कुलोसी 2 - Walangi

¹ में ट्यारेओ, तुसी त लौदीकिया शेहरे विश्वासी मेह्‍णु जे त जेन्हि कदी अउं काओ नेईं तेन्हि सम्हाई विश्वासी जे, अउं कीं सुआ कष्ट कता, तसे बारे अउं चहन्ता कि तुसी पता लगो लौता।

² ताकि तुसी हिम्मत मेईंयेल, त तुं मन अपफ बुच परेम जुए जुड़ घियेल त परमेश्वरे नियको योजना जे मसीह अपफ भो, तसे बारे सुसुर पता लगणे बेलि तुस विश्वास अन्तर टिग घियेल।

³ किस कि मसीह अन्तर ईं सम्हाई बुद्धि त ज्ञाने भण्डार असा।

⁴ ई अउं इस बझई जुए बोता ताकि तुसी कोई जेईं बि अपु लिपरी-सिपरी बोकी बइ ना ठगाल।

⁵ आं! बेशक अउं जिसम अन्तर तुसी जुए नेईं, पर में मन तुसी जुए असा। त मसीह पुठ तुं पक्का विश्वास त तुं जीणे लियागत हेरी कइ मोउं तीं सुख मेओ असा।

मसीह अन्तर नोई जिन्‍दगी

⁶ त जीं तुसी यीशु मसीह अपु प्रभु मान कइ तसे पता घेणे ठीक किओ असु, तीं तुस कते रिहे।

⁷ त तस पुठ अपु विश्वास सीरी के ईं टडी कइ बस घिए त तसे ज्ञान अन्तर बधीण दिए। जीं तुसी शिचो असु तीं कते-कुते विश्वास अन्तर पक्के भोई घिए त परमेश्वरे जब्बर धन्यवाद दिए।

⁸ समोझि बिशे कि कोई तुसी मेह्‍णु के शिक्षा पुठ त मतोके रीति रिवाजे शिक्षा पुठ विश्वास कराई कइ अपु सेवक ना बणाल, किस कि ए सोब मसीहे हिसाब जुए नेईं।

⁹ तेस मसीह पुठ परमेश्वरे सम्हाई गुण त हक जिसम अन्तर बिश्ते।

¹⁰ से सम्हाई राज त हक पुठ बोडा असा त तुस तेस मसीहे बेलि पूरे भोई गो असे।

¹¹ तस जुए मीणे बेलि तुं बि जीं खतना भो असा, पर मेह्‍णु हथे बेलि ना जे सिर्फ जिसमे कुछ हेस्सा काट कइ फटान्ते। तुं खतना मसीह बेलि भो असा, जेन तुं सम्हाई पापी गुण किढ़ कइ फटाई छउ असे।

¹² तुं पाणि अन्तर चुसीण, जीं तस जुए पथि घेण थिउ। त जीं परमेश्वरे से सोबी मरो मेह्‍णु बुच दुबारी जीआ, तीं तसे शक्ति पुठ विश्वास करणे बेलि तुस बि तस जुए जी गो असे।

¹³ अपु पापी के बझई जोई, तुस गैर यहूदी मेह्‍णु परमेश्वरे नियम ना मान कइ जीं जमीर गो थिए। तोउं बि परमेश्वरे हें सम्हाई पाप माफ कर कइ अस यीशु जुए दुबारी जीए।

¹⁴ नियम ना मानणे दोषपत्र, जे हें खिलाफ थी, से तेन बेकार किआ, त क्रूस पुठ मिएखि बइ ढनाई कइ से मुकाई छड़ा।

¹⁵ इ कर कइ परमेश्वरे अन्हारे सम्हाई राज त अधिकारी ताकत खतम की त तेन्हि हराई कइ सम्हाई के अगर मखोल बणा।

¹⁶ तोउं त खाणे पीणे बारे, त्योहारे त धनिसे बारे या भक्ति करणे रोजे बारे कोई बि तुं पंच ना बणे।

¹⁷ किस कि ए सोब उडारे ईं असे, पर सच्ची चीज मसीह अन्तर असी, जे एणे बाड़ी असी।

¹⁸ त जे बि तुसी स्वर्गेदूती के पूजा करण जे या वेबझह अपफ जे कष्ट देण शिचालते, तेन्के बोक ना माने। अगर तुस तेन्के बोक मानियेल त अपु ईनाम गड़ाई छते। से दर्शण हेर कइ अपु पापी मने सोची बेलि झूठा रोभ किढ़ते।

¹⁹ से मसीह केआं बखी गो असे, जे मगिर ईं सम्हाई जिसम मतलब सतसंग जोड़ कइ रखता, चलान्ता त तसे देखभाल कता, जेसे बेलि जीं परमेश्वर चहन्ता तीं बधतु।

नोउआं जीवन जीण

²⁰ तुस इस मतोके मूल शिक्षा जे मसीह बेलि मर गो असे त जे शिक्षा मेह्‍णु बड़ाओ असे, तसे हिसाब जुए दुबारी किस जीण चहन्ते?

²¹ जीं कि “ईं ना वर्ताण, ईं ना खाण, ईं ना छूण!”

²² ए सोब शिक्षा मेह्‍णु बड़ाओ असी त जेन्हि चीजी के बारे ए शिक्षा देन्ते से चीज तेन्के टीरे सामणि खतम भोई घेन्ति।

²³ ए शिक्षा ढंग जुए पुजापाठ करण जे, अपफ वश अन्तर रखुंण जे त होर होरे धरमे कम करण जे त अब्बल लगती, पर एन्के बेलि कुछ कम ना बणतु, किस कि एन्हि शिक्षाई अन्तर जिसमे बुरी इच्छा रोकुण जे कुछ ताकत ना भुन्ति।