यूहन्ना 10 - Walangi

पुहाल त तसे ढडुड़

¹ तोउं यीशु तेन्हि जे बोलु, “अउं तुसी जे बोता कि जे बि गुआड़ी पाठि बइ अन्तर ना एन्ते, पर बाड़ी पुठ बइ एन्ते, से चोर त डाकु भुन्ते।

² पर सद पुहाल पाठि उघाड़ि कइ अन्तर एन्ता

³ तस जे दुआर पुठ पेहरा देण बाड़ा पाठि उघाड़ता। ढडुड़ तसे अवाज पिछाणते त से अपु ढडुड़ नओं दी दी कइ बचरान्‍ता त तेन्हि बाहर किढ़ता।

⁴ त से अपु सम्हाई ढडुड़ बाहर किढ़ कइ तेन्के अगर अगर घेन्ता त ढडुड़ तसे पता पता घेन्ते। किस कि से तसे बचराण पिछाणते।

⁵ से अपिछाणो मेह्‍णु पता ना घेन्ते। पर तस केआं दूर दौड़ते, किस कि तेन्हि तसे बचराण ना भुन्तु पिछाणो।”

⁶ यीशु तेन्हि मेह्‍णु जे ई बोक लाई, पर तेन्हि ई समझ ना आई कि तेन ई बोक किस लाई।

यीशु, खरा पुहाल

⁷ तोउं यीशु दुबारी तेन्हि जे बोलु, “अउं तुसी जे बोता कि गुआड़ी पाठि जेन बइ ढडुड़ अन्तर घेन्ते, बाहर निस्ते, से अउं भो।

⁸ मोउं केआं अगर जे बि पुहाल अओ थिए, से सम्हाई चोर त डाकु थिए। तोउं त में ढडुड़ु तेन्के बचराण ना पिछाणी।

⁹ अउं ईं दुआर असा: अगर कोई मोउं बइ अन्तर एन्ता त से बच घेन्ता त एन्ता घेन्ता रेहन्ता, त तेस अपु दाणा पाणि मेता रेहन्ता।

¹⁰ चोर कुछ होरे कम जे ना, पर चोरुण जे, मारण जे त बरबाद करण जे एन्ता। अउं तोउं अओ असा कि मेह्‍णु जीवन मेईंयाल, जे जीवन खरा त रज्जि असा।”

¹¹ “खरा पुहाला अउंए असा; खरा पुहाल ढडुड़ु जे अपु जान देन्ता

¹² पर जे मजूर असे त जे ढडुड़ मालिक नेईं, से लाघी हेर कइ दौड़ देन्ते। त लाघ एई कइ कुछ ढडुड़ टान्‍ता त होरे ढडुड़ बिडिड़ घेन्ते।

¹³ किस कि से मजूर असे त दौड़ते। तेन्हि ढडुड़ु के कोई परवाह नेईं।”

^14-15 “खरा पुहाला अउंए असा। जीं अउं अपु बोउ जाणता त बोउ मोउं जाणता, तीं अउं अपु ढडुड़ जाणता त से मोउं जाणते। त अउं तेन्हि जे अपु जान देन्ता।

¹⁶ में होरे बि ढडुड़ असे, जे इस गुआड़ अन्तर नेईं। से में बचराण पिछाणते, त मोउं से बि अण्हणे जरूरी असे ताकि यके लछवारा त यके पुहाल भुओल।

¹⁷ अउं अपु मर्जी जुए अपु जान देन्ता, ताकि अउं दुबारी तस वापिस नी सकुं। तोउं त बोउ मोउं जुओई परेम कता।

¹⁸ में जान कोई मोउं केआं छुड़कान्ता नओं, पर अउं अपफ देन्ता, किस कि अपु जान देणे त वापिस नेणे हक में असा। में बोउए मेन्धे ई हक दुतो असा।”

¹⁹ यीशु ईं बोलुणे बझई जुए यहूदी मेह्‍णु बुच फूट भोई गई।

²⁰ तेन्हि बुचा सुआ जेईं बोलुण लगे, “एस अन्तर दुष्ट आत्मा असी त ए जगरी गो असा। एसे बोके किस शुणते?”

