यूहन्ना 16 - Walangiमेह्णु विश्वासी भुंजाण। 1 तोउं यीशु बोलु, “ई बोक मेईं तोउं बोली ताकि तुसी में चेला बणोरे रिहो लौते। 2 से तुसी अराधनालय केईआं बाहर किढ़ छते। ईं बि टेम एन्ता, जपल मेह्णु तुसी मार कइ समझते कि से परमेश्वरे सेवा करण लगो असे। 3 से ए सोब तोउं कते, किस कि तेन्हि ना बोउ पिरान्तो असा होर ना अउं पिरान्तो असा। 4 पर मेईं ए बोक तोउं बोली ताकि जपल से टेम एन्ता त तुस याद करियेल कि मेईं तुसी जे पेहले ईं बोलो थिउ। मेईं शुरुवात अन्तर इसे बारे ना बोलु, किस कि अउं तुसी जुए थिआ।” शुची आत्माई कम 5 “अउं अभेईं मोउं लंघाणे बाड़े परमपिता परमेश्वर केईं घेन्ता। पर तुसी बुच यक बि मोउं पुछुण नेईं लगो कि ‘तुस को जे घेन्ते?’ 6 ई सोब बोके जे मेईं तुसी जे बोली त तुस सुआ दुखी भोई गो असे। 7 तोउं बि अउं तुसी जे बोता कि में घेणे बेलि तुं भलाई भुन्ति, किस कि अगर अउं ना घेन्ता त से मदत करणे बाड़ा शुची आत्मा तुसी केईं ना एन्ती। पर अगर अउं घेन्ता त तस अउं तुसी केईं लंघान्ता। 8 त से एई कइ धरती मेह्णु के पापे घाड़ु फुटाणता, परमेश्वरे औजो कम त तसे न्याये बारे बि मेह्णु के अगर उगाही दी कइ तेन्हि चुप करान्ता।” 9 पापे घाड़ु फुटाणणे बारे से ई उगाही देन्ती कि मेह्णु मोउं पुठ विश्वास ना कते। 10 परमेश्वरे औजो कमे बारे से ई उगाही देन्ती कि तुसी अउं दुबारी ना केता, किस कि अउं बोउ केईं घेन्ता। 11 परमेश्वरे न्याये बारे शुची आत्मा ईं उगाही देन्ती कि परमेश्वर धरती पुठ राज करणे बाड़ा शैतान जे दोषी बड़ाई छोओ असा। 12 “मोउं अभेईं हउ बोक करण थी, पर तुस अभेईं तेन्हि सेही ना बटते। 13 पर जपल से मतलब सच्चे परमेश्वरे आत्मा एन्ती, से तुसी पूरी सच्चाई बथ हरालती। किस कि से अपफ कुछ ना बोती, पर जे बि बोउ केआं शुणती तस बतान्ती त एणे बाड़ी बोकी बतान्ता। 14 से में इज्जत बधान्ती, किस कि से में बोक शुण कइ तुसी बतान्ती 15 जे बि बोउए भो, से सम्हाई में भो। तोउं त मेईं बोलु, कि से में बोक शुण कइ तुसी बतान्ती।” दुख त खुशी 16 यीशु हउ बि बोलु, “कुछ देर लिए तुसी अउं ना केता त कुछ देर पता तुसी अउं केई घेन्ता” 17 त तसे कुछ चेले अपफ बुच बोलुण लगे, “‘कुछ देर लिए तुसी अउं ना केता त कुछ देर पता तुसी अउं केई घेन्ता किस कि अउं बोउ केईं घेन्ता’ एसे मतलब की असा? 18 ए जे बोता कि ‘कुछ देर पता’, एसे मतलब की असा? असी पता नेईं कि ए की बोता।” 19 यीशु ई पता लग कइ कि चेले तस केईआं कुछ पुछुण चहन्ते त तेन तेन्हि जे बोलु, “तुस कि अपफ बुच ‘कुछ देर लिए तुसी अउं ना केता त कुछ देर पता तुसी अउं केई घेन्ता’ बारे बोक करण लगो असे ना? 20 अउं तुसी जे बोता कि तुस मगिरि चठ दी दी कइ बक भोई घेन्ते, पर धरती मेह्णु खुशी घेन्ते। तुसी दुख भुन्ता, पर पता तुस खुश भोई घेन्ते। 21 जीं जपल यक जिल्हाणु शुले लगती, तस सुआ चिंग लगती, किस कि तसे कष्ट सेहणे टेम एई गो असा। पर जपल यक गभुर जमतु त तस से सोब कष्ट याद ना रेहन्ते, किस कि तसे बेलि इस धरती पुठ यक मनख जमो असा। 22 त तुसी अभेईं त दुख भुन्ता, पर जपल अउं तुसी दुबारी मेता, त तुस सुआ खुश भोई घेन्ते त कोई बि तुं खुशी खराब कइ ना बटते। 23 तेस रोज तुस मोउं केईआं कुछ ना पुछते। अउं तुसी जे बोता कि अगर तुस बोउ केआं मगते, से में नओं पुठ तुं धे दी छता। 24 अभेईं तकर तुसी में नओं पुठ कुछ नेईं मगो। मगीण दिए त तुं धे दीइन्तु, ताकि तुस सुआ सुख मेईंयाल।” यीशु मतोक जीता 25 “मेईं ईं सोब बोके तुसी जे कथाई बेलि बोली, पर अब हउ नेईं। अब अउं घुमाई-फिराई कइ ना बल्कि खुल कइ बोउए बारे तुसी बतान्ता। 26 तेस रोज तुस में नओं पुठ मगते त अउं तुं बारे बोउ जे दुआ कता ई नेईं बोलुण लगो। 27 पर बोउ अपफ तुसी परेम कता किस कि तुसी मोउं जुए परेम किआ त मोउं पुठ बि विश्वास किआ कि अउं बोउ केआं निसो असा। 28 अउं बोउ केआं निस कइ धरती पुठ जे अओ असा, त फिर धरती छड़ कइ बोउ केईं घेन्ता।” 29 तोउं तसे चेली बोलु, “हेर, अभेईं त तुस खुल कइ बोलुण लगो असे त केसे कथाई बेलिए नेईं लगो बोलुण। 30 अब अस समझ गे कि तुस सोब जाणते। तुसी केआं सवाल पुछणे कोई जरूरत नेईं, किस कि तुसी पता लग घेन्ता। इस बझई जुए अस विश्वास कते कि तुस परमेश्वर केआं निसो असे।” 31 ई शुण कइ यीशु तेन्हि जे बोलु, “तुस कि अभेईं विश्वास कते ना? 32 हेरे, से टेम एन्ता, त पुजी बि गा कि तुस सम्हाई अपु अपु बथ घेई घेन्ते, त मोउं अकेला छते। तोउं बि अउं अकेला नेईं, किस कि बोउ मोउं जुए असा। 33 ई सोब बोक मेईं तुसी जे तोउं बोली कि में बेलि तुसी शान्ति मेईंयेल। इस मतोक अन्तर तुसी दुख भुन्ता, पर हिम्मत रखे, किस कि मेईं ई मतोक जीतो असा।” |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.