इफिसुस 2 - Walangi

मसीहे बेलि जीण

¹ यक टेम थिआ, तुस सम्हाई अपु अपु पाप त गलत कमे बझई जोई जमीर गो थिए, पर तेन तुस बि दुबारी जीए।

² तुस पेहले इस धरती हिसाब जुए, त अम्बरे पुठे राज करणे बाड़ा मतलब से दुष्ट आत्मा शैताने इच्छाई हेसाब जुए जीन्तेथ, जे अभेईं बि निआंग ना मानणे बाड़ी के अन्तर कम कती।

³ अस बि पेहले अपु अपु जिसमे इच्छाई जुए जीन्तेथ त अपु मन मर्जी कतेथ त होरे मेह्‍णु ईं हें गुण भुणे बझई जुए असी बि परमेश्वर केआं सज्जा मेण बाड़ी थी।

^4-5 पर किस कि परमेश्वर सुआ दाह कता, होर असी जुओई ती परेम कता, जपल अपु पापे बझई जुए अस जमीर गो थिए, तेन अस तेस दाह जुए बचाओ असे। तेन जीं मसीह दुबारी जीआ, तीं अस बि जीए।

⁶ तेन अस मसीह यीशु जुए जीए, त स्वर्ग अन्तर तस जुए राजगद्दी पुठ बिशाणे,

⁷ ताकि एण बाड़े मतोक अन्तर से हें बेलि हराल बटियाल कि यीशु मसीह अन्तर जे दाह असी जे असी, से कति बोडी असी।

^8-9 किस की विश्वास जुए त परमेश्वरे दाही बेलि तुस बच गो असे। ए तुसी केईआं न भो, होर ना कुछ खरे कमी के बझई जोई भो। पर परमेश्वर कनारा यक दान भो ताकि कोई रोभ ना किढ़ बटियाल।

¹⁰ किस कि अस तसे हथे बणो असे, त जे जे खरे कम करण जे परमेश्वर पेहलाई ठीक किओ थिउ, तस करण जे अस मसीह यीशु जुए मिओ असे।

मिआणे बाड़ा - यीशु मसीह

¹¹ त तुस याद रखे कि जिसमे हिसाब जुए तुस गैर यहूदी थिए। तुसी जे यहूदी मेह्‍णु “बजन खतने बाड़े” बोते। पर से अपु हथे बइ किओ खतना बझई जुए अपफ जे “खतना बाड़े” बोते।

¹² तुस इस्राएली टज केआं बखिए थिए। तुसी जे परमेश्वरे जुबान नेओथ। तुस नराश त बजन ईश्‍वरे थिए, त तपल मसीह केआं दूर थिए।

¹³ पर यीशु मसीह अन्तर जे तुस दूर थिए अभेईं मसीहे लहु बेलिए भेएड़ पुजो असे।

¹⁴ किस कि से हें मिआणे बाड़ा भो, जेन दुहि के बुच लगो भिथ उपाड़ि कइ दुहे जेईं मिआई छड़े।

¹⁵ तेन अपु जिसमे भकत दी कइ तेन्के बुच जे दुश्माणी थी, मतलब विधि विधाने निआंग थी से मुकाई छड़ी, त यहूदी त गैर यहूदी दुहिए अपु अन्तर जोड़ कइ यक नोउआं मनख बणा।

¹⁶ त क्रूस पुठ मर कइ तेन तेन्के सम्हाई दुश्माणी दूर की, होर से यक जिसम बणाई कइ परमेश्वर जुए मिआई छड़े।

¹⁷ तेन एई कइ, तुसी जे, जे परमेश्वर केआं दूर थिए, त तेन्हि जे, जे तसे नीड़े थिए, मेल मिलाप बाड़ी खुश खबरी प्रचार किआ।

¹⁸ किस कि तसे बेलि ईं यहूदी त गैर यहूदी यक आत्मा भोई कइ परमपिता केईं पुजते।

¹⁹ तोउं त अभेईं तुस ना परदेशी, होर ना अणजाण रिहे। पर शुचे मेह्‍णु के अपु भोई कइ साथी बणे त परमेश्वरे ऊड़ी भुए।

^20-21 त प्रतिनिधि त भविष्य वक्ते खाई पुठ तुस जीं परमेश्वरे यक शुचा देहेर बणण लगो असे, जेसे जेठा थम यीशु मसीह अपफ भो।

²² तस पुठ तुस शुची आत्माई बेलि परमेश्वरे गी बणण जे टिगो असे।