यूहन्ना 13 - Walangi

यरुशलेम शेहर अन्तर यीशु मसीहे अखिर हफ्ता ( 13:1—19:42 ) यीशु अपु खास चेली के खुर धुआंण

¹ तोउं बचणे त्योहारे शुरु भुणे पेहला ईं यीशु पता थिआ कि धरती छड़ कइ अपु बोउ केईं जे तसे घेणे टेम अब भोई गो असा। फिर बि तेन इस धरती पुठ जे जे बि तसे अपु थिए, तेन्हि जोई जीं से शुरुवात केआं परेम कताथ तीं कते रेहा

² तिएस बेहलु खाणे टेम तकर शमौने कुआ यहूदा इस्कारियती पुठ शैताने यीशु टोवाणे अपु चाल चलाई छोओ थी।

³ यीशु पूरे ज्ञान जुए कि बोउए सम्हाई कुछ पुठ तसे धे हक दुतो असा त से परमेश्वर केआं अओ असा त तस केईं घेन्ता,

⁴ खड़ भोई कइ अपु फुलोणे टलिड़ खुई त मझीन पिड़ु।

⁵ त यक तसला अन्तर पाणि नी कइ चेली के खुर धुए त मझीने बइ धूशुण लगा

⁶ जपल से पतरसे खुर धुआंण जे आ, त तेन बोलु, “ए प्रभु, तु कि में खुर बि धुन्ता ना?”

⁷ यीशु तस जे बोलु, “जे अउं करण लगो असा, से तु अभेईं ना जाणता। पर पता तोउ समझ एन्ती।”

⁸ पतरसे तस जे बोलु, “अउं अपु खुर तुसी कदी ना धूणे देन्ता।” ई शुण कइ यीशु तस जे बोलु, “ए शमौन पतरसा, अगर तु मोउं धुआंण ना देन्ता त मोउं जुए तें कोई रिश्ता नेईं।”

⁹ त पतरसे तस जे बोलु, “ए प्रभु, अगर ईं गल असी त सद में खुर ना, में हथ त मगिर बि धुआंण दिए।”

¹⁰ यीशु तस जे बोलु, “जे सन्हो कइ गो असे, तेन्हि अपु खुर छड़ कइ होर कुछ धूणे जरूरत नेईं। किस कि से यकदम शुचे असे। तुस शुचे असे, पर सम्हाई शुचे नेईं।”

¹¹ तस पता थिआ कि कोउं तस दुश्माणी के हतेउ टोवान्ता, तोउं त तेन बोलु कि तुस सम्हाई शुचा नेईं।

¹² जपल यीशु तेन्के खुर धुआई छड़े त अपु टलिड़ लाई कइ वापस अपु जगाई बिशा त तेन्हि जे बोलु, “तुस कि समझे ना, अउं तुसी जोई की करण लगो थिआ?

¹³ तुस मोउं जे गुरु त प्रभु बोते त सही कते, किस कि अउं तुं गुरु त प्रभु भो।

¹⁴ प्रभु त गुरु भोई कइ बि अगर मेईं यक नौखरे ईं तुं खुर धुआ त तुसी बि यकी होरी सेवा करीण।

¹⁵ किस कि मेईं तुसी जे ईं कर कइ नमूना हरालो असा कि जी मेईं तुसी जोई किओ असु, तीं तुस बि करे।

¹⁶ अउं तुसी जे बोता कि गुलाम अपु मालिक केआं बोडा नेईं; त ना दूत अपु लंघाणे बाड़े केआं बोडा असा।

¹⁷ अभेईं मेईं जे किउ तस बारे तुसी पता लग गो असा। त अगर तुस कते रेहन्ते त तुसी हेर परमेश्वर खुश भुन्ता।”

यक चेले धोखा देणे बारे यीशु बोलुण।

¹⁸ यीशु हउ बि बोलु, “अउं तुसी सम्हाई के बारे बोलुण नेईं लगो; किस कि जेन्हि अउं चुणो असा, से मोउं पता असा। पर ए सोब तोउं भुन्तु ताकि धरमे कताब अन्तर जे लिखो असु कि ‘जेस मेईं रौठि खिलेई, सेईंए में दुश्माण बणा’ पूरु भो।

¹⁹ ई सोब भुणे पेहला ईं अउं तुसी जे बताण लगो असा, ताकि जपल सोब पूरु भोई घेन्तु त तुस विश्वास कते कि ‘अउं सेईंए भो।’

