गलाती 1 - Walangiनमस्कार 1-2 ट्यारे गलाती इलाके यीशु मसीहे सतसंगे, सोबी भाईओ त भेणिओं! अउं पौलुस, त में सम्हाई साथी तुसी जे नमस्कार कते। अउं यीशु मसीहे यक प्रतिनिधि भो। अउं मेह्णु केआं मेओ हके बेलि नेईं, बल्कि यीशु मसीहे त तस मुओ मेह्णु केआं दुबारी जीआणे बाड़ा परमपिता परमेश्वरे दुतो हके बेलि प्रतिनिधि बणो असा। 3 हें परमपिता परमेश्वरे त प्रभु यीशु मसीहे कृपादृष्टि तुसी पुठ भुन्ति रिहे त शान्ति मेती रिहे। आमीन यके खुश खबरी 4 यीशु मसीहे हें पापी के लिए अपफ भकत दिती ताकि हें परमपिता परमेश्वरे इच्छाई मुताविक इस पापी मतोक केआं असी बचाल। 5 तस सुआ कदर त इज्जत जुग जुग मेती रिहे। आमीन 6 ए ट्यारेओ! अउं त टेही गो असा कि जेन खरी दाह जुए तुस मसीह जुए जीण जे भिहो थिए, तेस परमेश्वर केआं तुस एतु झट पिठ खिरकइ कइ कीं परबुद्धि घेण लग गे, जेस जे केहि केहि मेह्णु “खुश खबरी” बोते। 7 पर, ए कोई खुश खबरी नेईं, बल्कि कुछ मेह्णु असे, जे मसीहे खुश खबरी बुमोरण त तुसी धोखा देण चहन्ते। 8 पर तुस समोझि बिशे! तुसी बुच जेस खुश खबरी हें बेलिए प्रचार भो असा, तस छड़ कइ अगर कोई होरा ईं प्रचार करियेल त तस पुठ शराप लगो लौता। चहे अस प्रचार करियेल या चहे स्वर्गेदूत बि करियेल। 9 जीं अस पेहला ईं बोलो थिउ, तीं अभेईं बि बोते कि जे खुश खबरी तुसी पेहलाई मनो थी, तस छड़ कइ अगर कोई होरी खुश खबरी शुणान्ता त तस पुठ शराप लगो लौता। 10 तुसी कि लगतु कि अउं मेह्णु मनाण लगो असा ना? ना परमेश्वर मनाण लगो असा? अउं की मेह्णु खुश करण चहन्ता ना? ना! अगर तीं भुन्तुथ त अउं मसीहे गुलाम ना बणताथ। पौलुस प्रतिनिधि बणुण 11 में ट्यारे भाई त भेणिओं! अउं तुसी बताण चहन्ता कि जे खुश खबरी मेईं तुसी शुणाई, से मेह्णु के बड़ाओ नेओथ। 12 किस कि से मेईं ना मेह्णु केआं शिचि, होर ना मेह्णु केआं मोउं कुछ मेउ। पर यीशु मसीहे अपफ निस कइ अउं शिचाला। 13 तुसी सम्हाई त में पुराणि जिन्दगी बारे पता असा कि मोउं यहूदी धरम जोई कत लगाव थिआ। अउं त पूरे जोश जुए परमेश्वरे सतसंग भुंजान्ताथ त तस मुकाणे चहन्ताथ। 14 यहूदी मेह्णु बुचा, अउं अपु सोउडरी सम्हाई मेह्णु केआं ज्यादा हें बाव-दादुए रीति रिवाज मानणे बाड़ा थिआ। 15-16 पर परमेश्वरे अउं जमुण केईआं पेहलाई चुणो थिआ, त बोडे दाह जुए गैर यहूदी मेह्णु बुच तसे बारे प्रचार करुण जे नियुक्त किआ। त जपल तस सुसुर लगु कि अपु कुआ यीशु मोउं हरालुण, त मेईं तपले ईं होर केसे जुए बि बोक विचार ना किआ, 17 होर ना यरुशलेम शेहर घेई कइ तेन्हि जुए मिआ जे मोउं केआं पेहले प्रभु प्रतिनिधि थिए। पर अउं सद अरब इलाके जे गा। तढ़िया पता अउं दमिश्क शेहर जे पैटा। 18 त टाई साल पता, अउं यरुशलेम शेहर जे गा ताकि पतरस जुए बाकम भोल। त तस जुए कोई पंद्राह रोज तकर बिशा। 19 तपल मोउं प्रभु यीशु भाई याकूब छड़ कइ होर कोई प्रतिनिधि ना मेईंया। 20 ई जे बोक अउं लिखुण लगो असा, ए झूठ नेईं। परमेश्वर में उगाह असा। 21 तढ़िया पता, अउं सीरिया त किलिकिया इलाके जे गा। 22 इस बुच, यहूदिया राज्य अन्तर जे मसीहे विश्वासी थिए, तेन्हि अउं कदी ना का। 23 पर से में बारे त शुणते रेहन्तेथ कि “जे असी पेहले भुंजान्ताथ, से एचेल हें विश्वासे खुश खबरी प्रचार करण लगो असा।” 24 त से सम्हाई परमेश्वरे धन्यवाद त महिमा कतेथ कि तेन अउं चुणा। |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.