याकूब 4 - Walangi

मतोक जुए मितरी

¹ तुसी अन्तर झगड़ीण मडीण कोढ़िआ आउ? तेन्हि बुरी इच्छाई के बेलि नेईं ना, जे तुं अन्तर लड़ाई कते रेहन्ते?

² तुस चहन्ते त सुआ, पर तुसी कुछ मेतु नउ; तोउं त तुस मेह्‍णु मारते। तुस मन अन्तर लाछ त कते, पर तुसी से मेतु नउ। तोउं तुस यकी होरी जुए झगड़ीन्‍ते मडीन्‍ते। तुसी तोउं न मेतु किस कि तुस परमेश्वर केईं मगते नउ।

³ तुस मगते बि भोल, तोउं बि तुसी मेतु नउ, किस कि तुस गलत इरादे जोई मगते, ताकि अपु मतलबे त बुरी इच्छाई हेसाब जोई जी बटियेल।

⁴ ए धोखे देणे बाड़े मेह्‍णुओ! तुस न जाणते न कि मतोके मोह माया करीण परमेश्वर जोई बैर करण असा? तोउं त जे कोउं मतोके मोह माया रखणे कोशिश कता, से अपफ परमेश्वर बैरी बणान्ता।

⁵ होर की तुस ईं समझते ना कि धरमे कताबे ई बोक झूठ असी कि “परमेश्वरे जे आत्मा हें अन्तर बसाओ असी, से तसे बारे तीं जड़ता”?

⁶ पर परमेश्वर बि असी पुठ सुआ कृपा कता; तोउं त ई लिखो असु, “परमेश्वर घमण्डी विरोध कता, पर जे अपफ घटान्‍ते तेन्हि पुठ कृपा कता।”

⁷ तोउं त, परमेश्वरे वश अन्तर बिशे। शैताने विरोध करे। तोउं से तुं भेएड़ केआं नश घेन्ता।

⁸ परमेश्वरे भेएड़ एईए, त से बि तुं भेएड़ एन्ता। ए पापी मेह्‍णुओ! बुरे कम करण छड़ दिए। त ए दुमने मेह्‍णुओ! अपु मन शुचा करे।

⁹ दुखी भुए, त हिकि हिकि रोलीण दिए। हसुंण छड़ कइ रोलुण लगे, होर खुशी मनाणे बदले उदास भोई कइ बिशे।

¹⁰ प्रभु सामणि अपफ घटाण दिए त से तुसी बोडा बणान्ता।

होरी पंची करण केआं खबरदार

¹¹ ए ट्यारेओ, यकी होरी बदनामी ना करे। जे कोउं केसे विश्वासी बदनाम कता या दोष लान्ता, से नियमे बदनाम कता त नियम पुठ दोष लान्ता। त अगर तुस नियम पुठ दोष लान्ते त तुस नियम मानणे बाड़े ना भुए, बल्कि पंच बणे।

¹² परमेश्वर ईं असा जेन नियम दुतो असा त पंची बि कता। सेईंए बचाई बटता, होर मुकाई बि बटता। पर तु कोउं भो, जे अपु भेयाड़ पुठ दोष लान्ता?

शुकुण बारे रोभ ना किढ़ण

¹³ में ई बोक बि शुणे! तुस, जे ईं बोते कि, “आज या शुई अस केस होर शेहर घेन्ते, तठि यक साल बिश्ते, त व्यापार कर कइ सुआ कमान्ते”।

¹⁴ पर तुस त ई बि ना जाणते कि शुई की भुन्तु। तुं जिन्‍दगी की असी? तुस भखी ईं असे, जे थोड़ी देर केती, फिर खतम भोई घेन्ति।

¹⁵ त अस केआं अलावा तुसी जे इ बोलुण चहिए कि “अगर प्रभु चहाल त अस जीन्ते, त अस इस या ओस कम बि कते।”

¹⁶ पर तुस त अपु तिकड़म पुठ बधरेईन्ते। ई सोब बधरेईण बुरु भुन्तु।

¹⁷ तोउं त, जे कोउं सही करण जाणता पर ना कता, तसे लिए ए पाप असा।