प्रतिनिधि 5 - Walangiहनन्याह त तसे जुएली सफीरे सज्जा मेण 1 त तिहांणि हनन्याह नओएं यक विश्वासी मेह्णु थिआ। तेन त तसे जुएली, सफीरा दुहिए मी कइ थोड़ी भइ अपु जिमि बेची। 2 त जिमि रुपेई केआं कुछ अपफ जे रख कइ; तेन बाकी रुपेई प्रतिनिधि के हवाले कर कइ बोलु कि एतरे रुपेई बेलि बेचो थी। एसे बारे तसे जुएली बि पता थिआ। 3 पर पतरसे बोलु, “ए हनन्याह! शुची आत्माई झूठ बोलुण जे शैताने तें मन कीं मोहि छड़ा कि तेईं जिमि रुपेई अन्तरा अपफ जे कुछ रुपेई बचाई रखे? 4 जपल तकर से जिम तोउ केईं थी, से कि तें न थी ना? होर बेचण केआं पता मेओ पूरा मुल बि त सोब तेन्धेरी थिआ। त तेईं ईं करण जे अपु मन अन्तर किस सोचु? तेईं मेह्णु जे ना, बल्कि परमेश्वर जे झूठ बोलो असु।” 5 ईं बोक शुणते ईं, हनन्याह डूल गा त मर गा। एस घटनाई बेलि सोब जेईं सुआ डर गे। 6 कुछ जवान मेह्णु एई कइ तस जे बमाण बणाउ त बाहर नी कइ पथि छड़ा। 7 लगभग टाई घंटे पता तसे जुएली, तठि एई। होर जे कुछ भो थिउ, तेस पता ईं ना थिआ। 8 त पतरसे तेस जे बोलु, “मोउं जे बोल कि तुसी से जिम, अतरे रुपेई बइ बेचो थी ना?” तेन बोलु, “आं! अतरे रुपेई बइ।” 9 त पतरसे तेस जे बोलु, “केस बझई जोई तुस दुहे जेईं प्रभु आत्मा परखणे लिए राजि भुए? हेर, जेन्हि तें धाणि पथण जे नीओ थिआ, से दुआर केईं पुजो असे, त से तें लाश बि बाहर घिन घेन्ते।” 10 तिखेईंए से तसे खुरी पुठ झड़ गई, त से मर गई। जपल से जवान मेह्णु अन्तर आए त से तेन्हि मरो काई, त बाहर नी कइ तसे धाणि भेएड़ पथि छइ। 11 त पूरी सतसंग त अन्हि बोकी शुणणे बाड़े सोब सुआ डर गे। प्रतिनिधि चमत्कारे कम करण त निशाणी हरालिण 12 होर प्रतिनिधि के बेलि सुआ चमत्कारे कम भुण लगो थिए त से सुआ निशाणी बि मेह्णु के बुछ हरालतेथ। त से सोब विश्वासी मेह्णु यक मन भोई कइ सुलैमाने मण्डप अन्तर किठिन्तेथ। 13 तेन्हि जोई मीण जे बाहरीआ केसेरी बि हिम्मत ना भुन्तीथ; तोउं बि मेह्णु तेन्के बाधरी लान्तेथ। 14 होर सुआ जिल्हाणु त मड़द प्रभु यीशु पुठ विश्वास कर कइ सतसंग जोई मीण लगे। 15 प्रतिनिधि के कम हेर कइ मेह्णु बीमार मेह्णु बथ मन्जे पुठ त भीं सैलेर रखतेथ, ताकि जपल पतरस तेनबाई एईयाल, त कम से कम तसे उडार तेन्हि अन्तरा केसे पुठ बि एई घियेल त से सुसुरी घियेल। 16 होर औत-कोते शेहरी केईआं बि सुआ मेह्णु यरुशलेम शेहर किठे भुन्तेथ। से अपफ जोई बीमार मेह्णु त जुठी आत्माई बेलि भुंजो मेह्णु आणतेथ, त प्रतिनिधि के बेलि सोब ठीक भोई घेन्तेथ। टजोटे अधिकारी प्रतिनिधि कैद करण 17 ईं भुणे बेलि, प्रतिनिधि हेर बोडा पुजारा त तसे से सोब साथी जे सदूकी दले थिए, जड़ण लगे। 18 त तेन्हि प्रतिनिधि टाइ कइ जेहेल अन्तर छइ छड़े। 19 पर तेस रात प्रभु यक स्वर्गेदूते जेहले दुआर खोल कइ से बाहर अण्हे त बोलु, 20 “घिए, देहेर अन्तर खड़ भोई कइ यीशु मसीह अन्तर इस नोई जिन्दगी बारे सम्हाई किछ मेह्णु बताण दिए।” 21 ईं शुण कइ से तठिआ घेई गे त भ्यागे देहेर अन्तर घेई कइ प्रचार करण लगे। पर जपल बोडे पुजारे त तसे साथी किठे भुए त तेन्हि यहूदी मेह्णु के टजोट की त तेन्हि से प्रतिनिधि जेहेल केआं अण्ह कइ पेश करण जे बोलु। 22 पर देहरे सपाही जपल जेहेल अन्तर गे त तठि कोई ना थिआ। त वापस एई कइ बोलु, 23 “असी घेई कइ हेरु कि जेहेल चोहरो कनारा सुसुर बन्न असु, होर पेहरेदार बि बाहरी दुआर पुठ खड़ खड़ असे; पर जपल दुआर खोलु, त अन्तर कोई ना मेआ।” 