यूहन्ना 19 - Walangi

राज्यपाल पिलातुस यीशु मरणे सज्जा शुणाण

¹ त राज्यपाल पिलातुसे यीशु नी कइ चाबुके बइ मडवा।

² त सपाही कांटि के मुकुट गुढि कइ तसे मगिरि जुए ला त यक लम्मु कच्चु काए रंगी कमीर डबाई।

³ त तस भेएड़ एई कइ मखोल बणाई कइ बोलुण लगे, “ए यहूदी मेह्‍णु के राजीया, तें जइ भो!” त तस पुठ चटाका देन्तेथ।

⁴ तोउं पिलातुसे दुबारी बाहर एई कइ तेन्हि यहूदी नेती जे बोलु, “हेरे, अउं तस दुबारी बाहर अण्हता, ताकि तुसी पता लगाल कि इस केआं ज्यादा डन देण जे तस अन्तर मोउं होर कोई दोष ना मेआ।”

⁵ त यीशु कांटि के मुकुट त कच्चु काए रंगी कमीर डब कइ बाहर निथा त पिलातुसे तेन्हि जे बोलु, “हेरे, से बिचारा मेह्‍णु ई भो।”

⁶ जपल मुख्य पुजारे त देहरे सपाही यीशु हेरु त लियार दी कइ बोलु, “ए क्रूस पुठ ढनाण, क्रूस पुठ।” त पिलातुसे तेन्हि जे बोलु, “तुस अपफ एस घिन कइ क्रूस पुठ ढिनिए, किस कि मोउं एस अन्तर कोई दोष ना मेता।”

⁷ त तेन्हि यहूदी बोलु, “हें बि नियम असा, जेसे बेलि ए मरणे सज्जा पाणे लेएक असा, किस कि एन अपफ जे परमेश्वरे कुआ भुणे दावा किओ असा।”

⁸ जपल पिलातुसे ईं बोक शुणी त सुआ डर गा।

⁹ त यीशु जुए साते मेहेल अन्तर घेई कइ पिलातुसे तस केआं पुछु, “तु कोठियाणि भो?” पर यीशु तस जे कुछ बि ना बोलु।

¹⁰ त पिलातुसे तस जे बोलु, “तु मोउं जुए किस बोक ना कता? तोउ कि पता नेईं ना तोउ छड़ देणे त क्रूस पुठ ढनाणे हक मोउं केईं असा?”

¹¹ यीशु तस जे बोलु, “अगर परमपिता परमेश्वर तोउ मोउं पुठ हक ना दुतो भुन्ताथ त मोउं पुठ तें कुछ बि हक ना थिआ। तोउं त जेन धोखा दी कइ अउं तें हवाले किओ असा, तसे पाप तोउ केआं बि बध असे।”

¹² ई बोक शुण कइ पिलातुसे तस छड़ देण चहु, पर यहूदी लियार दी दी कइ बोलु, “अगर तु अस छड़ देन्ता त तु रोमी राजा कैसरे मितर ना भो, किस कि जे बि अपफ जे राजा बोता त से कैसरे बराबरी कता।”

¹³ ई बोक शुण कइ पिलातुसे यीशु बाहर घिन गा त चौरुड़ पुठ जे नीआ, जेस जे इब्रानी भाषा अन्तर “गब्बता” बोते त पंची करणे सिंहासन पुठ बिश गा।

¹⁴ ए बचणे त्योहारे तेयारी करणे रोज थिआ त दिसाई कोई बाराह बजो थिए। त पिलातुसे यहूदी मेह्‍णु जे बोलु, “हेरे, ई भो तुं राजा!”

¹⁵ पर तेन्हि लियार दी कइ बोलु, “घिन गा, घिन गा त अस क्रूस पुठ ढना।” त पिलातुसे तेन्हि केईआं पुछु, “तुं राजा कि मोउं क्रूस पुठ ढनाण ना?” त मुख्य पुजारे बोलु, “कैसर छड़ दी कइ हें होरा कोई राजा नेईं!”

¹⁶ तोउं तेन तेन्के मांग मन कइ यीशु सपाही के हवाले किआ, ताकि तस क्रूस पुठ ढनाल।

यीशु क्रूस पुठ ढनाण

¹⁷ त यीशु अपु थम जेस पुठ से ढनाण थिआ, कन्‍हे पुठ कर कइ यरुशलेम केआं बाहर तेस जगाह तकर गा, जेस जे “खोपड़ी के जगाह” बोते त इब्रानी भाषा अन्तर “गुलगुता” बोते।

¹⁸ तठि तेन्हि से त होरे बि दुई मेह्‍णु क्रूस पुठ ढनिए। यक बउंआ कना, यक देहणा कना त यीशु बुच रखा।

¹⁹ पिलातुसे यक दोषपत्र लिखवाई कइ क्रूस पुठ लाई छड़ा। तस पुठ लिखो थिउ, “नासरते यीशु, यहूदी के राजा।”

²⁰ ए दोषपत्र सुआ यहूदी मेह्‍णु पढ़ा, किस कि जेस जगाह यीशु क्रूस पुठ ढनाओ थिआ, से शेहरे भेएड़ ईं थी त दोषपत्र बि इब्रानी, लतीनी त यूनानी भाषा अन्तर लिखो थिआ।

