इब्रानी 9 - Walangi

धरती डेरे अन्तर पुजारोठि

¹ अब, पेहली जुबान देन्ते टेम परमेश्वरे पूजा अराधना करण जे नियम दिता, त यक डेरा बि बड़ावा, जे तेसे लिए शुचा भोल।

² तेस उगाही डेरे अन्तर दुई भखेरी थी। पेहले भखेर अन्तर बोडा दीया, मेज त परमेश्वर जे चढ़ो रौठि भुन्तीथ। एस जे शुची जगाह बोते।

^3-4 होर चादुरु पतूं दोके भखेरी जे सुआ शुचा कुण्ड बोते। तेस अन्तर गुगुल छाण जे सुन्ने कुण्ड, चोहरो कना सुन्ने परत लगो जुबाने सन्नूक असा। तेस सन्नूक अन्तर स्वर्गे केआं अओ खाणे मन्ना बइ भरो यक सुन्ने लेंसुड़, परमेश्वरे नियम लिखो घोड़े पट्टि त हारुने लठि असी, जेस लुंगि अओ थी।

⁵ होर तेस जुबाने सन्नूके पुठे, दुई कना महिमा जुए भरो स्वर्गेदूते अपु पंखोड़ खोलो असे, जेसे पड्डे माफ करणे लिए परमेश्वरे मौजुदगी भुन्ति, जेसे बारे इठि अस बोक कइ ना बटते।

⁶ ई सोब तेयार करण केआं पता पुजारे अपु सेवाई कम करण जे रोज पेहले भखेरी अन्तर एन्ते घेन्ते रेहन्तेथ। से दोके भखेरी अन्तर ना घेन्ते।

⁷ सद बोडा पुजारा तेस भखेरी अन्तर साले यके लिंगि घेन्ता। से बि खाली हथ न, बल्कि से अपु त प्रजाई अणजाणी अन्तर किओ गलती त पापी के लिए भकती लहु घिन कइ घेन्ता।

⁸ शुची आत्मा एसे बेलि ई हरालती कि जोउं तकर पेहला भखेर असा, तोउं तकर दोके भखेर जेठि परमेश्वरे मौजुदगी भुन्ति, सोबी जे खुला नेईं।

⁹ ए देहेर आजकण जमाने मेह्‍णु लिए यक नमूने ईं असा, किस कि मेह्‍णु ईं दान दक्षिणा त भकत देन्ते, जेसे बेलि तेन्के अन्तरात्मा कदी शुची ना भुन्ति।

¹⁰ किस कि ए त बस बाहरी चीजी के हेसाब जुए असु जीं कि खाण पीण, शुचा भुणे अलग अलग सन्हुण, धूणे कयेदे-कानुन असे, जेन्के रिश्ता सद जिसम जुए असा। त जपल तकर परमेश्वर अपफ सोब कुछ सुसुर न कराल, तोउं तकर ए रेहन्ते।

सोबी भकती केईआं बि खरी, यीशु भकत ( 9:11—10:39 ) यीशु लहुए ताकत

^11-12 पर जपल मसीह आ, त से खरी बोकी के बोडा पुजारा बण कइ आ, जे सोब अभेईं असी जे असी। तोउं से स्वर्ग अन्तर तेस सुआ शुचा उगाही डेरे जे गा, जे मेह्‍णु के बेलि नेईं बणो, होर ना इस मतोके भो। से तठि ढडुड़ बकीर त गौड़ी के लहु घिन ना गा, बल्कि अपु लहु घिन कइ, बस यके लिंगि अन्तर गा त हमेशे लिए असी बचाणे मुल चुकाई छउ।

¹³ किस कि बकीरी के लहु, गौड़ी के लहु, त बच्छि पटास छिड़काणे बेलि अगर जुठा मेह्‍णु शुचा बण घेन्ता,