24 जपल देहरे सपाही के सरदार त मुख्य पुजारी ई बोक शुणी, त तेन्हि सुआ चिन्ता भोई गई कि एस बोकी अखिर की भुणे बाड़ु असु! 25 तिखेईं केनि एई कइ बोलु, “हेरे, जे तुसी जेहेल अन्तर बन्न किओ थिए, से देहेर अन्तर मेह्णु शिचालण लगो असे।” 26 तोउं सपाही के मुखिया, सपाही जोई साते घेई कइ, तेन्हि प्रतिनिधि घिन आए, पर जब्बरदस्ती कर कइ ना, किस कि से मेह्णु हेर डरतेथ कि मेह्णु तेन्हि घोड़ियाल नउ। 27 तेन्हि से अण्ह कइ टजोटे सम्हाणि खड़ेर छड़े; तोउं बोडे पुजारे तेन्हि केआं पुछु, 28 “असी कि तुसी जे सक्त निआंग ना थी ना दुतो कि तुस तसे नओं नी कइ मेह्णु कुछ ना शिचाले? तोउं बि हेरे, तसे शिक्षा तुसी पूरे यरुशलेम शेहर अन्तर कठे भुओ सोबी मेह्णु शिचालिण लओ असी। होर तुस चहन्ते कि तेस मेह्णु मारणे दोष असी पुठ लौता अओ, ना?” 29 पर पतरस त होरी प्रतिनिधि जवाब दी कइ बोलु, “असी मनखे निआंग केआं बध कइ परमेश्वरे निआंग मनीण लौती। 30 हें पुरखी के परमेश्वरे से यीशु मरण केआं दुबारी जीआ, जे तुसी क्रूस पुठ ढनाई कइ मारो थिआ। 31 से ईं परमेश्वरे मुखिया त बचाणे बाड़ा बणाई कइ अपु देहणा कना बिशाणो असा, ताकि असी इस्राएली मेह्णु जे मन बदलुणे मौका मेईंयाल, होर से हें पापी के माफी दिआल। 32 अस अन्हि बोकी के उगाह असे, जीं शुची आत्मा बि असी। परमेश्वरे से तेन्के धे दुतो असी, जे तसे निआंग मानते।” गमालीएल गुरुजीए सलाह 33 ईं शुण कइ से सोब कठे भुओ मेह्णु तीं जड़ी गे त तेन्हि मारणे की। 34 पर गमालीएल नओएं यक फरीसी, जे मूसे नियमे पण्डित थिआ त सोबी मेह्णु अन्तर इज्जतदार थिआ, तेन्के बुछ खड़ भोई कइ तेन्हि प्रतिनिधि तठिआ थोड़ी देरी लिए बाहर नेणे जे सपाही जे बोलु। 35 तोउं तेन बोलु, “ए में इस्राएली भाईओ! अन्हि मेह्णु जोई तुस जे बि करण चहन्ते, सोच समझ कइ करे। 36 किस कि कुछ सालुं पेहले थेउदास नओएं यक बंदा ईं बोता खड़िया कि से बि कुछ भो; तपले कोई चोउर सौ मेह्णु तेस जोई मी गे। पर से मार छड़ा, होर जतु मेह्णु तसे पता भुओ थिए, से सोब खिल्हिर गे त तेन्के बेलिए कुछ ना भु। 37 तढ़िया पता जनगणनाई टेम, गलील इलाके यहूदा खड़िया त बगावत करण जे कुछ मेह्णु अपु कना कइ छड़े; पता से बि खतम भोई गा त जत मेह्णु तेस पता भोई गो थिए, से सोब बि खिल्हिर गे। 38 तोउं त एन्के बारे अउं तुसी जे बोता कि अन्हि मेह्णु केआं दूर बिशे त अन्हि अकेले छड़े; किस कि अगर ए कम त योजना मेह्णु कनारा असी त ए कमियाब ना भुन्ति। 39 पर अगर ए परमेश्वरे कनारा असु, त तुस अन्हि कदी खतम कइ ना सकते। होर ईं ना लौतु भो कि तुस अपफ परमेश्वरे खिलाफ भोई घियेल।” 40 त टजोट अन्तर किठे भुओ सोबी जेईं तसे सलाह मान छइ। तेन्हि प्रतिनिधि मारणे बदले, भिआई कइ रेजुड़ दुणेर कइ मडाए; होर अखिर अन्तर ईं निआंग दी कइ कि यीशु नओएं बेलि होर केस जे ना बोलुण, तेन्हि छड़ दिते। 41 त प्रतिनिधि इस बोकी पुठ खुश भुए कि मेह्णु से यीशु मसीहे नओएं लिए बेइज्जत भुणे लेएक त समझे, त टजोट केआं घेई गे। 42 होर से रोज देहेर अन्तर त गी गी घेई कइ मेह्णु शिचालण लगे, त “यीशु ईं से मसीह” भुणे बारे खुश खबरी प्रचार कते रिहे। |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.