प्रतिनिधि 28 - Walangiमाल्टे टापु अन्तर पौलुसे चमत्कार 1 जपल सोब जेईं तठि सुसुर पूज गे त असी पता चला कि तेस टापु नओं “माल्टा” थिउ। 2 तठियाणि मेह्णु असी पुठ खरी दाह की। मेघे लगण लगो थी त ठन्नु बि भुण लगो थी। त तेन्हि आग जाई कइ हें आबिश किउ। 3 जपल पौलुसे छिड़ी के यक कुम नी कइ आग पुठ छा, त गरमीयारी बझई जोई तिखेईंए यक जहरिला कीड़ा तठिआ निस कइ तसे हथे जोई लपेटी गा। 4 तठियाणि मेह्णु जपल से कीड़ा पौलुसे हथ जोई लपेटो काआ, त से अपफ बुछ बोलुण लगे, “सच्चे, ए मेह्णुमार भो। समन्दरे तुफान केईआं त ए बच गो थिआ, पर न्याय देवी एस जीन्ता बिशुण ना देन्ती।” 5 पर पौलुसे से कीड़ा ठुटक कइ आग अन्तर फटाई छड़ा, होर तसे कोई नुकसान ना भुआ। 6 तेन्हि मेह्णु उम्मीद थी कि तसे हातेउ उफार एई घेन्ता या कपले बि से मर कइ झड़ घेन्ता। पर सुआ टेम भाड़णे पता, त ईं हेर कइ कि तेस जोई कुछ होरु नेईं भुण लगो, तेन्हि तसे बारे अपु सोच बदली त से बोलुण लगे कि पौलुस यक देवता भो। 7 तेस जगाई भेएड़ कुछ जिम तेस टापु मुखिये थी, जेस नओं पुब्लियुस थिउ। तेन असी अपु गी धाम की त टाई रोज तकर हें खरी सेवा पाणि की। 8 तसे बोउ बीमार थिआ। तेस सेक चढ़ताथ त दस्त बि लगो थिए। पौलुस तसे भेएड़ गा, तसे लिए प्रार्थना की त तेस पुठ हथ रख कइ से ठीक कइ छड़ा। 9 तोउं भु ईं कि तेस टापु होरे बीमार मेह्णु बि पौलुस केईं एण लगे त ठीक भुन्ते गे। 10 तेन्हि सुआ तरीके जोई हें इज्जत की। टाई मेहने पता, जपल असी जहाज पुठ अपु सफर शुरु किआ त तेन्हि से हर यक चीज जहाज पुठ पुजाई छड़ी, जेसे असी जरूरत थी। माल्टे टापु केआं रोम शेहर जे घेण 11 असी मिस्र देशे सिकन्दरिया शेहरे यक जहाज पुठ अपु सफर शुरु किआ। एस जहाज नओं “जूंठे देवता” थिउ त ए हियुंते लिए माल्टा टापु बिशो थिआ। 12 तठिआ सुरकूसा बंदरगाह पूज कइ टाई रोज अस तठि बिशे। 13 तोउं तठिआ अगर घेई कइ अस रेतियुम शेहर पुजे। यक रोज पता दखण दिशा केआं ब्यार लगण लगी त अस घेण लगे, होर दोके रोज पुतियुली शेहर पूज गे। 14 तठि कुछ विश्वासी मेह्णु थिए, जेन्हि असी जे अपु गी बिशुण जे बोलु। तठि अस सत रोज तकर बिशे। होर अखिर अन्तर अस रोम शेहर जे हंटण लगे गे। 15 हें बारे खबर शुण कइ विश्वासी भाई भेणि “अप्पियुस” नओएं चौक त “टाई सराई” तकर असी जोई मीण जे आए। तेन्हि हेर कइ पौलुसे सुआ खुशी जोई परमेश्वरे धन्यवाद किआ। 16 रोम शेहर अन्तर पुजुण केआं पता पौलुस अकेले बिशुण जे इजाजत मेई गई। पर तेस पुठ पेहरा देण जे यक सपाही नियुक्त भुआ। रोम शेहरे यहूदी मेह्णु जोई पौलुस मीण 17 टाई रोजे पता, पौलुसे यहूदी बिचा खास खास मेह्णु के सभा भिआई। जपल से कठे भोई गे त तेन्हि जे बोलुण लगा, “ए में ट्यारे भाईओ! मेईं ना त अपु यहूदी जाति मेह्णु के खिलाफ, होर ना हें पितरी के रीति रिवाजे खिलाफ कुछ किउ, तोउं बि यरुशलेम शेहर अन्तर अउं कैदी बणाई कइ रोमी सरकारे हवाले किओ असा। 