इफिसुस 3 - Walangi

गैर यहूदी बुच पौलुसे सेवा

¹ में ट्यारे भाई त भेणिओं! मसीह यीशु बारे उगाही देणे बझई जुए ईं अउं पौलुस तुं लिए कैदी भुओ असा।

² तुसी जरूर पता भोल कि तुं भलाई लिए परमेश्वरे दाह करणे खबर तुसी बुच प्रचार करणे जिम्मा मोउं मेओ असा।

³ से नियोको सच्चाई प्रभु अपफ निस कइ मोउं जे बोली, जेसे बारे मेईं अगर बि लिखो असु।

⁴ अगर तुस में चिट्ठि पढ़ते त मसीह अन्तर जे नियोको सच्चाई असी, जेस अउं जाणता, तस तुस बि समझ घेन्ते।

⁵ परमेश्वरे ई नियको सच्चाई होर जुगे मेह्‍णु कें धे नेओथ दुतो, पर अभेईं परमेश्वरे आत्माई शुचे प्रतिनिधि त भविष्य वक्ती जे बोलो असु।

⁶ नियको सच्चाई ई असी कि खुश खबरी बेलि यीशु मसीह अन्तर गैर यहूदी बि परमेश्वरे हकदार बण गो असे त यक जिसमे त परमेश्वरे जुबाने हकदार असे।

⁷ त परमेश्वरे दाह जुए जे दान मोउं मेओ असा, तसे शक्ति जुए अउं तेस खुश खबरी प्रचार करणे बाड़ा बणो असा।

⁸ सोबी शुचा मेह्‍णु के अगर में किछ औकात नेईं। तोउं बि परमेश्वरे मोउं पुठ इ दाह की कि अउं मसीह अन्तर जे बेहिसाब अमीरी असी, तेसे खुश खबरी गैर यहूदी शुणान्ता।

⁹ त सोबी मेह्‍णु के अगर धरती बणुण केईआं जे नियोको बोके सोब बणाणे बाड़ा परमेश्वर बारे असी, तसे राज खोलुण,

¹⁰ ताकि सतसंग बेलि परमेश्वरे हर यक ज्ञान अम्बरे मुखिया त अधिकारी अगर हरालियेल।

¹¹ ई सोब तसे तेस अमर योजनाई हेसाब जुए भु, जे तेन हें प्रभु यीशु मसीह अन्तर पूरी किओ थी।

¹² इस मसीह पुठ विश्वास करणे बेलि त तस जुए मीणे बेलि अब अस पूरे हिम्मत त उम्मीद जुए परमेश्वर अगर घेई बटते।

¹³ तुसी जे, जे कष्ट अउं सेहन्ता, एसेरी बेलि तुं फायदा भुन्ता। त अउं हथ जोड़ता कि तुस अपु हिम्मत ना छड़े।

हें लिए मसीहे परेम

^14-15 तोउं त, जेस केईआं स्वर्गे त धरती हर यक बणो असे, तेस बोउ परमपिता अगर अउं प्रार्थना कता

¹⁶ कि से अपु बेहिसाब अमीरी केआं अपु आत्माई बेलि तुं मन ताकत जुए भरे।

¹⁷ तोउं मसीह पुठ विश्वास अन्तर तुस बस घियेल।

^18-19 तुस त होरे सोब विश्वासी मसीहे परेम अन्तर सीरे टाए त बस घिए, ताकि तुसी ई बिझयेल कि तेसे परेम कत खड़िया, कत डुघा, कत लम्मा त कत बोडा असा, जे कि समझ अन्तर ना एन्ता। एसे बेलि परमेश्वरे ज्ञान जुए भरी कइ तुं गुण तसे ईं बणियेल।

^20-21 अभेईं तसे सतसंगे बेलि त यीशु मसीहे बेलि तेस परमेश्वरे महिमा जुग जुग भुओ लौती। अभेईं, जे ताकतवर असा त जे अपु शक्ति जुए असी अन्तर कम कता, जे हें मगण केआं त सोचुण केआं बि तीं ज्यादा कम कता, तेस परमेश्वरे महिमा भुओ लौती। आमीन!