¹⁴ त जे मसीह अमर आत्माई बेलि, अपफ नरदोष रख कइ परमेश्वरे अगर अपु भकत दिती, तेस मसीहे लहु जरूर हें अन्तरात्माई सोबी बुरे कमी केआं साफ कतु। तोउं अस जीन्ते परमेश्वरे पूजा अराधना कइ बटते।

¹⁵ इस बझई जुए मसीह नोई जुबानी पंच बणा, ताकि परमेश्वरे चुणो तेन्हि जे तसे जुबानी मुताविक अमर विरासत मेईंयेल, किस कि से तेन्हि पुराणि जुबानी गलती त पापी केआं बचाणे लिए मर गा।

¹⁶ यक वसिहत अन्तर तस लिखणे बाड़ी के मरुण जरूरी भुन्तु।

¹⁷ किस कि वसिहत तपल कम एन्ती, जपल तस लिखणे बाड़ा मर घेन्ता। तसे जीन्ते जी वसिहते कोई फायदा नेईं।

¹⁸ तोउं त, पेहली जुबान बि भकती लहुए छीटी के बजन पक्की न भुई।

¹⁹ किस कि जपल मूसा सोबी मेह्‍णु नियमे हर यक निआंग शुणाई बिशा, त तेन बच्छुर त बकरे लहु नी कइ पुओणि, लाल ऊने त जूफे नओएं बुटे डाई बइ तेस नियमे कताब पुठ त सोबी मेह्‍णु पुठ छिड़कइ छोउ।

²⁰ त बोलु, “ए से लहु भो, जेसे बेलि परमेश्वरे दुतो जुबान पक्की भोई गई।”

²¹ होर इहांणि तेन तेस उगाही डेरा त पुजारोठि सोब सामान पुठ बि भकती लहुए छीट छिड़कइ छइ।

²² सच्चाई त ई असी कि नियमे हेसाब जोई सोब चीज भकती लहुए छीटी के बेलिए शुची करिन्‍ती। होर भकती लहुए छीट छिड़काणे बजन माफी न मेती।

मसीहे भकती बेलि माफी

²³ तोउं त जरूरी असु कि तेन्हि चीजी जानवरी के भकत देणे बेलिए शुचे करण, जेन्के शकल स्वर्गे चीजी के ईं असी। पर स्वर्ग अन्तरी चीज त एन्हि केईआं बि सुआ अब्बल भकत देणे बेलिए शुची करिन्‍ती।

²⁴ किस कि यीशु मसीह सिधे स्वर्गे शुचे डेरे अन्तर गा, ना कि मेह्‍णु के हथे बइ बणो स्वर्गे चीजे तेस नमूने अन्तर। यीशु मसीह स्वर्ग अन्तर गा, ताकि से हें लिए परमेश्वरे सामणि खड़ भोल।

²⁵ पर ईं बि नेईं कि से घड़ी घड़ी अपु भकत दिआल, जीं कि यक बोडा पुजारा हर साल भकती लहु नी कइ शुचे डेरे अन्तर घेन्ता रेहन्ता।

²⁶ अगर ईं भुन्तुथ त मसीह धरती शुरुवात केईआं खड़ घड़ी घड़ी दुख सेहण एन्ताथ। पर अब जुगे अखिर अन्तर यक लिंगि से अओ असा, ताकि से अपु भकत देणे बेलिए यके लिंगि सोबी के गलती त पाप माफ कइ छड़ाल।

²⁷ जिहांणि कि मेह्‍णु के लिए यके लिंगि मरुण त तढ़िया पता तेन्के न्याय भुण पक्कु असु,

²⁸ तिहांणि यीशु मसीह बि सुआ जेईं के गलती त पाप धूणे लिए यके लिंगि अपु भकत दिती। से दोके लिंगि तेन्के पापी के भकत देण जे न, बल्कि तेन्हि बचाण जे एन्ता, जे तस भाड़ बिशो असे।