प्रतिनिधि 6 - Walangi

सत सेवक नियुक्त करण

¹ तेन्हि दिनि, जपल विश्वासी सुआ बधण लगे, तपल यूनानी भाषा बोलुणे बाड़े यहूदी विश्वासी, इब्रानी भाषा बोलुणे बाड़े यहूदी विश्वासी के खिलाफ धूरा दिता कि “रोजे लंगर अन्तर तुस हें विधवा जिल्हाणु सुसुर खाण जे ना देन्ते।”

² तोउं तेन्हि बाराह प्रतिनिधि सोब विश्वासी भिए त बोलु, “ए ट्यारेओ, ईं ठीक नेईं कि अस परमेश्वरे वचन शुणाण छड़ दी कइ मेह्‍णु धराण बिशियेल।

³ तोउं त, तुस अपफ अन्तरा ईं सत खरे मड़द चुणे, जे शुची आत्माई बेलि त ज्ञान बुद्धि जोई भरिए भोल, ताकि से एस कमे जिम्मा नी बटियेल।

⁴ पर अस प्रार्थना दुआ करण त वचन शिचालणे अन्तर अपु पूरा मन त ध्यान देन्ते।”

⁵ ए बोक सोबी खरी लगी। तोउं तेन्हि स्तफनुस, फिलिप्पुस, प्रुखुरुस, नीकानोर, तीमोन, परमिनास त निकोलास चुणे। स्तफनुस विश्वास अन्तर पक्का थिआ त शुची आत्माई बेलिए भरिए थिआ। निकोलास अन्ताकिया शेहर केईआं थिआ, त से यहूदी बणो थिआ।

⁶ तोउं से प्रतिनिधि के समाणि अण्हे त प्रतिनिधि तेन्हि जे प्रार्थना की त अपु हतेउ रख कइ तेन्हि अशुश दिती।

⁷ ई भोई कइ परमेश्वरे वचन हर जगाई पुजुण लगा त यरुशलेम शेहर अन्तर सुआ विश्वासी बध गे। होर सुआ पुजारे यीशु मान कइ विश्वास करण लगे।

स्तफनुस कैद करण

⁸ स्तफनुस परमेश्वरे कृपाई बेलिए त ताकत जोई भरी कइ मेह्‍णु बुछ सुआ बोडे बोडे चमत्कारे कम त निशाण हरालताथ।

⁹ तोउं गुलामी केआं अजाद भुओ मेह्‍णु के अराधनालये कुछ मेह्‍णु जे कुरेनी, सिकन्दरिया शेहर केआं त किलिकिया होर एशिया इलाके केआं थिए, खड़ भोई कइ स्तफनुस जोई बेहसेईण लगे।

¹⁰ पर तसे ज्ञान त शुची आत्माई दुतो बुद्धि सामणा न कइ बटे, किस कि से शुची आत्माई बेलिए बोके कताथ।

¹¹ तोउं तेन्हि गुझि दी कइ कुछ मेह्‍णु केईआं झूठ बोलाउ कि “असी ए मूसे त परमेश्वरे खिलाफ बुराई कता शुणो असा।”

¹² ईं कर कइ तेन्हि सुआ मेह्‍णु, टजे स्याणे त धर्मशास्त्री भड़काए त तेस टाइ कइ टजोट जे घिन गे।

¹³ होर तठि तेन्हि होरे झूठे उगाह खड़ेरे, जेन्हि बोलु, “ए मेह्‍णु इस शुचे देहरे त मूसे दुतो नियमे बुराई कता रेहन्ता।

¹⁴ किस कि असी ए ईं बोता शुणो असा कि नासरत ग्रांए यीशु इस देहेर उपाड़ छता, त तेस चाके बदिल छता, जे मूसे हेन्धे दुतो असा।”

¹⁵ सोब मेह्‍णु जे टजोट अन्तर बिशो थिए, स्तफनुस धे बोडे ध्यान जोई हेरु त तसे मुंह स्वर्गेदूते ईं काउ।