²¹ पर, होरे बोलु, “ए बोक तेस मेह्‍णु नेईं जेस अन्तर दुष्ट आत्मा असी। दुष्ट आत्मा कि अन्हे टीर सारेर बटती ना?”

यहूदी नेते यीशु खिलाफ भुण

²² तढ़ेया पता यरुशलेम अन्तर हन्नुकाह नओएं यक त्योहार आ। तपल हियुंते मेहना लगो थिआ।

²³ त यीशु देहेर अन्तर सुलैमाने मण्डप अन्तर हंटण लगो थिआ।

²⁴ तपल यहूदी नेती एई कइ यीशु बटेरा त पुछु, “तु कपल तकर असी इस उलझन अन्तर रखता? अगर तु मसीह असा, त असी जे खुल कइ बोलीण दे।”

²⁵ यीशु तेन्हि जे जवाब दिता, “मेईं तुसी जे बोलु, पर तुसी में बोक ना मनी। अब जे जे कम अउं अपु बोउए हक जुए कता, सेईंए में उगाह असे।

²⁶ पर तुस तोउं विश्वास ना कते, किस कि तुस में ढडुड़ ना भो।

²⁷ में ढडुड़ में बचराण शुणते त अउं तेन्हि जाणता। से में पतोती एन्ते।

²⁸ त अउं तेन्हि अमर जीवन देन्ता। से कदी ना मरते त में हतेउ केआं ना छुड़ुकते।

²⁹ में बोउ, जेन से मेन्धे दुतो असे, सोबी केआं ताकतवर असा। त कोई बि तेन्हि बोउए हतेउ केआं छुड़कइ ना बटता।

³⁰ अउं त बोउ यक असा।”

³¹ ई शुण कइ यहूदी मेह्‍णु तस मारण जे घोड़ टाण लगे।

³² त यीशु तेन्हि जे बोलु, “मेईं अपु बोउए कनारा सुआ चमत्कारे कम कर कइ हरालो असे। त तुस तेन्हि कमी बुचा केस कमे लिए मोउं घोड़िआई दी कइ मारण चहन्ते?”

³³ यहूदी मेह्‍णु तस जे बोलु, “चमत्कारे कमे लिए अस तोउ ना मारते, पर परमेश्वरे बुराई करणे बझई जुए। तु मनख भोई कइ बि अपफ परमेश्वरे बराबरी कता, तोउं त तोउ मारते।”

³⁴ यीशु तेन्हि जे बोलु, “तुं धरमे कताब अन्तर कि ईं नेईं लिखो ना, ‘मेईं बोलु कि तुस में पीढ़ी भो।’”

^35-36 “अगर परमेश्वरे तेन्हि जे ‘अपु पीढ़ी’ बोलु, जेन्के बुच तसे वचन पुजी गो असे, त तुस मोउं जे कीं परमेश्वरे बुराई कता बोते जपल मेईं बोलु कि ‘अउं परमेश्वरे कुआ भो’? अखिरकार परमपिता परमेश्वरे अउं शुचेर कइ इस धरती पुठ जे लंघो असा। (धरमे कताबे बोक की कदी बदलिन्‍ती ना?)

³⁷ अगर अउं अपु बोउए कम ना कता त बेशक मोउं पुठ विश्वास ना करे।

³⁸ पर अगर अउं तसे कम कता, त मोउं पुठ ना, कम से कम तेसे कमी पुठ त विश्वास करे जे अउं कता, ताकि तुसी पता लगाल कि अउं बोउ अन्तर त बोउ में अन्तर असा।”

³⁹ तोउं यहूदी मेह्‍णु दुबारी तस टाणे कोशिश की, पर से तेन्के हतेउ केआं छुड़क गा।

⁴⁰ तोउं यीशु यरदन दरेउ पार, तेस जगाई जे घेई गा जेठि यूहन्ना पेहले मेह्‍णु पाणि अन्तर चुसताथ त तठि बिशा।

⁴¹ त सुआ मेह्‍णु तस केईं एन्तेथ त अपफ बुच बोतेथ कि “यूहन्ने कोई चमत्कारे कम ना किए पर एसे बारे तेन जे बि बोलो थिउ; से सम्हाई सच्चु थिउ”।

⁴² तठि सुआ मेह्‍णु यीशु पुठ विश्वास किआ।