इब्रानी 6 - Walangi

¹ तोउं त, चले! मसीहे शुरुवाती शिक्षा केआं अगर बध कइ अस विश्वास अन्तर पक्के भोई घेन्ते। बुरे कमी केआं मन बदलणे, त परमेश्वर पुठ विश्वास करणे बारे शुरुवाती शिक्षा दुबारी शिच कइ अपु विश्वासे दोकी खाई ना देन्ते।

² होर पाणि अन्तर चुसुणे अलग अलग शिक्षाई बारे, हथ रखणे बारे, मरो मेह्‍णु दुबारी जीणे त अखिर न्याय भुणे बारे शुरुवाती शिक्षा केआं अगर बधते।

³ होर अगर परमेश्वर चहाल त अस इहांणि कते।

⁴ किस कि जे जेईं परमेश्वरे सच्चाई जाण कइ, स्वर्ग केआं वरदान मेई कइ त शुची आत्मा अन्तर हेस्सेदार बण कइ बि विश्वास केआं मुकीर घेन्ते, तेन्हि दुबारी विश्वास अन्तर कदी अण्ह ना बटते।

⁵ जेन्हि परमेश्वरे वचने बेलि फायदा भुओ असा, होर जेन्हि एणे बाड़ी जुगे ताकते पता लग गो असा,

⁶ अगर से विश्वास छड़ देन्ते त तेन्हि मन बदलाई कइ दुबारी विश्वास अन्तर कदी अण्ह ना बटते। किस कि से ईं कर कइ अपु नुकसान करण जे परमेश्वरे कुआ दुबारी क्रूस पुठ ढनाई कइ मारते त सोबी के सामणि तस लजेरते।

⁷ कुछ मेह्‍णु तेस जिमि ईं असे, जे जिम मेघे पुओणि चुश कइ अपु बाणे बाड़े जे सुसुर फसल लुंगाणती। तस परमेश्वर अशुश देन्ता।

⁸ पर कुछ होरे मेह्‍णु असे, से तेस जिमि ईं असे, जे फसले जगाई शिउ छरबेउ लुंगाणन्ते। एसे कोई फायदा नेईं। एस परमेश्वर श्राप देन्ता त अखिर अन्तर आगी अन्तर टड़ते।

⁹ ए ट्यारेओ! हांलाकि अस ई बोलुण लगो असे, तोउं बि तुं लिए अस परमेश्वर केईं तुसी बचाणे खरी बोकी के पक्की उम्मीद कते।

¹⁰ किस कि परमेश्वर अन्याय करणे बाड़ा न भो कि से तस जोई, जे तुं परेम असा, तस बिसिर छता। से जरूर याद कता कि तुसी कीं परमेश्वरे शुचे मेह्‍णु के सेवा की त अभेईं तकर कते अओ असे।

¹¹ त अस चहन्ते कि तुस सोब अखिर तकर बोडे जोश जुए तिहांणि कते रिहे, ताकि तुस जे उम्मीद करण लगो असे, से तुसी मेई घियेल।

¹² होर तुस नकम्मे ना, बल्कि तेन्हि मेह्‍णु के ईं भुन्ते जे सुआ लाह रख कइ विश्वासे बेलि परमेश्वरे सोब जुबान पूरी भुन्ति हेरियेल।

परमेश्वरे पक्की जुबान

¹³ जपल परमेश्वरे अब्राहम धे जुबान दुतो थी त तेन अपु नओएं सोह किओ थिए, किस कि तेस केआं बोडा होरा कोई नेओथ, जेस नओं पुठ से सोह कताथ।

¹⁴ तेन तस धे ई जुबान दिती कि “जरूर अउं तोउ सुआ अशुश देन्ता त तें वंश बधान्ता।”

¹⁵ पर केहि टेम तकर लाह रख कइ अखिर अन्तर अब्राहमे परमेश्वरे जुबान पूरी भुण काई।

¹⁶ मेह्‍णु ज्यादातर अपफ केआं बोडी के सोह कते त सोबी मडीण त मुहाबले सोह कर कइ खतम कते।

¹⁷ त जपल परमेश्वरे चहा कि अब्राहमे धे हकदार देणे अपु जुबान हउ बि पक्की करीण, होर ई हरालुण कि से अपु योजना ना बदलता त तेन सोह किए।

¹⁸ परमेश्वर कदी झूठ ना बोता। परमेश्वरे जुबान त तसे सोह कदी बदली न बटते। त असी इस बोक पुठ ती हिम्मत मेओ लौती। किस कि अस परमेश्वरे दुतो तेस उम्मीद सम्हाड़ी कइ रखण जे तेस केईं जे दौड़ो असे।

¹⁹ हें उम्मीद प्रभु यीशु भो। से हें जीवन सुसुर रखण जे मजबूत त यकीन लेएक असा। से चादुर पार कर कइ स्वर्गे देहरे शुचा भखेरी अन्तर एन्ता घेन्ता रेहन्ता।

²⁰ यीशु असी केआं अगरी तठि गो असा त मलकिसिदके ईं जुग जुग तकर हें बोडा पुजारा बणो असा।