याकूब 5 - Walangi

अमीर मेह्‍णु समझाण

¹ ए अमीरो, शुणे! तुस अपु एणे बाड़े कड़ा-क्लेश पुठ हिकि हिकि रोले।

² तुं सोब धन बिगिड़ गो असा, त तुं झिणि पठि लग गो असी।

³ तुं सुन्ने चन्नी रुआ लग गो असा। सेईंए रुआ तुसी पुठ उगाही देन्ता त आग ईं तुं जिसम पटास बणाई छता। तुसी इस अखिर जुग अन्तर धन बेहड़ो असा।

⁴ हेरे, जेन्हि मजूर तुं बग लुणे, तुसी तेन्के से मजूरी धोखे जोई खाई छइ। तेन्के से मजूरी तुं खिलाफ लियार देण लगो असी त मजूर के रोलो-गाश सर्व शक्तिमान प्रभु शुणो असी।

⁵ तुसी धरती पुठ हर सुख त विलास भोग छड़ा; त भकत चढ़णे जानवरे ईं इस मारणे रोज जे अपफ पाड़-पुड़ि कइ मोटा ताकड़ा कइ छो असा।

⁶ त जे तुं विरोध ना कता, तुस तेस धर्मी मेह्‍णु पुठ दोष लाई कइ से मारा।

सीढ़ण अन्तर लाह रखुंण

⁷ तोउं त, ए ट्यारेओ! प्रभु एण तकर लाह रखे। हेरे, कीं यक जिमदार धरती पुठ कीमति फसली उम्मीद कर कइ हियुंते त वास्ते मेघ खरे लाह जुए भाड़ता।

⁸ तिहांणि तुस बि लाह रखे; त अपु मन मजबूत कइ छड़े, किस कि प्रभु झट एणे बाड़ा असा।

⁹ ए ट्यारेओ! यक होरी जे चर चरात ना करुण, ताकि तुसी पुठ बि दोष न लगे। हेरे, पंची करणे बाड़ा प्रभु दुआर पुठ पुजो असा।

¹⁰ ए ट्यारेओ! दुख तकलीफ सीढ़णे त लाह रखण तेन्हि भविष्य वक्ते केआं शिचे, जेन्हि प्रभु नओं पुठ वचन शुणाए।

¹¹ सच्ची, अस तेन्हि जे धन्य बोते, जे धीरज रख कइ सीढ़ते। तुसी अय्यूबे लाह रखणे बारे त शुणो भोल। तोउं प्रभु कनारा जे फल मेईंया तसे बारे बि जाण गो भोल, जेसे बेलि प्रभु परेम त दाह केती।

सोह ना करण

¹² ए में ट्यारेओ! सोबी केआं खास बोक ई असी कि सोहो न करण। न स्वर्गे, न धरती, न केसे चीजी। पर तुं बोक हाँ त हाँ, होर ना त ना लौती ताकि तुसी पुठ कोई दोष ना लगियेल।

विश्वास जुए प्रार्थना करणे शक्ति

¹³ अगर तुसी बुछ कोउं कष्ट अन्तर असा त प्रार्थना करीण दिए। अगर कोउं खुश असा, त से भजन लाण दिए।

¹⁴ अगर तुसी बुछ कोउं बीमार असा, त सतसंगे स्याणे भिआण दिए। तोउं से प्रभु नओं नी कइ तेस जोई तेल लाई कइ प्रार्थना कते।

¹⁵ तोउं विश्वासे जोई तेन्के प्रार्थनाई बेलि परमेश्वर तेस सुसुरेरि छता, त बछाण केआं से खड़िन्ता। होर अगर तेन पाप बि किओ भोल त से बि माफ भोई घेन्ते।

¹⁶ तोउं त तुस यकी होरी सामणि अपु पाप मनीण दिए, त यक होरी जे प्रार्थना करे, जेसे बेलि तुस सोब ठीक भोई घियेल। धर्मी मेह्‍णु प्रार्थना सुआ ताकतदार त असरदार भुन्ति।

¹⁷ एलिय्याह बि त हें ईं मेह्‍णु थिआ। तेन छनेअरे कर कइ प्रार्थना की कि मेघे न लौती लगो; त सढ़े टाई साल तकर धरती पुठ मेघे न लगी।

¹⁸ पता फिर तेन प्रार्थना की, अम्बर केआं मेघे लगी, त धरती पुठ खरी फसल भुई।

भटको विश्वासी पलाटण

¹⁹ ए में ट्यारेओ! अगर तुसी अन्तरा कोई जेईं सच्चाई केआं भटक घियाल त होरे कोउं जेईं तेस पलाटे,

²⁰ त अउं चहन्ता कि जे कोउं भटको तेस पापी पलाटियाल, तस पता लगो लौता कि तेन यक प्राण मरण केआं बचा, होर जे मेह्‍णु वापिस आ तसे सुआ पाप माफ भोई गे।