इब्रानी 4 - Walangi

¹ त किस कि परमेश्वरे टांक तकर पुजणे जुबान अपल तकर बि चलो असी, त चले समोझि बिश्ते ताकि कोई जेईं पतूं रेही ना घियाल।

² किस कि खुश खबरी जीं असी केईं पुजी, तीं तेन्हि केईं बि पुजो थी। पर तेन्हि तेस खबर शुण कइ विश्वास न किआ त तसे बेलि तेन्के कोई फायदा न भुआ।

³ सद अस, जेन्हि विश्वास किओ असे, तसे टांक तकर पुजते। पर जे विश्वास ना कते, से ना पुजते। हांलाकि सृष्टि शुरुवात केईआं ईं परमेश्वरे टांक बणो थिआ, तोउं बि परमेश्वरे एन्के बारे बोलु कि “लेहरी कइ मेईं सोह कइ छड़े कि ‘अउं एन्हि अपु टांक तकर ना पुजान्ता।’”

⁴ धरमे कताबे होर जगाई ईं लिखो असु कि “त सतूं रोजे परमेश्वर अपु सम्हाई कम केआं अराम किआ।”

⁵ त इठि परमेश्वरे दुबारी बोलो असु कि “अउं एन्हि अपु टांक तकर ना पुजान्ता।”

⁶ त इसे मतलब ई असा कि तसे टांक पुजणे जुबान अभेईं बि चलो असी, होर जेन्हि पेहले एसे बारे शुणो थिउ, तेन्हि तसे निआंग न मनी त तठि पूज न बटे।

⁷ त परमेश्वरे यक होरा रोज ठीक किआ जेस जे “आजकण रोज” बोते। तेन सुआ सालुं बाद दुबारी राजा दाऊदे बेलिए एसे बारे बोलु, जे पेहलाई केआं बोलो थिउ कि “अगर आज तुस तसे बोके शुणियेल, त परमेश्वर बोता कि ‘तुस अपु अपु मन नकठर ना करे, जीं तुं पुरखी में खिलाफ किओ थिआ।’”

⁸ मतलब ई भु कि मूसे केआं पता, सेनापति यहोशू से परमेश्वरे टांक तकर नेओथ पुजाई बटो। किस कि अगर पुजाओ भुन्तेथ त तेस टांक तकर पुजुण जे यक होरे रोजे बारे परमेश्वर बोलुणे जरूरी नेओथ।

⁹ तोउं त, जिहांणि परमेश्वरे भक्ति करणे रोज अराम किओ थिआ, तिहांणि परमेश्वरे सोबी गभुर जे बि अराम करणे रोज असा।

¹⁰ किस कि जे बि परमेश्वरे टांक तकर पुजता, से अपु कम केआं अराम कता, जीं परमेश्वरे किओ थिआ।

¹¹ तोउं त, चले तेस टांक तकर पुजुण जे अस जब्बर कोशिश कते। ई ना भो कि निआंग ना मान कइ तेन्हि पुरखी के ईं असी बुछ कोई पतूं रेही घियाल।

¹² किस कि परमेश्वरे वचन जीन्ता त शक्तिशाली असा। से तेज केआं बि तेज दुई धारी तलवारे ईं असा, जे प्राण त आत्मा, होर जिसम त हलोटे काट छता। ए हर मने भियो त सोच पता कता।

¹³ होर परमेश्वर केआं कोई बि नियोक न बटता, बल्कि तेसे अगर सोब नगे त खुले असे, किस कि असी तेसे धे अपु लेखाजोखा देण असा।

यीशु, हारुने पुजारोठि केईआं बि बोडा ( 4:14—7:28 ) यीशु, सोबी केआं बोडा पुजारा

¹⁴ त किस कि असी जे परमेश्वरे कुआ यीशु असा, जे स्वर्ग अन्तर जे घेई गो असा। से हें बोडा पुजारा असा। त चले, तेस पुठ खरे हिम्मत जुए विश्वास कते रेहन्ते।

¹⁵ किस कि असी जे यक ईं बोडा पुजारा असा, जे असी सुसुर समझता। से तोउं असी समझ बटता, किस कि तसे हर यक बोकी पुठ परीक्षा भो थी, पर तेन कोई गलती त पाप न किआ।

¹⁶ त चले अस खरी हिम्मत जुए तेस दाह करणे बाड़े परमेश्वरे सिंहासने भेएड़ जे घेन्ते। तठि असी जरूरते दाह त कृपा मेती।