इब्रानी 11 - Walangi

विश्वासे उगाही ( 11:1-40 ) विश्वासे सही मतलब

¹ त ट्यारेओ! विश्वास की भो? विश्वास तेन्हि चीजी के मेणे पक्का यकीन भो, जेन्के बारे हें उम्मीद असी, होर तेन्हि चीजी के पक्कु बिझिण, जे असी कदी नेईं काओ।

² इहांणि विश्वास करणे बेलि ईं हें पुरखे परमेश्वर औउजो थिए।

³ ए विश्वास ईं असा, जेसे बेलि अस जाणते कि पूरी धरती त भुमण परमेश्वरे वचने बेलि बणो असा। ईं नेईं कि सोब चीज, केणे बाड़ी चीजे बेलि बणो असी।

हाबिल, हनोक, त नूहे विश्वास

⁴ परमेश्वर पुठ अपु ईं विश्वासे बेलि ईं हाबिले अपु भाई कैन केआं बि अब्बल भकत चढ़ाई। होर परमेश्वरे तसे विश्वासे बझई जुए ईं तस जे धर्मी बोलु त तसे भकत नी छइ। हाबिल त मर गा, पर तसे विश्वास यक नमूना बण कइ असी शिचालता।

⁵ एसे विश्वासे बेलि परमेश्वरे हनोक अपफ जुए साते नी छड़ा। “से होर कोठि न मेआ, किस कि परमेश्वरे से नी छो थिआ।” धरमे कताब बोती कि परमेश्वर तस नेण केआं पेहलाई “तेन परमेश्वर खुश कइ छो थिआ।”

⁶ किस कि विश्वास करण छड़ दी कइ कोई बि कदी परमेश्वर खुश कइ न बटता। जे कोउं परमेश्वरे भेएड़ एण चहन्ता, तस पेहलाई विश्वास करण कि परमेश्वर असा। होर से तेन्हि मेह्‍णु के भलाई कता, जेन्के ध्यान तस पुठ असा।

⁷ त विश्वास करणे बेलि ईं नूहे, जे कदी भुओरी नेओथ, तेस बाढ़े बारे परमेश्वरे चेताओ बोक मनी त तस हेर डर कइ अपु टब्बर बचाण जे यक बोडा पाणि जहाज बणा। ईं करणे बेलि तेन मतोके मेह्‍णु पुठ परमेश्वरे बोक ना मानणे दोष ला। किस कि तेन परमेश्वरे बोकी पुठ विश्वास किओ थिआ, परमेश्वरे से धर्मी मान कइ तसे धे अपु जुबान दिती।

अब्राहम, इसहाक, याकूब त यूसुफे विश्वास

⁸ विश्वास कर कइ ईं अब्राहम तेस देश घेण जे अपु गीहा नशा, जेस देश देणे परमेश्वरे तसे धे जुबान दुतो थी। तिखेईं तस कुछ पता नेओथ कि से को जे गो असा, तोउं बि गा।

⁹ विश्वासे बेलि ईं से तेस जुबाने देश अन्तर यक परदेशी ईं डेरा लाई कइ बिशा। तढ़िया पता तसे कुआ इसहाक त पौतुर याकूब जमा जे कि तेस जुबानी हकदार थिए।

¹⁰ किस कि से तेस अमर शेहर भाड़ण लगो थिआ, जेस बणाणे बाड़ा त मिस्त्री परमेश्वर अपफ भो।

¹¹ विश्वासे बेलि अब्राहमे जुएली सारा शन्हि भोई कइ बि गभुरवाल भुई। किस कि तेस विश्वास थिआ कि जेन जुबान दुतो असी, से परमेश्वर सच्चा असा।

¹² तोउं त यके मेह्‍णु केईआं जे अत स्याणा थिआ कि ची पुठ घेणे भोई गो थिआ, तोउं बि तेस अम्बरे तारी त समन्दरे रेते ईं अणगणे गभुर भुए।

