इफिसुस 5 - Walangi

टगड़ियारी गभुर भुण

¹ ट्यारे भाई त भेणिओं! किस कि तुस परमेश्वरे ट्यारे गभुर भिन्थ, त तसे गुणे हेसाब जुए जीण दिए।

² जीं मसीहे किओ थिउ, तीं तुस बि अपु जीण अन्तर होरी जे परेम हराले। तेन असी जोई परेम किआ, त जेन भकती बइ परमेश्वर खुश भोई घेन्ता, अपफ तीं यक अब्बल भकत बण कइ से असी जे चढ़िआ।

³ तोउं त जीं शुचे मेह्‍णु लेएक असा, तीं जीए। नाजायज रिश्ता रखणे, बेशरम कम करणे, त होरी लालच करणे त दूर, एन्के बारे बोक करण जे बि तुस अपफ बुच कोई बझह न रखे।

⁴ तुसी बुच ना कोई गन्दे लब्ज, ना मुर्खी के बोक, होर ना बेशर्मे हसी मजाक भुण लौते, किस कि ए सोब तुसी जुए ना जचतु। पर तुसी बुच परमेश्वरे धन्यवाद बोक भुओ लौती।

⁵ ई तुस जाण रखे कि जे गलत तरीके जुए जिसमे संमंध रखते, जे बेशरम कम कते त जे होरी लालच कते, से मुर्ति पुजणे बाड़े के ईं परमेश्वर छड़ दी कइ होरी चीजी के पता घेन्ते। मसीहे त परमेश्वरे राज्य अन्तर एन्हि मेह्‍णु के लिए कोई बांट नेईं।

⁶ हेरी बिशे, एन्के बारे अपु शिक्षा बेलि कोई तुसी धोखा ना दियेल। किस की इन्हि बझई जुए ईं परमेश्वरे सज्जा तेन्हि पुठ एन्ती जे तसे निआंग ना मानते।

⁷ तोउं त, तुस तेन्हि जुए ना घिए।

⁸ किस कि पेहले तुस बजन परमेश्वरे अन्हारु अन्तर जीन्तेथ, पर अभेईं परमेश्वरे भेएड़ एणे बेलि तुस टगड़ियारे ईं भोई गो असे। त जे टगड़ियार अन्तर बिश्ते, तेन्के ईं जीण दिए।

^9-10 त प्रभु जी जीं औजतु, तीं जी कइ हरालिण दिए, किस कि जे टगड़ियार अन्तर बिश्ते, से हमेशा अब्बल कम कते, सुसुर बिश्ते त सच्चाई बोते।

¹¹ त अन्हारे अन्तर बिशणे बाड़ी के कम, जेसे बेलि मेह्‍णु कोई भलाई ना भुन्ति, तस केआं तुस दूर बिशे, बल्कि तेन्के बुराई अपु टगड़ियारी बेलि हराली छड़।

¹² किस कि अन्हारे अन्तर से जे नियको कम कते, तस बारे बोक करणे जे बि लज एन्ती।

¹³ पर जपल टगड़ियार एन्ती, त तेन्के सम्हाई नियको कम सोबी नजर एन्ते

¹⁴ किस कि टगड़ियारी बेलि सम्हाई कुछ केई घेन्तु। तोउं त ईं बोते “उंघणे बाड़िआ, भो खड़, मारो मेह्‍णुआ, दुबारी जीण दे। ताकि मसीहे टगड़ियार तोउ पुठ चिलकियेल।”

¹⁵ तोउं त, अपु जीणे तरीके पुठ नजर रखे। मुर्खी के ईं ना जीण, पर समझदारी के ईं जीण।

¹⁶ हर मौके पुठ भलाई करणे कोशिश करे, किस कि बुराई करण जे इस टेम सुआ जेईं असे।

¹⁷ तोउं त परमेश्वरे इच्छा की असी, तस सुसुर समझीण दिए ताकि मुर्ख ना बणियेल।

¹⁸ त अराख पी पी अपु जिन्‍दगी खराब ना करे, पर शुची आत्माई मदते बेलि अपु जिन्‍दगी कटे।

¹⁹ तुस जपल यक होरी जुए मीते, त भजन, होर शुची आत्माई दुतो छुआंरी बेलि त घुरेई लाई कइ यक होरी हिम्मत दिए। मन अन्तर प्रभु यीशु जे घीत लाए।

²⁰ सम्हाई चीजे बारे, हर बेले हें प्रभु यीशु मसीह नओं पुठ परमपिता परमेश्वर जे धन्यवाद दिए।

²¹ त मसीह इज्जत देणे खातिर यक होरी वश अन्तर बिशे।

धाणि जुएली

²² ए जिल्हाणुओ! तुस जीं मसीह अन्तर बिश्ति, तीं अपु अपु धाणि वश अन्तर बिशे।

²³ किस कि जीं मसीह अपु जिसम सतसंगे मगिर भो त तस बचाणे बाड़ा भो, तीं धाणि बि अपु जुएली मगिर भो।

²⁴ त जीं सतसंग मसीहे वश अन्तर बिश्ता, तीं तुस बि हर चीज अन्तर अपु अपु धाणि वश अन्तर बिशे।

²⁵ ए मेह्‍णुओ! जीं मसीहे सतसंग जुए परेम किआ, तिहांणि तुस बि अपु अपु जुएली जोई परेम करे। तस सतसंग जे अस असे, असी बचाण जे से अपफ भकत चढ़ा।

²⁶ त अपु वचने बेलि अस पाणि ईं धुई कइ साफ कर कइ शुचे किए।

²⁷ तेन ई इस बझई जुए किउ ताकि असी अपफ जे यक ईं दुल्हन बणाए, जेस केईं ना कोई दाग धब्बे, त ना कोई खराबी भोल। पर, से शुचा त अब्बल भोल।

^28-30 कोई बि अपु जिसम जुओई दुश्माणी न बरतता, बल्कि तसे देखभाल कता। त किस की अस मसीहे जिसम सतसंगे अंग भो, से बि तिहांणि सतसंगे ख्याल रखता। त धाणि अपु जुएली बि ईं ख्याल रखण जरूरी असा, जीं से अपु जिसमे ख्याल रखता। किस की जे अपु जुएली देखभाल कता, से अपु देखभाल कता।

³¹ धरमे कताब बि बोती, “इस बझई जोई, जपल यक मेह्‍णु जुएली रखता, से अपु ईया बोउ केआं बखी कइ अपु जुएली जुए जुड़ता। त से दुहे मी कइ यक बणते।”

³² ए बोडी नियोको बोक असी। में हिसाब जुए मसीह त सतसंग कीं यक असे, तसे बारे ए यक नमूना भो।

³³ तोउं बि, तुस सम्हाई अपु अपु जुएली ईं ख्याल रखे जीं तुस अपु रखते। त सम्हाई जिल्हाणु अपु अपु धाणि इज्जत करो लौती।