इब्रानी 1 - Walangi

यीशु, परमेश्वरे यकी दुई ( 1:1-4 ) यीशु बेलि परमेश्वर असी जुए बोके करीण

¹ ए ट्यारेओ, पेहले पेहले परमेश्वरे सुआ लिंग, अलग अलग तरीके जुए अपु भविष्य वक्ती के बेलि हें पुरखी जुए बोके की।

² पर अखिर अन्तर तेन अपु कुआ यीशु बेलिए असी जुएई बोके किओ असी। तसे कुआ सोबी चीजी के हकदार असा त तसेरी बेलि परमेश्वरे सम्हाई कुछ बणाउ।

³ सेईंए कुआ परमेश्वरे गुणे त सभावे यकी दुई असा, त से तसे पूरी महिमाईं बेलि चिलकता। से अपु बोकी के ताकते बेलि पूरा भुमण सुसुर रखता। होर, जपल तेन मेह्‍णु के पाप माफ करणे बथ बणाई छड़ी त से घेई कइ परमेश्वरे देहणा कना, बोडे इज्जते बाड़ी तेस जगाई बिशा।

⁴ त जिहांणि परमेश्वरे तसे धे सोबी स्वर्गेदूती के नओं केआं खास नओं दुतो असु, तिहांणि से सोबी स्वर्गेदूती केआं सुआ बोडा बणा।

यीशु, स्वर्गेदूती केईआं बि बोडा ( 1:4—2:18 ) यीशु स्वर्गेदूती केआं बि बोडा

⁵ किस कि स्वर्गेदूती बिचा, परमेश्वर कि कदी केसे जे बोलो असु ना कि “आज अउं तें बारे ई घोषणा कता कि तु में कुआ भो, होर अउं तें बोउ भो?” होर ई कि “अउं तसे बोउ त से में कुआ बोलिन्ता?”

⁶ होर शुणे, जपल परमेश्वरे अपु इकलौता कुआ यीशु इस मतोक जे लंघा त ईं बोलु कि “ए में सोब स्वर्गेदूतों! तुस एसे पूजा अराधना करे।”

⁷ बल्कि, स्वर्गेदूती के बारे परमेश्वरे ई बोलु, “अपु सेवक स्वर्गेदूती अउं ब्यारे ईं, त आगे टहनु ईं बणान्ता।”

⁸ पर अपु कुआ यीशु बारे से ई बोता कि “तु परमेश्वर भो, तें सिंहासन जुग जुग तकर भुन्ता; त तें राज, न्याय त धरमे राज भुन्ता।

⁹ जे धरम त न्याय जुए जीन्ते, तुसी तेन्हि जुए परेम किआ, पर जे अन्याय त बुराई कते, तेन्हि हेर नफरत की। तोउं त, अउं तें परमेश्वर, मेईं तु होरे सोबी बिचा चुणो असा, त तोउ मुकुट लोओ असा कि तु खुशी मनाल।”

¹⁰ त ई बि बोता कि “ए प्रभु, शुरुवात अन्तर तेईं धरती बणाई, होर अपु हथे बइ तेईं स्वर्ग बणा।

¹¹ से त मुक घेन्ते, पर तु ना मुकता; से झिणि के ईं छीन्छ भोई घेन्ते;

¹² तु तेन्हि चादुर ईं बेहड़ छता। तु तेन्हि झिणि के ईं खोल छता। पर तु हमेशा सेईंया असा, होर तु जुग जुग तकर जीन्ता।”

¹³ पर तेन कदी केस स्वर्गेदूत जे ना बोलु कि “जोउं तकर अउं तें दुश्माणी तें खुर पड्डे ना छइ छउं, तोउं तकर तु में सुमले कना बिश”।

¹⁴ त स्वर्गेदूत कोउं भिन्थ? स्वर्गेदूत परमेश्वरे लंघो आत्मा भो। से परमेश्वरे त तेन्हि मेह्‍णु के सेवा कते, जेन्हि बचाण जे परमेश्वरे ठीक किओ असु।