गलाती 3 - Walangi

नियम त मसीह पुठ विश्वास

¹ ए गलाती इलाके भाई त भेणिओं! तुस सुआ वेबखुफ असे। तुस त असी यीशु मसीहे क्रूस पुठ मरणे बारे तीं खरे कइ शिचालो थिए त तुस केन खाई छड़े?

² मोउं बस एतरा पता लाण असा कि शुची आत्मा तुसी नियम मानणे बेलि मेओ थी ना विश्वास करणे बेलि?

³ तुं बुद्धि भ्रष्ट भोई गो असी ना जे तुस शुची आत्माई बेलि अपु बचणे कम शुरु कर कइ, अपु कोशिशे बेलि तस पूरा करण चहन्ते?

⁴ मसीह पुठ विश्वास करण जे, जे कष्ट तुसी सेहा, से कि सोब बेकार थिआ ना? कदी ना।

⁵ त जे तुं धे शुची आत्मा देन्ता त तुं बुच चमत्कारे कम कता, से तुसी नियम मानणे बेलि देन्ता ना, विश्वास जुए खुश खबरी शुणणे बेलि। आं?

⁶ धिक, अब्राहम त याद करे! अब्राहमे परमेश्वर पुठ विश्वास किआ त तसे विश्वासे बेलि ईं से परमेश्वरे धर्मी मना।

⁷ तोउं त जे परमेश्वर पुठ विश्वास कते, सेईंए ईं अब्राहमे सच्चे गभुर असे। इ बोक तुस जाण रखे।

⁸ त धरमे कताब अन्तर बि सुआ साल केआं पेहले ईं लिखो असु कि परमेश्वर विश्वासे बेलि ईं गैर यहूदी धर्मी बणान्ता। परमेश्वर ई खुश खबरी अब्राहम जे तपल शुणाई जपल तेन बोलु “तें बेलि सम्हाई जाति अशुश मेती”

⁹ तोउं त, जे बि अब्राहमे ईं परमेश्वर पुठ विश्वास कता, तस अब्राहमे सम्हाई अशुश मेती।

¹⁰ पर जतर जेईं बि नियम पुठ भरोसा कर कइ परमेश्वरे अगर धर्मी बणणे कोशिश कते, तेन्हि सम्हाई जेईं शराप लगो असा। धरमे कताब अन्तर बि लिखो असु कि “जेनि बि परमेश्वरे नियमे कताब अन्तर जे जे बि नियम लिखो असे, तस सम्हाई मान कइ ना जीन्ते, तेन्हि जे शराप लगो असा।”

¹¹ ई बि लिखो असु कि “जे विश्वासे बेलि धर्मी बणो असा, सद सेईंया जीन्ता।” त ई बोक साफ भोई गई कि नियम मानणे बेलि कोई बि मेह्‍णु परमेश्वरे अगर धर्मी ना बण बटता।

¹² पर नियमे त विश्वासे अपफ बुछ कोई लेणादेणा नेईं। किस कि धरमे कताब अन्तर लिखो असु, “जे नियम मानता, से तेन्हि नियमे बेलि जीन्ता।”

¹³ मसीहे हें सम्हाई शराप अपफ पुठ नी कइ, नियमे जे शक्ति असी पुठ थी, से नाकाम कर कइ अस अजाद कइ छड़े। किस कि धरमे कताब ईं बि बोती कि “जे कोउं बुटे पुठ ढनाई घेन्ता, तेस पुठ शराप असा।”

¹⁴ ए इस बझई जोई भु कि अब्राहमे अशुश मसीह यीशु बेलि हर यक जाति मेह्‍णु तकर पुजे त जेस शुची आत्मा देणे परमेश्वरे जुबान दुतो थी से असी विश्वासे बेलि मेईंयेल।

