गलाती 6 - Walangi

यक होरी मदत करे

¹ ए भाई त भेणिओं! फि बि अगर तुसी बुचा कोउं जेईं केस पाप अन्तर फसी गो असे त तुस जे नोउएं गुणे बेलि जीन्ते, तस बोडे अराम जुए समझाई कइ दुबारी विश्वासे जीण अन्तर मजबूत करे। तुस सद तसे ध्यान ना रखे, बल्कि अपु बि ध्यान रखे, ना त तुस बि तेस जाल अन्तर फस घेन्ते।

² परेशानी त कष्ट अन्तर तुस यकी होरी मदत करे। ई करणे बेलि तुस मसीहे शिक्षाई हेसाब जुए जी सकते।

³ अगर कोउं अपफ जे बोडा समझता, पर असल अन्तर नेईं, त से अपफ धोखा देन्ता।

⁴ पर हर यक जेईं अपु अपु कम परखुण जरूरी असु, ताकि से होरी के कम हेर कइ ना, पर अपु कम हेर कइ खुश भुई घियेल त पूरे सच्चाई जुए रोभ किढ़ बटियेल।

⁵ किस कि सोबी अपु अपु कमे जिम्मेबारी नेणे जरूरी असी।

⁶ ए ठीक भुन्तु कि जे तुसी परमेश्वरे वचने शिक्षा देन्ते, तुस तेन्के हर किस्मे मदत करे।

⁷ ई ना समझे कि तुस परमेश्वरे मखोल बणाई कइ बच घेन्ते; किस कि साचे बुढ़े जिआणु सोबी जे असु।

⁸ जे अपु जिसमे इच्छा पूरा करणे बिएजु बांता, से तसे फल कमजोरी त मरण कटता, त जे शुची आत्माई खुश करणे कमे बिएजु बांता, से तेस आत्माई बेलि अमर जीवन पान्ता।

⁹ त, चले! खरे कम करुण जे हिम्मत ना हारते। अगर अस हिम्मत ना हार कइ खरे कम कते रेहन्ते त सुसुर टेम पुठ परमेश्वर असी खरी ईनाम देन्ता।

¹⁰ तोउं त, जपल असी मौका मेओ असा, चले, सोबी जे भलाई कते, खास कइ तेन्हि जे, जे विश्वास अन्तर हें टब्बरे ईं असे।

अखिर शिक्षा त नमस्कार

¹¹ हेरे, मेईं कीं बोडे बोडे अखर अपु हथे बइ लिखो असे।

¹² जे तुसी खतना करण जे जोर देन्ते, से सद अपु नओं कमाण चहन्ते कि तेन कत मेह्‍णु के खतना कराई छड़ा। त से ना चहन्ते कि मसीह पुठ विश्वास करणे बझई जुए तेन्के यहूदी साथी तेन्हि भुंजाल।

¹³ ए खतना कराणे बाड़े अपफ त मूसे दुतो सम्हाई नियम ना मानते, पर से चहन्ते कि तुस नियम मान कइ अपु खतना करे, ताकि तुं जिसमे खतने बझई जुए से रोभ किढ़ बटियेल।

¹⁴ पर ईं कदी ना भुई सकतु कि अउं मसीह यीशु क्रूस पुठ किओ कम छड़ दी कइ किछ होरे पुठ रोभ किढ़ाल। एस बझई जुए त मतोक अब मोउं वश अन्तर कइ ना सकतु त में बि मतोके कोई कम करणे इच्छा नेईं।

¹⁵ किस कि ई जरूरी नेईं कि केसे खतना भो असा, या नेईं भो। पर जरूरी असु कि से मसीहे दुतो नोउएं गुणे बेलि जी कइ नोई सृष्टि भो।

¹⁶ त जत मेह्‍णु ई बोक मान कइ जीन्ते, से परमेश्वरे सच्चे गभुर बणते त परमेश्वरे शान्ति त दाह तेन्हि पुठ भुन्ति रेहन्ती

¹⁷ छने, मोउं हउ परेशान ना करे। पर हेरे कि मसीह यीशु जे में जिसम पुठ कत निशाण लगो असे।

¹⁸ में ट्यारे भाई त भेणिओं! हें प्रभु यीशु मसीहे कृपादृष्टि तुसी पुठ भुन्ति रिहे। आमीन।