बोलो थी, से अपु शरीर थिआ।

²² (पता, जपल यीशु मर कर दुबारी जीआ, त तसे चेली तसे ई बोक याद आई त तेन्हि धरमे कताब त तसे बोक पुठ विश्वास किआ।)

²³ यरुशलेम शेहर अन्तर बचणे त्योहारे रोजी तेन जे चमत्कारे कम किए, तस हेर कइ सुआ मेह्‍णु तसे पुठ विश्वास किआ।

²⁴ पर यीशु अपफ केसेरी जिम्मेबारी पुठ ना बिशा, किस कि तस सोबी के सभावे पता थिआ।

²⁵ कोई एई कइ मेह्‍णु के बारे तस जे बोलुण तसे जरूरत नेओथ, किस कि तस अपफ पता थिआ कि मेह्‍णु दिल अन्तर की असु।