²⁰ अउं तुसी जे बोता कि जे में लंघो तस अपणान्ता, से मोउं अपणान्ता। त जे मोउं अपणान्ता, से मोउं लंघाणे बाड़े बि अपणान्ता।”

²¹ ई बोक बोल कइ यीशु मन अन्तर दुख भुआ त तेन ई उगाह दिता “अउं तुसी जे बोता कि तुसी बुचा यक मोउं दुश्माण केआं टोवान्ता।”

²² त चेले परेशान भोई गे कि ए केसे बारे बोलुण लगो असा, त यकी होरी धे हेरण लगे।

²³ तसे चेली बुचा यक, जेस यीशु होरी केआं ज्यादा परेम कताथ, तसे छाति कना जे कैनी कइ बिशो थिआ।

²⁴ त शमौन पतरसे तस जे भाश कर कइ यीशु केसे बारे बोलुण लगो असा, तस पुछुण जे बोलु।

²⁵ त तेन तिहांणि यीशु छाति कना जे कैनी कइ यीशु केआं पुछु, “ए प्रभु, से कोउं भो?” त यीशु बोलु, “जेसे धे अउं इस रौठि टुकुड़ डुबाई कइ देन्ता, से भो।”

²⁶ तोउं तेन रौठि टुकुड़ अराख अन्तर डूबाई कइ शमौने कुआ यहूदा इस्कारियती धे दुतु।

²⁷ त बोलु, “यहूदा, जे तु करणे बाड़ा असा, तस झट कर।” तोउं शैताने यहूदा अपु वश अन्तर किआ।

²⁸ पर तठि बिशो होरे चेली ई पता ना लगा कि ए बोक तेन किस बोली।

²⁹ किछ चेली समझु कि “शयद यीशु यहूदा केईआं असी त्योहार मनाण जे कुछ सामान मगो असा किस कि तस केईं रुपेई थैलुड़ु भुन्तुथ, होर शयद से कंगाली जे कुछ दान कता।”

³⁰ त यहूदा रौठि टुकुड़ खांते खांते तठिआ बाहर नश गा। तपल रात भोई गो थी।

यीशु अपु चेली जे नोई निआंग देण

³¹ जपल से बाहर घेई गा त यीशु बोलु, “अभेईं अउं जे मनखे कुआ असा, कत बोडा असा, परमेश्वर तस हरालणे बाड़ा असा। त परमेश्वर बोडा असा से मनखे कुआ हरालणे बाड़ा असा।

³² त में बझई जुए मेह्‍णु जाणते कि परमेश्वर कत ताकतवर असा, त परमेश्वर बि अउं कत बोडा असा, तस मेह्‍णु हरालता। से एस झट कता।

³³ ए में ट्यारेओ, अउं कुछ टेमी लिए तुसी जुए बिश्ता। तोउं तुस मोउं तोपते। पर जीं मेईं यहूदी नेती जे बोलो थिउ कि ‘जेठि अउं घेन्ता, तुस तठि ना एई सकते’ तीं अब अउं तुसी जे बि बोता।

³⁴ अउं तुसी जे यक नोई निआंग देन्ता कि तुस यक होरी जोई परेम करे; जीं मेईं तुसी जोई परेम किओ असा, तीं तुस बि यक होरी जोई परेम करे।

³⁵ अगर तुस अपफ बुच परेम जुए बिश्ते त तसे बेलि सम्हाई पिछाणते कि तुस में चेले भीन्‍थ।”

पतरस यीशु पिछाणण केआं मुकरणे भविष्य वाणि

³⁶ त शमौन पतरसे तस जे बोलु, “ए प्रभु, तु को जे घेन्ता?” यीशु जवाब अन्तर बोलु, “जेठि अउं घेन्ता, तठि तु अभेईं ना एई सकता। पर पता में पतोती एन्ता।”

³⁷ त पतरसे तस जे बोलु, “ए प्रभु, तें पतूं अभेईं अउं किस ना एई सकता? अउं तुसी जे अपु जान बि दी छता।”

³⁸ यीशु बोलु, “तु कि सच्चे मोउं जे अपु जान दी छता ना? अउं तोउ जे बोता कि कुकड़े बांग देणे केईआं पेहले ईं तु टाई लिंग मोउं पिराणण केआं मुकीर छता।”