18 में जांच पड़ताल करण केआं पता मोउं छड़ देण जे से तेयार थिए, किस कि तेन्हि में अन्तर मारणे लेएक कोई दोष ना मेईंया। 19 पर जपल यहूदी मेह्णु एसे विरोध किआ त मेईं मजबूर भोई कइ सम्राट कैसरे समाणि में पेशी भुण जे मांग की। ए इस बझई जोई नेईं कि मोउं अपु मेह्णु के खिलाफ कोई इलजाम लाण थिआ। 20 मेईं तुसी जोई मीण जे तोउं छनेअरे की, ताकि तुसी जोई बोक विचार कइ सकुं। इस्राएली मेह्णु के उम्मीद, जे मसीह यीशु असा, तस बझई जोई ईं अउं इन्हि शंकीड़ी अन्तर बन्हिए असा।” 21 तेन्हि पौलुस जे जवाब दिता, “यहूदिया राज्य केईआं तुं बारे असी जे ना कोई चिट्ठि अओ असी, होर ना केनि एई कइ तुं खिलाफ कुछ बोलो असु। 22 हें इच्छा थी कि मसीहे बती बारे अस तुं मुंह केआं ईं शुणुण। होर असी पता असा कि हर जगाई एस बती विरोध भुण लगो असा।” 23 त एस मसीहे बते बारे बोक करण जे तेन्हि यक रोज ठीक कइ छड़ा त तेस ठीक किओ रोजे सुआ मेह्णु तसे गी आए। भ्यागे केआं ब्यादि तकर पूरी सच्चाई जोई पौलुस तेन्हि परमेश्वरे राज्य बारे शिचालता रिहा। त मूसा दुतो नियम अन्तर त भविष्य वक्ती के लिखो बोकी अन्तर मसीह यीशु बारे जे जे बोक असी, तेन्हि से समझाई कइ पतियान्ता रिहा। 24 तसे बोक शुण कइ तेन्हि बिचा कुछ मेह्णु विश्वास किआ, पर कुछ होरी विश्वास ना किआ। 25 जपल से अपफ बुछ राजि भोई न बटे त पौलुसे ई अखिर बोक शुण कइ घेण लगे: तेन बोलु, “यशायाह भविष्य वक्ता शुची आत्माई बेलि तुं बाव दादु पुठ यकदम सुसुर बोक बोलो थी कि 26 ‘घेई कइ एन्हि मेह्णु जे बोल, “तुस शुणी त बिश्ते पर समझ ना बटते। तुस हेरी त बिश्ते, पर पिछाण ना बटते।” 27 किस कि एन्हि मेह्णु के मन पक्की गो असे। एन्के कन उचा शुणता। एन्हि अपु टीर बन्न रखो असे कि कुछ ना काएल, ना त से अपु टीरे बइ हेरियेल होर कन बइ शुणियेल होर अपु मन अन्तर समझ कइ मोउं केईं वापस एईयेल, त अउं परमेश्वर तेन्हि ठीक कइ छउं।’” 28 “तोउं त, अउं चहन्ता कि तुस ई जाण घिए कि परमेश्वरे ए बचणे समाचार अब गैर यहूदी केईं लंघाओ असा। से जरूर शुणते।” 29 [पौलुसे ई बोक शुणुण केआं पता, यहूदी मेह्णु तठिआ अपफ बुछ झगड़ीन्ते घेई गे।] 30 पौलुस अपु किराये गी अन्तर पूरे दुई साल तकर बिशा। त जे बि तेस जोई मीण जे एन्तेथ, तेन्के पूरे मन जोई आबिश कताथ। 31 होर से नडर भोई कइ, बगैर कोई परेशानी सुसुर सुसुर परमेश्वरे राज्य त प्रभु यीशु मसीहे बारे प्रचार कता त शिचालता रिहा। |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.