¹³ ए सोब मेह्‍णु अपु मन अन्तर विश्वास रख कइ मर गे। परमेश्वरे तेन्के धे जे जुबान दुतो थी, तेन्हि से न मेई। पर तेन्हि से बस दूरे ईं केईआं काई त बोडे खुशी जुए तेन्के आबिश किआ। त तेन्हि मनु कि से इस धरती पुठ परदेशी त मेहमानी के ईं असे।

¹⁴ जे मेह्‍णु ईं बोते, से साफ साफ हरालते कि तेन्हि अपु देशे उम्मीद असी।

¹⁵ होर जेस देश केईआं से एई गो थिए, अगर से तेसे बारे सोचतेथ त तेन्हि केईं मौका थिआ कि से वापस घेई बटतेथ।

¹⁶ पर सच्चाई त ई असी कि तेन्हि यक सुआ अब्बल देशे मतलब स्वर्ग अन्तरी देशे उम्मीद थी। तोउं त परमेश्वर तेन्हि मेह्‍णु के परमेश्वर बोलुण केईआं न लजेईन्‍ता, किस कि परमेश्वरे तेन्हि मेह्‍णु जे यक शेहर बड़ो असा।

¹⁷ जपल परमेश्वरे अब्राहम परखा त तेन अपु इकलौता कुआ इसहाके भकत देण लाई छड़ी, किस कि तसे विश्वास थिआ कि परमेश्वरे दुतो जुबान जरूर पूरी भुन्ति।

¹⁸ बेशक परमेश्वरे तेस जे बोलो थिउ कि “इसहाके बेलिए तें वंश चलता” तोउं बि से अपु इकलौते कोईया भकत देण जे तेयार थिआ।

¹⁹ किस कि से मानताथ कि परमेश्वर शक्तिशाली असा, जे मुड़दी अन्तरा बि जीआन्ता। तोउं त, अब्राहम फि इसहाक जीन्ता वापस मेई गा, जीं मुड़दी अन्तरा। ए भविष्य जे यक नमूना थिआ।

²⁰ परमेश्वर पुठ एसे विश्वासे बेलि ईं इसहाक अपु दुई कुआ याकूब त एसाव जे भविष्य बारे अशुश दिती।

²¹ एसे विश्वासे बेलि ईं याकूब जपल स्याणा भुआ त यूसुफे दुई कुआ जे अशुश दिती त अपु लेउडी साहारे उनकुशी कइ परमेश्वरे पूजा अराधना की।

²² त परमेश्वर पुठ एसे विश्वासे बेलि ईं मरुण केआं पेहले यूसुफ इस्राएले मेह्‍णु जुए मिस्र देश केआं घेणे बारे बोक विचार की त तेन्हि तसे हड अपफ जुए अपु देश नेण जे निआंग दिती।

मूसे विश्वास

²³ पता, एसे विश्वासे बेलि ईं मूसे ईये बोउए तस जमुण केआं बाद टाई मेहने तकर नियोकइ कइ रखा। तेन्हि हेरु कि मूसा यक खास गभुर भो, त से इस्राएले मठ मठ कोयी मारणे राजे निआंग टोड़ुण केआं बि ना डरे।

²⁴ एसे विश्वासे बेलि ईं मूसे मिस्र देशे राजकुमारी बेलिए पाड़णे केआं बाद बि बोडा भोई कइ तसे कुआ बोलीण केआं मुकीर गा।

²⁵ त इस मतोक केआं मेणे बाड़ी कुछ घड़ी सुखे बंटि, तेन परमेश्वरे चुणो इस्राएली मेह्‍णु जुए भुंजुण सीढ़ुण खरु समझु।

²⁶ मिस्र देशे सम्हाई अमीरी के सुख केआं ज्यादा मसीह जे दुख सेहण तस खरु लगु, किस कि तेन तस मेणे बाड़ी ईनाम पुठ मन लओ थिआ।

²⁷ एसे विश्वासे बेलि ईं से मिस्र देशे राजे लेहेर हेर ना डर कइ इस्राएले सम्हाई मेह्‍णु जुए मिस्र देश केआं नश गा। तेन लाह रख कइ सोब कुछ सीढ़ु, जीं कि तेन यक ना केणे बाड़े परमेश्वर काओ असा।