²¹ त यहूदी मेह्‍णु के मुख्य पुजारे पिलातुस जे बोलु, “यहूदी मेह्‍णु के राजा” ना लिख, पर लिख कि “एन बोलु कि अउं यहूदी मेह्‍णु के राजा भो।”

²² पर पिलातुसे तेन्हि जे बोलु, “मेईं जे लिखो असु, सेईंए रेहतु। तस ना बदिल सकते।”

²³ यीशु क्रूस पुठ ढनाणे पता, जे झिणे यीशु थिए, तेन्हि नी कइ सपाही चोउर बांट की। यक यक बांट यक यक सपाही जे। त कमीरी बि थी जे मगिरि केआं खुरी तकर बड़ाओ थिआ त तेन्हि अपफ बुच बोलु, “अस चीरीं, पर चले अस लखिर छते कि ए केसे नओं निस्ता”।

²⁴ त सपाही तिरुह किउ। ए घटना तोउं भुई, ताकि धरमे कताब अन्तर लिखो बोक कि “तेन्हि में झिणे अपफ बुच बांटे त में कमीरी जे लखिर छइ” पूरु भो।

²⁵ त यीशु ई, त मौसी, क्लोपासे जुएली मरियम, त मगदला ग्रांए मरियम यीशु क्रूसे भेएड़ ईं खड़ खड़ थी।

²⁶ यीशु अपु ई त से चेला जेस जुए से होरी केआं ज्यादा परेम कताथ तस अपु भेएड़ खड़ खड़ हेर कइ अपु ईया जे बोलु, “ईया! इढ़िया पता ए तें कुआ भो”।

²⁷ त तेस चेले जे बोलु, “ए तें ई भो।” त तढ़िया पता से चेला यीशु ईये ख्याल रखण लगा।

यीशु मरुण

²⁸ तोउं यीशु पता लगा कि परमेश्वरे जेस कम करण जे से लंघो थिआ, से पूरु भोई गो असु, त तेन धरमे कताबे बोक पूरी भुण जे बोलु, “मोउं टिश लगो असी।”

²⁹ तठि सिरके बइ भरो यक लोठु थिउ त तेन्हि स्पंज सिरके जुए सेल कइ जूफे नओएं बुटे लठि बइ तसे आसी जे छइ।

³⁰ यीशु से सिरका चखा, तोउं तेन बोलु, “अब में कम पूरु भु।” तोउं से अपु मगिर उनकुशेर कइ मरि गा।

³¹ त किस कि से रोज खास भक्ति करणे रोजे लिए तेयारी करणे रोज थिआ त यहूदी नेते ना चहन्तेथ कि भक्ति करणे रोज कोई क्रूस पुठ ढणेईए रेहियाल त तेन्हि पिलातुस जे तेन्के जंघ टोड़ुण जे छनेअरे की, ताकि भक्ति करणे रोज पेहला ईं तेन्के लाश भीं किढ़ सकियेल।

³² त सपाही एई कइ पेहले औती तसे जंघ टोड़ी, तोउं होर तसे बि जे यीशु जुए क्रूस पुठ ढनाओ थिआ।

³³ पर जपल से तसे भेएड़ आए त हेरु कि से जाई कपल केईआं मर गो असा। त तेन्हि तसे जंघ ना टोड़ी।

³⁴ पर सपाही यक बरछी बइ तसे टशवाड़ कोरा त तथा लहु त पुओणि निसुण लगु।

³⁵ जेन मेह्‍णु ए सोब काउ, तेन ई उगाह दुतो असा, ताकि तुस बि विश्वास करे। तस पता असा कि तसे उगाही सच्ची असी।

³⁶ ई सोब तोउं भु ताकि धरमे कताब अन्तर जे बोक लिखो असी कि “तसे यक बि हलोटा ना टोड़िन्ता।” से पूरु भो।

³⁷ होरी जगाई लिखो ई बोक बि पूरी भुई कि “से तसे धे हेरते, जे तेन्हि कोरो असा।”

यीशु कब्र अन्तर छाण

³⁸ अरिमतिया ग्रांए यूसुफ नओएं यक मेह्‍णु थिआ। से बि यीशु मानताथ, पर ई बोक तेन यहूदी नेती केआं नियोख कइ रखो थी किस कि से तेन्हि हेर डरताथ। तेन पिलातुस जे छनेअरे किउ कि यीशु लाश तस नेण दिए। त पिलातुस तसे छनेअरे मनु त से यीशु लाश नेण जे गा।

³⁹ तस जुए नीकुदेमुस बि थिआ जे यक रोज ब्यादि टेम यीशु केईं गो थिआ। तेन कोई 30 किलो खुशबुदार गुगुल त चंनण कठोड़े चुर्ण बणो मसाला अपफ जुए नीओ थी।

⁴⁰ तोउं तेन्हि यीशु लाश भीं किढ़ि त यहूदी मेह्‍णु के कब्र देणे रिवाज मुताविक तस पुठ मसाला लाई कइ कपड़े बइ लपेटी।

⁴¹ जेठि यीशु क्रूस पुठ ढनाओ थिआ, तठि यक बग थिआ, त तेस बग अन्तर यक नोई कुड थी जे कदी कब्र देणे जे उरतो-बरतो नेओथ।

⁴² किस कि यहूदी के भक्ति करणे रोजे तेयार करणे रोज मुकणे बाड़ा थिआ त तेन्हि से तेस कुड अन्तर रखा, किस कि से कुड नीड़ी थी।