याकूब 3 - Walangi

जिभुड़ पाठ रखुंण

¹ ए में ट्यारेओ! तुसी अन्तरा सुआ जेईं शिचालणे बाड़े न बणे, किस कि तुसी पता असा कि अस जे शिचालणे बाड़े असे, हें सुआ सक्ति कइ पंची भुन्ति।

² किस कि असी सोबी केईआं गलती भुन्ति रेहन्ती। पर जे कोई अपु बोके बेलि कुछ बि गलती ना कता, सेईंए सिद्ध मेह्‍णु असा। से अपु पूरा जिसम बि अपु वश अन्तर कइ रखता।

³ जपल अस घोड़े मुंह पुठ लगाम लान्ते त अस तसे पूरा जिसम अपु मर्जी जुए घुमाई बटते।

⁴ पाणि जहाज बि हेरे! से चहे जतु बि बोडे भुओल, होर तेज ब्यारे बेलिए चलते, तोउं बि यक मठड़ी ईं पतवारे बेलि मांझी तस अपु मर्जी जोई खरकान्‍ता।

⁵ तिहांणि जिभुड़ बि बस यक मठुड़ ईं अंग भो, तोउं बि कती बोडी बोडी बोकी के बुड़ुक लान्तु। हेरे त, यक चिड़ंगी बेलि कत बोडे जंगल आग लग घेन्ति।

⁶ तिहांणि जिभुड़ बि यक आगे ईं असु। जिभुड़ हें जिसम अन्तर बुरी चीजी के भण्डार भो, जे पूरी जिसम पुठ कलंक लान्तु त पूरी जिन्‍दगी अन्तर आग लाई छतु, जे आग यकदम नर्के भो।

⁷ मनख हर किस्मे जीव, चड़ी चखुरु, कीड़े मकोड़े, त पाणि बीची जीव अपु वश अन्तर कइ सकता। आं, सच्चे बि ईं कइ छो असु।

⁸ पर कोई बि मेह्‍णु अपु जिभुड़ पाठ रख ना बटता। ए त यक ईं बला असी जे कदी रुकती नउ। ए त सुआ खतरनाक जेहेरे बइ भरिए असु।

⁹ एसेरी बेलि अस अपु प्रभु त परमपिता परमेश्वरे गुणगान कते, होर एसेरी बेलि अस मेह्‍णु जे शराप देन्ते, जे परमेश्वर अपु स्वरूप अन्तर बणो असा।

¹⁰ तेस यके मुंहे बइ परमेश्वरे गुणगान त शराप दुहे निस्ते। ए में ट्यारेओ! ईं न भुण चहिए।

¹¹ कि यके सुजली मुंह केआं मुठु त खारु दुहे किस्मी पुओणि निस्तु ना? कदी ना।

¹² ए में ट्यारेओ, अंजीरे बुटा पुठ कि कदी जैतुन त दछि डा पुठ कि कदी अंजीर लगते ना? तिहांणि खारे सुजली केआं मुठु पुओणि न निस्तु।

स्वर्गे बुद्धि

¹³ तुसी अन्तर बुद्धिमान त समझदार कोउं असा? अगर कोई ईं असा त से अपु अब्बल जीणे बेलि त अपफ घटाई कइ बुद्धि जुए कम कर कइ हरालिण दिए।

¹⁴ पर अगर तुस अपु अपु मन अन्तर जड़ते, होर सद अपु बारे सोचते त रोभ जोई सच्चाई छड़ दी कइ झूठा ना बणुण।

¹⁵ किस कि ए बुद्धि से न भो जे खड़ोरिया, स्वर्ग केआं मेती। पर एसे ईं बुद्धि कुधर्मी त मतोके भो। ए शैतान केआं एन्ती।

¹⁶ किस कि जेठि मेह्‍णु होरी हेर जड़ते त सद अपु मतलब हेरते, तठि से सुआ रंगाड़ कइ रखते त हर किस्मी बुरे कम कते।

¹⁷ पर जे बुद्धि खड़ोरिया मेती पेहले त से शुची असी। से बुद्धि असी मिआणे बाड़ा, नरम मने बाड़ा, सुधी-बुद्धि बाड़ा, दाहोपरा, त खरे कम करणे बाड़ा बणान्ती। त तेस बुद्धि बेलि अस मेह्‍णु शकल हेर कइ कम ना कते, होर ना छल कपट कते।

¹⁸ जे मेह्‍णु मिआणे कम कते से शान्ति बाड़ु बिएजु बांते होर धरमे फसल लुणते।