²⁸ एसे विश्वासे बेलि ईं तेन इस्राएले मेह्‍णु जे बचणे त्योहार मनाण त बरिह्ड़ु किएऊ छिएड़ु के लहु अपु अपु दुआर पुठ छीट फटाण जे बोलु, ताकि जे स्वर्गेदूत मिस्र देशे जेठे जेठे कोयी मारण जे अओ थिआ, से इस्राएल मेह्‍णु के जेठे कोयी ना माराल।

²⁹ एसे विश्वासे बेलि ईं इस्राएले मेह्‍णु लाल नओएं समन्दर पुठ ईं हंट कइ पार भोई गे, जीं से शुकी जिमि पुठ हंटो थिए। पर जिखेईं मिस्र देशे सपाही पार घेण लगे त से सम्हाई पाण अन्तर डूब गे।

³⁰ एसे विश्वासे बेलि ईं इस्राएले मेह्‍णु यरीहो शेहरे चोहरो कना सत रोज तकर फेरे लान्ते रिहे त अखिर अन्तर शेहरे चोहरो कनारी भिथि उपीड़ गई।

³¹ एसे विश्वासे बेलि ईं राहाब वेश्या इस्राएले तेन्हि जासुसी के मदत की। तोउं त से यरीहो शेहरे तेन्हि मेह्‍णु जुए खतम ना भुई, जे परमेश्वरे केहणा न मानतेथ।

होरे सुआ जेईं के विश्वास

³² अब होरु कि बोलुण? किस कि मोउं केईं एत टेम नेईं कि अउं गिदोने, बाराके, शिमशोने, यिफतहे, राजा दाऊदे, शामुयेले त होरे भविष्य वक्ती के बारे सोब बताई बटुं।

³³ ई मेह्‍णु विश्वासे बेलिए ईं बोडे बोडे राज्य जीते, हर यक कम धरम जोई किए, होर परमेश्वरे जेन्हि चीजी देणे जुबान दुतो थी, तेन्हि से मेई, त से सिंह राजे केआं बि बच कइ निस गे।

³⁴ ई मेह्‍णु विश्वासे बेलिए ईं आगी लपटी त तलवारी धार केआं बच गे। कमजोर से ताकतवर बण गे, लड़ाई अन्तर वीर बण गे, परदेशी के फौजे मार मार कइ नशाण छइ।

³⁵ विश्वासे बेलिए ईं जिल्हाणु अपु मरो से फि दुबारी जीन्ते मेई गे। होर कत त मार खाई खाई मर गे, फि बि तेन्हि अपु विश्वास छड़ ना दिता, ताकि से दुबारी जी कइ अब्बल जगाई हेस्सेदार बणियेल।

³⁶ विश्वासे बझई जुए केहि जेईं के सुआ हसाड़ बणा। केहि जेईं चाबुके बइ मार खाए, शंकीड़ी बइ बन्हि कइ जेहेल अन्तर कैद भुए।

³⁷ केहि मेह्‍णु घोड़िआ खाई खाई के मर गे। केहि मेह्‍णु आरे बइ चीरिए, त केहि तलवारी बेलि कटी कइ मर गे। से गरीब थिए। से मेह्‍णु भुंजाए त तेन्हि जुए बुरु बुरु किउ। से ढडुड़ बकीर के छोड़ लपेट कइ, इएर-ओवर मरते डूलते भटकते रिहे।

³⁸ तेन्हि अरुणि धार, फाटी, कुडी अन्तर त धरती खोपरी अन्तर दन कटण ए, किस कि ए मतोक तेन्के लेएक न थिआ।

³⁹ होर विश्वासे बेलिए ईं परमेश्वरे तेन्हि हेर खुश भुआ। पर तोउं बि तेन्हि से सम्हाई ना मेउ, जेन्के जुबान परमेश्वरे तेन्के धे दुतो थी।

⁴⁰ किस कि परमेश्वरे हें ध्यान रख कइ यक खरी योजना बणो थी। से चहन्ताथ कि से असी जोई मी कइ तसे इच्छाई मुताविक सिद्ध बणियेल।