इब्रानी 5 - Walangi

¹ परमेश्वरे हर यक बोडा पुजारा मेह्‍णु केईआं ईं चुणता, ताकि से तसे अगर मेह्‍णु के दान त गलती त पापे माफी लिए भकत चढ़ाल।

² बोडा पुजारा तेन्हि मेह्‍णु अराम त परेम जुए धरान्ता, जे बेअक्ले त टिनाबौरे असे, किस कि से अपफ बि कमजोर असा।

³ इस बझई जुए जीं से होरी के गलती त पापे लिए भकत चढ़ान्ता, तीं तस बि अपफ जे भकत चढ़ाण एन्ती।

⁴ पर ई इज्जतदार कम करण जे कोई बि अपु अपफ बणाई न सकता। जिहांणि परमेश्वरे हारुन पेहला बोडा पुजारा बणुण जे भिहो थिआ, तिहांणि इस कम करण जे परमेश्वर मेह्‍णु भिआन्ता।

⁵ त मसीह बि बोडा पुजारा बणुण जे अपु अपफ खड़ न भुआ, बल्कि परमेश्वरे से नियुक्त किआ, ई बोल कइ कि “आज अउं तें बारे ई घोषणा कता कि तु में कुआ भो, होर अउं तें बोउ भो।”

⁶ तेन होर जगाई बि बोलो असु कि “तु जुग जुगे पुजारा भो, जीं मलकिसिदक थिआ।”

⁷ जपल यीशु मनखे जिसम धरो थिआ त तेन रोल रोल कइ त लियार दी दी कइ तेस परमेश्वर जे प्रार्थना दुआ की जे तस मरण केआं बचाई बटताथ। त तसे भक्ति बझई जुए परमेश्वरे तसे प्रार्थना शुणी।

⁸ हांलाकि से अपफ परमेश्वरे कुआ थिआ, तोउं बि दुख सेही कइ तेन निआंग मनीण शिचि।

⁹ पता जपल यीशु सिद्ध भुआ, परमेश्वरे हमेशा लिए से अपु निआंग मानणे बाड़ी के बचाणे बाड़ा बणा।

¹⁰ किस कि परमेश्वरे से मलकिसिदके ईं बोडा पुजारा बणाण जे चुणो थिआ।

विश्वास छड़ देण केआं सावधान

¹¹ एसे बारे मोउं सुआ बोके करीण असी। पर तुसी समझाण बि औखु असु, किस कि अब तुं बुद्धि बटा लग गो असा।

¹² अभेईं तकर त तुसी होरे मेह्‍णु शिचालण लौतेथ अओ, पर तुं हाल ईं असा कि केनि होरी तुसी परमेश्वरे वचने शुरुवाती बोके शिचालियेल। अभेईं बि तुसी दुधे ईं हालकु, परमेश्वरे शुरुवाती बोक शिचीण असी, ना कि से बोके जे समझण जे ओखी असी।

¹³ किस कि जे दुधे ईं हलकी शिक्षा बेलि जीन्ते, से गभुर के ईं असे, जे धरमे शिक्षा ना जाणते।

¹⁴ पर भारी खाणे ईं ओखी शिक्षा तेन्हि मेह्‍णु जे असी, जेन्हि स्याणे के ईं सही गलते फरक किढ़ण शिचो असा।