इब्रानी 3 - Walangi

यीशु, मूसा त यहोशू केईआं बि बोडा ( 3:1—4:13 ) यीशु, मूसा भविष्य वक्ते केआं बि खरा

¹ तोउं त, ए में भाई त भेणिओं! तुस, जे परमेश्वरे शुचे भुण जे भिओ असे! हें विश्वासे मुखिया त हें बोडा पुजारे यीशु बारे धिक सोचे।

² जीं मूसा पूरे परमेश्वरे गी अन्तर यकीन लेएक थिआ, तीं यीशु तेस परमेश्वर जे यकीन लेएक थिआ, जेन से नियुक्त किओ थिआ।

³ तोउं बि जीं यक घर बणाणे बाड़े जे, घर केआं बि ज्यादी इज्जत मेती, तीं यीशु मूसे केआं बि ज्यादा इज्जत मेणे लेएक असा।

⁴ किस कि घर बणाणे बाड़ा कोई बि भोई सकता, पर जेन सम्हाई कुछ बणो असु, से परमेश्वर भो।

⁵ अब मूसा परमेश्वरे गी अन्तर यक सेवक ईं यकीन लेएक थिआ। तसे कम ई थिउ कि से तेन्हि बोकी के मेह्‍णु उगाह दी बटियेल, जे परमेश्वर पता बोता।

⁶ पर यीशु मसीह यक कोईये ईं परमेश्वरे गी अन्तर यकीन लेएक थिआ। अगर अस अखिर तकर हें विश्वासे लिए हिम्मत रखते, परमेश्वर पुठ उम्मीद कते रेहन्ते त अस परमेश्वरे गीहे मेह्‍णु बणते।

परमेश्वरे गभुर जे टांक

⁷ त जीं परमेश्वरे आत्मा बोती कि “अगर आज तुस तसे बोक शुणियेल त परमेश्वर बोता कि

⁸ ‘तुस अपु अपु मन नकठर ना करे, जीं तुं पुरखी में खिलाफ किओ थिआ, जपल तेन्के परीक्षा अरुणि धार अन्तर भुण लगो थी।

⁹ तठि तुं पुरखी में परीक्षा नी कइ अउं परखा, त चढ़ी साल तकर में कम हेरु।

¹⁰ तोउं त, अउं तेन्हि पुठ लेहरी गा, त बोलु, “एन्के मन हमेशा भटकोरा भुन्ता; एन्हि समझ कइ बि ना समझु कि अउं एन्हि केईआं की कराण चहन्ता।”

¹¹ त मेईं लेहरी कइ सोह कइ छड़े कि अउं एन्हि अपु टांक तकर ना पुजान्ता।’”

¹² त, ए ट्यारेओ, समोझि बिशे! ई न लौतु भो कि तुं मन अन्तर बुराई एईए, होर तुस परमेश्वर पुठ शक कर कइ तेस जीन्ता परमेश्वर केआं दूर भोई घियेल।

¹³ बल्कि पापे जाल अन्तर फस कइ अपफ नकठर भुण केआं बचुण जे, जपल तकर “आजकण रोज” असा, तुस रोज के यकी होरी जे विश्वास अन्तर हिम्मत देन्ते रिहे।

¹⁴ किस कि अगर अस यीशु मसीह पुठ अखिर तकर अपु शुरुवाती भरोसा जुए बिश्ते त अस तेस जुए हेस्सेदार बणते।

¹⁵ किस कि धरमे कताब अन्तर लिखो असु, “अगर आज तुस तसे बोक शुणियेल, त परमेश्वर बोता कि ‘तुस अपु अपु मन नकठर ना करे, जीं तुं पुरखी में खिलाफ किओ थिआ।’”

¹⁶ बोले त धिक, से कोउं थिए, जे परमेश्वरे बोक शुण कइ बि तसे खिलाफ भुए? से सेईंए थिए जे मूसे जुए मिस्र देश छड़ दी कइ अओ थिए?

¹⁷ होर, केस जुए परमेश्वर 40 साल तकर लेहरी कइ बिशा? से तेन्हि जे लेहरिआ, जेन्हि पाप किओ थिए त से अरुणि धार अन्तर मर गे।

¹⁸ होर परमेश्वरे केन्के बारे सोह किओ थिए कि “अउं अन्हि मेह्‍णु अपु टांक तकर न पुजान्ता”? से सेईंए मेह्‍णु थिए, जेन्हि तसे निआंग ना मनी।

¹⁹ त अस हेरते कि सेईंए मेह्‍णु अपु अविश्वासे बझई जोई तसे टांक तकर ना पूज बटे।