इब्रानी 7 - Walangi

मलकिसिदके पुजारोठि

¹ एईएं मलकिसिदक, शालेमे राजा त सर्व शक्तिमान परमेश्वरे पुजारा थिआ। जपल अब्राहम तेन्हि चोउर राजी मार कइ एण लगो थिआ, त मलकिसिदक तस जुए मिआ त अशुश दिती।

² त अब्राहमे तसे धे अपु जीतो सम्हाई सामान केआं दसमा हेस्सा दिता। एईएं पेहले अपु नओं हेसाब जुए “धरमे राजा” भो। से शालेमे राजा बि भो, मतलब कि “शान्ति देणे बाड़ा” राजा भो।

³ तसे ईये बोउए कोई जाणकारी नेईं, होर ना तसे ऊड़ी कोई लेखा। से कपल जमा त कपल मरा, तसे बि कोई खबर नेईं। से त परमेश्वरे कोईये ईं जुग जुग तकर पुजारा बणो असा।

⁴ अब धिक सोचे कि ए मलकिसिदक कत बोडा थिआ कि हें पुरखा अब्राहमे अपफ तसे धे जीतो सामान केआं दसमा हेस्सा दिता।

⁵ मूसे दुतो नियमे हेसाब जुए पुजारे बणणे बाड़े लेवी ऊड़ी मेह्‍णु जे ई निआंग असी कि से अपु होरे भाई केईआं दसमा हेस्सा नी बटते, हांलाकि से सोबी यके बोउए मतलब अब्राहमे गभुर थिए।

⁶ पर मलकिसिदक अब्राहमे पीढ़ी केआं नेओथ। तोउं बि एन अब्राहम केआं दसमा हेस्सा नीआ त तसे धे अशुश दिती, जेस केईं परमेश्वरे जुबान थी।

⁷ असी पता असा कि बोडी केईआं मठड़ी अशुश मेती।

⁸ यक कना दसमा हेस्सा नेणे बाड़े लेवी मेह्‍णु असे। से सोब मरते। पर होर कना मलकिसिदक असा जेसे बारे धरमे कताब उगाह देन्ती कि से जीन्ता असा।

⁹ अस ई बि बोल बटते कि लेवी बि, जे दसमा हेस्सा नेन्ता, से अब्राहमे बेलि तसे धे दसमा हेस्सा दिता।

¹⁰ किस कि अब्राहम मलकिसिदके धे दसमा हेस्सा देण केआं पता लेवी जमा।

यीशु - जुग जुगे पुजारा

¹¹ पुजारोठि हेसाब जुए ईं असी सिद्ध भुण जे नियम मेओ थिए। हारुन केईआं लेवी पुजारोठि शुरुवात भुओ थी। त अब अगर तेस पुजारोठि बेलि अस सिद्ध भोई बटतेथ त मलकिसिदके ईं यक होरे पुजारे कोई जरूरत नेओथ।

¹² हांलाकि पुजारा बणणे रीत बदली गो असी, त नियम बदलण बि जरूरी असे।

¹³ किस कि जेस पुजारे यीशु बारे अस बोक करण लगो असे, से लेवी ऊड़ी केईआं नेओथ, होर ना कोई बि कदी तसे ऊड़ी अन्तरा परमेश्वरे पुजारा बणो असा।

¹⁴ किस कि ई साफ असु कि हें प्रभु यीशु यहूदा ऊड़ी केआं थिआ, जेस ऊड़ी पुजारोठि बारे मूसे कदी ना बोलु।

¹⁵ मलकिसिदके ईं यक होरा पुजारा एणे बेलि ई बोक हउ बि साफ भोई गई।

¹⁶ किस कि यीशु केसेरी ऊड़ी पुजारोठि बेलि पुजारा ना बणा, बल्कि अमर जीवने ताकते बेलि बणो असा।

¹⁷ तसे बारे धरमे कताब उगाह दी कइ ई बोती कि, “तु जुग जुगे पुजारा भो, जीं मलकिसिदक असा।”

^18-19 मूसे दुतो नियम मानणे बेलि कोई बि सिद्ध ना बणा। त से पुराणे नियम परमेश्वरे बन्ह कइ छड़े, किस कि से कमजोर त नकम्मा थिए। पर, तेन हेन्धे सोबी केआं अब्बल यक उम्मीद, यीशु दुतो असा, जे असी तसे भेएड़ अण्ह बटता।

²⁰ जे पेहले पुजारे बणतेथ, तेन्हि नियुक्त कते टेम परमेश्वरे कोई सोह ना कताथ। पर एस उम्मीद मतलब यीशु पुजारा नियुक्त कते टेम तेन सोह किए।

²¹ किस कि लेवी ऊड़ी मेह्‍णु त बजन सोहे पुजारे बणो थिए। पर परमेश्वरे अपु सोह कर कइ यीशु मसीह नियुक्त किआ। धरमे कताब अन्तर लिखो असु कि प्रभु सोह किओ असे, त से तस फिर कदी न टोड़ता। तेन बोलु, “तु जुग जुगे पुजारा भो।”

²² एस बझई जुए यीशु यक बधिया जुबानी पंच बण गा।

²³ लेवी ऊड़ी मेह्‍णु पुजारे त सुआ जेईं बणते अओ थिए, किस कि से मर घेन्तेथ।

²⁴ पर यीशु मसीह अमर असा। तोउं त तसे पुजारोठि बि जुग जुग बणोरी रेहन्ती।

²⁵ इस बझई जुए, जे मेह्‍णु यीशु बेलिए परमेश्वरे भेएड़ एन्ते, से तेन्हि बचाई बटता, किस कि से तेन्हि जे प्रार्थना दुआ करण जे हमेशा जीन्ता असा।

²⁶ तोउं त असी इहांणि यक बोडे पुजारे जरूरत असी जे शुचा, धर्मी, साफ त पापी मेह्‍णु केआं अलग त स्वर्गे सोबी केआं बोडा असा।

²⁷ होर तेन्हि लेवी ऊड़ी बोडी पुजारी के ईं यीशु जरूरी नेईं कि हर रोज पेहले अपु त फि मेह्‍णु के गलती त पापी के लिए भकत चढ़ाउं, किस कि जपल तेन अपु भकत दिती त तेन ए कम जुगे जुगे लिए पूरु कइ छोउ।

²⁸ मूसे दुतो नियम त कमजोर मेह्‍णु बोडा पुजारा बणान्ता। पर नियम देणे केआं पता, परमेश्वरे दुतो से जुबाने वचन तसे कुआ यीशु चुणता, जे जुग जुगे लिए सिद्ध कइ गो असा।