याकूब 2 - Walangiकेहर-बेहर न करण 1 ए में ट्यारेओ! तुं बुछ केहर-बेहर ना लौती भो, किस कि तुस हें प्रभु मसीह यीशु पुठ विश्वास कते जेसे शान त महिमा सुआ असी। 2 धिक सोचे कि तुं सतसंग अन्तर यक मेह्णु सुन्ने अंगोठि त अब्बल झिणे लाई कइ आ। होर यक गरीब मेह्णु बि चीरिए झिणे लाई कइ आ। 3 तोउं अगर तुस तेस अब्बल झिणे लाओ मेह्णु हेर कइ बोलियेल, “तु ओठि अगर घेई कइ बिश” होर तेस गरीब मेह्णु जे बोलियेल, “तु दुई थम बुछ बिश” 4 ईं कर कइ कि तेईं केहर-बेहर न की ना, जीं यक दुष्ट पंच कता? 5 ए में ट्यारेओ, इए शुणे! परमेश्वरे कि इस मतोके गरीब मेह्णु ना चुणे ना, ताकि से विश्वास अन्तर अमीर बणे, होर तेस राज्ये हकदार बणे जेसे बारे तेन तेन्हि जे जुबान दुतो असी, जे तेस जोई परेम कते? 6 पर तुसी केहर-बेहर कर कइ तेन्हि गरीब मेह्णु के बेज्जती की। जे तुसी पुठ जुलुम कते से कि अमीर नेईं ना? जे तुसी जब्बरदस्ती कोर्ट कचेरी नेन्ते, से कि अमीर नेईं ना? 7 कि से मसीहे सुआ इज्जते नओएं बेज्जती न कते ना जेस तुस मानते? 8 अगर तुस परमेश्वरे तेस नियम मानते जे कि तसे राज्ये नियम असा त तुस खरु कते। से नियम भो: “तु अपु भेयाड़ जोई अपु बराबर परेम कर।” 9 पर अगर तुस मेह्णु हेर केहर-बेहर कते त तुस पाप कते; त नियम तुसी दोषी ठहेरियेर छता। 10 किस कि जे कोउं सम्हाई नियम मान कइ अगर यके नियम अन्तर चूक घियाल त सम्हाई नियम टोड़णे दोषी बणता। 11 किस कि जेन “तु नाजायज रिश्ता न रख” बोलो असु, तेन ईं बि बोलो असु कि “तु मेह्णु न मार।” तोउं त, अगर तेईं नाजायज रिश्ता ना रखा, पर मेह्णु मारा, त नियम टोड़णे दोषी बण गा। 12 इस बझई जुए, तुस तेन्हि मेह्णु के ईं बोक करे त चाल चलण रखे, जेन्के पंची अजाद कराणे बाड़ी कानुन बेलि भुन्ति। 13 किस कि जेन दाह न की, तसे पंची बजन दाहे भुन्ति: तोउं बि, जे दाह कते, पंची करणे टेम परमेश्वर बि तेन्हि पुठ दाह कता। बजन कमे, मरो विश्वास 14 ए में ट्यारेओ! अगर कोउं बोता कि मोउं विश्वास असा, पर विश्वासे हेसाब जोई से कम ना कता, त तेस विश्वासे की फायदा? से विश्वास केसे बचाई ना सकता। 15 अगर केसे भाई या भेणि खाण जे सुसुर रौठि त लाण जे सुसुर झिणे न भोल, 16 तोउं तुसी बुचा अगर कोउं जेईं इ बोलियाल, “मठे घिए; रज्जि खाए होर निघे झिणे लाए!” पर जे चीज जिसमे लिए जरूरी असी तेस न दियेल त की फायदा? 17 त बजन कमे, सद विश्वास करण मुड़दे ईं असा। 18 कोउं जेईं बोल सकता कि “तु विश्वास कता, पर अउं कम कता।” पर अउं बोता कि, तु बजन कमे अपु विश्वास मोउं हराल; त अउं अपु विश्वास कम कर कइ तोउ हरालता। 19 तु विश्वास कता कि यके परमेश्वर असा त तु खरु कता। दुष्ट आत्मा बि त तिहांणि विश्वास कती, होर डरी कइ ठरकती। 20 पर ए बेअक्ल मेह्णुओ! कि तुसी जे ई बि साबित करण जरूरी असु ना कि बजन कमे विश्वास बेकार असा? 21 हें पुरखा अब्राहम कि अपु कमे बझई जोई धर्मी ना बणा ना, जपल से अपु कोईये इसहाके कुण्ड पुठ भकत देणे बाड़ा थिआ? 22 तुसी अभेईं पता लगा कि तेस कम कते टेम तसे विश्वास थिआ, होर तसे कमी के बेलेरी से विश्वास पूरा भोई गा। 23 ई कर कइ धरमे कताबे बोक पूरा भोई गा, जेठि लिखो असु, “अब्राहमे परमेश्वर पुठ विश्वास किआ, त एसे बेलि से धर्मी बोलिआ” त मेह्णु तस जे “परमेश्वरे मितर” बोलु। 24 त तुसी हेरु कि परमेश्वर मेह्णु सद विश्वास करणे बेलि ना, बल्कि विश्वासे कमी के बेलि धर्मी बणान्ता। 25 त तिहांणि कि राहाब वेश्या बि धर्मी ना बणि ना, जपल तेन इस्राएले सपाही अपु गी रखे त होर बते बइ लंघाए? 26 त जिहांणि प्राण बजन हें जिसम मुड़दे ईं बेकार असे, तिहांणि विश्वासे कमे बजन, परमेश्वर पुठ हें विश्वास बि बेकार असा। |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.