मूसा दुतो नियम त परमेश्वरे जुबान

¹⁵ ए ट्यारेओ! अउं तुसी जे यक गल कता: केस दुई जेईं के छक ना खाण तकर तेन्हि दुई टब्बरी के जुबान पक्की ना भुन्ति। पर छक खाणे बेलि तेन्के जुबान पक्की भोई घेन्ति त तेन्हि बिचा कोई बि तस बदल ना बटता।

¹⁶ तिहांणि, परमेश्वरे अब्राहम त तसे गभुर कें धे जुबान दुतो थी। धरमे कताब ई ना बोती कि “तें सम्हाई गभुर जे” बल्कि ई बोती कि “तें यक गभुर जे”, जे कि मसीह भो।

¹⁷ अउं ई समझाण लगो असा कि परमेश्वरे अब्राहम धे, जे जुबान दुतो थी तस 430 सालुं बाद मूसा जे अपु नियम देणे बेलि ना बदल बटता। तीं कताथ त से अपु जुबान टोड़ताथ।

¹⁸ पर परमेश्वरे अब्राहमे धे जुबान दी कइ हकदार बणा। किस कि हकदारी अगर नियमे बेलि मेतीथ त जुबाने कोई बझह नेओथ।

¹⁹ अच्छा! त नियम देणे मतलब की बणा? नियम त इस बझई जोई दुतो असा, ताकि असी पता लगियेल कि अस पापी मेह्‍णु असे। पर ए तपल तकर ईं कम कता, जपल तकर जुबान दुतो हकदार ना एईयाल। किस कि नियम असी बचामी मूसे मदत जुए स्वर्गेदूती बेलि दी गो थिआ।

²⁰ दुई मेह्‍णु बुच ईं त बचामी एई सकता। पर जपल परमेश्वरे अब्राहमे धे अपु जुबान दिती, त से तेन अपफ की।

²¹ त कि मूसे दुतो नियम परमेश्वरे जुबाने खिलाफ असा ना? कदी नेईं! किस कि अगर मूसे दुतो नियम मानणे बेलि अस धर्मी बणतेथ त असी नोउआं जीवन मेई घेन्ताथ।

²² पर, धरमे कताब त ईं बोती कि अस सम्हाई पापे बेलि कैदी भोई गो असे। त परमेश्वर जे जुबान दुतो थी, से सद यीशु मसीह पुठ विश्वास करणे बाड़ी जे विश्वासे बेलि ईं मेती।

²³ पर मसीह एणे त तस पुठ हें विश्वास एणे पेहले असी मूसा दुतो नियमे वश अन्तर बिशुण थिउ, ताकि हें देखभाल तोउं तकर भुन्ति रिहे जोउं तकर से प्रकट ना भुआल।

²⁴ त अखिर भु इ कि मसीह एणे तकर मूसे दुतो नियमी हें देखभाल की त मसीह पुठ विश्वास बेलि धर्मी भुण तकर अस बचाए।

²⁵ पर, किस कि अभेईं मसीह पुठ हें विश्वास एई गो असा त देखभाल करणे बाड़ी के कोई जरूरत नेईं।

मसीह अन्तर परमेश्वरे गभुर बणुण

^26-27 त जेन्हि बि मसीह यीशु पुठ विश्वास कर कइ तस जुए पुओणि अन्तर चुसिए असे, तेन्हि सम्हाई मसीहे दुतो नोउएं गुण झिणि के ईं डबो असे। इस बझई जुए तुस जे मसीह पुठ विश्वास कते सम्हाई अब परमेश्वरे गभुर बणि गो असे।

²⁸ तुं बुच अभेईं ना यहूदी, ना गैर यहूदी; ना गुलाम ना अजाद; होर ना जिल्हाणु नामड़द, कोई फरक नेईं; किस कि यीशु मसीह अन्तर तुस सम्हाई यक भोई गो असे।

²⁹ त अगर तुस मसीह जुए मिओ असे, त तुस अब्राहमे गभुर असे त परमेश्वरे दुतो से जुबान बि तुसी पुठ पूरी भुन्ति।