प्रतिनिधि 27 - Walangiरोम शेहर जे पौलुसे सफर क्रेते टापु तकर घेण 1 जपल राज्यपाल फेस्तुस ठीक कइ छउ कि असी जहाज पुठ इटली देशे रोम शेहर जे लंघान्ता, त तेन पौलुस त कुछ होरे कैदी बि यूलियुस नओएं यक सुबेदारे हवाले कइ छड़े, जे “सम्राटे पलटने” सुबेदार थिआ। 2 असी जोई मकिदुनिया राज्ये, थेस्सलुनीका शेहरे भाई अरिस्तर्खुस बि थिआ। अस अद्रमुतियुमे बंदरगाहे यक जहाज पुठ चढ़ कइ घेण लगे। तेस जहाज एशिया इलाके औत-कोते सुआ बंदरगाह बइ घेणे थिउ। 3 दोके रोजे अस सैदा शेहर पूज गे, त सुबेदार यूलियुसे पौलुस पुठ दाह की त तस घेई कइ अपु मितरी जोई मीण जे त अपु जरूरते सामान अण्हुण जे इजाजत दी छइ। 4 तोउं तठिआ असी जहाजे सफर शुरु किआ त उमल कनारा ब्यार लगणे बझई जोई असी कुप्रस टापु औते बइ घेण आउ। 5 तोउं अस किलिकिया त पंफूलिया शेहरे भेएड़ समन्दरे बइ लूसिया इलाके मूरा नओएं बंदरगाह पुजे। 6 तठि सुबेदार सिकन्दरिया शेहरे यक जहाज इटली देश जे घेन्ता मेईंया, त तेन अस तेस पुठ चढ़ाई छड़े। 7 मठे मठे घेई कइ असी सुआ रोज भोई गो थिए। कनिदुस बंदरगाह पुजुण जे बि मुश्किल थी, किस कि ब्यार उमल कनारा लगो थी। त अस सलमोन नओएं यक बंदरगाहे समाणि बइ क्रेते टापु औत-कोत बइ अगर जे घेई गे। 8 तसे औत-कोत बइ सुआ मुश्किल जोई अगर जे बधते गे त “शुभ बंदरगाह” नओएं यक जगाई पुजे, जेठिआ लसया शेहर नीड़ा थिआ। समन्दरी तुफान अन्तर जहाज फसण 9 अपल तकर सुआ रोज घेई गे त पाण पुठ सफर करण खतरनाक भुन्ता गो थी, किस कि हियुंत बि नीड़ा एई गो थी। तोउं त पौलुसे तेन्हि जे ईं बोल कइ सावधान किए, 10 “ए मितरों! मोउं ईं लगतु कि इस सफर अन्तर सुआ नुकसान भुणे बाड़ा असा, सद माले त जहाजे ना, बल्कि हें जाने बि नुकसान भुणे बाड़ा असा।” 11 पर सुबेदारे पौलुसे बोकी के कना कोई ध्यान ना दी कइ जहाजे कप्ताने त जहाजे मालिके बोके मनी। 12 से बंदरगाह हियुंत लिए ठीक न थिआ। तोउं त सुआ जेईं ठीक किआ कि तठिआ जहाज खोल कइ अगर जे घिउं। तेन्हि ईं उम्मीद थी कि हियुंत लगण केआं पेहलाई फीनिक्स बंदरगाह पूज कइ तठि हियुंत कटुण। ए क्रेते टापु यक बंदरगाह असा, जे दखण-पश्चिम त उत्तर-पश्चिमे कना जे खुलता। 13 जपल दखणे दिशा केईआं धिक धिक ब्यार एण लगी, त तेन्हि सोचु कि से अपु जगाई पुजी गे। तोउं त तेन्हि जहाज खोल छड़े त क्रेते टापु औत-कोत बइ घेण लगे। 14 पर थोड़े दूर घेई कइ यक तेज तुफान उत्तर-पूर्व दिशाई केईआं एण लगा, 15 त जहाज तेस तुफान अन्तर फस गा। तेज ब्यारी अगर से टिगि न बटा, त असी जहाज ब्यारी जोई घेण दिता त अस बि ब्यारी जोई बहोईन्ते घेई गे। 16 तोउं कौदा नओएं यक मठुड़ ईं टापु पती कना पूज कइ असी मुश्किल जोई मठुड़ नाव जहाज पुठ चढ़ाई। 17 फि टुनिया पुठे तकर पूरा जहाज बन्हा कि से टूट ना घियेल। तेन्हि डर थिआ कि जहाज सुरतिस समन्दरी रेती टापु अन्तर फस ना घिए। तोउं त तेन्हि जहाजे तरपाल उणिहां कर कइ तुफाने ब्यार जोई जहाज घेण दिता। 18 बोडे छल्हारे त जोरी ब्यारी बेलिए जपल सुआ ढक्के-जोके खे, त दोके रोज से जहाजे माल फटाण लगे। 19 होर टेके रोजे तेन्हि अपु हथे बइ जहाजे सजो सामान बि फटाण लाई छड़ा। 20 सुआ रोज तकर असी सौ दिकि ना दिस, होर ना तारे काए त ती डू लगोरी थी। तोउं त, हें बचणे उम्मीद बि मठे मठे मुक गई। 21 जपल से सोब सुआ रोज तकर ढुके रिहे, त पौलुसे तेन्के बुच खड़ भोई कइ बोलु, “ए मितरों! तुस में बोक मान कइ क्रेते टापु केआं ना चलतेथ त ए नुकसान ना भुन्ताथ। 22 पर अब अउं तुसी जे हथ जोड़ता कि हिम्मत ना हारे, किस कि जहाज छड़ दी कइ असी अन्तरा केसेरी प्राण न घेन्ते। 23 किस कि से परमेश्वर, जे में भो त जेसे सेवा अउं कता, तसे स्वर्गेदूत रात मोउं केईं आ, 24 त ईं बोल कइ मोउं हिम्मत दिती, ‘ए पौलुसा, डर नउ! जीं बि भोल, तोउ जरूर कैसर सम्राटे समाणि खड़ भुण असु। शुण, परमेश्वरे तोउ पुठ कृपा करणे बझई जोई तोउ जोई सफर करणे बाड़ी सोब जेईं बचान्ता।’” 25 “तोउं त, ए ट्यारेओ, हिम्मत ना हारे; किस कि अउं परमेश्वर पुठ विश्वास कता कि जीं मोउं जे बोली गो असु, तिहांणि भुन्तु। 26 पर हें जहाज केसे टापु जोई बज कइ टुटुण असा।” जहाज टुटुण 27 जपल चौधूं रोजे रात आई, त अस अद्रिया नओएं समन्दरे छल्हारी बुछ घेण लगो थिए, त अधरात जहाज चलाणे बाड़ी लगु कि अस केसे देशे कनार पुजुण लगो असे। 28 जपल तेन्हि टांक दी कइ डुघाई नापी त पता लगा कि यक सौ बिह फीट थिआ। थोड़ु अगर घेई कइ फि नापी त नब्बे फीट डुघा थिआ। 29 घोड़ी जुए टक्कर भुणे डर जोई तेन्हि जहाजे पतूं ईं चोउर लंगर छइ छड़े कि जहाज रुक घियेल, त भ्यागे टगड़िणे भाड़ बिशे। 30 पर जहाज चलाणे बाड़े तठिआ नशुण चहन्तेथ। त तेन्हि जहाजे अगरी कना लंगर छाणे बहाना कर कइ मठिड़ नाव समन्दर अन्तर छाणे की। 31 त पौलुसे सुबेदार त सपाही जे बोलु, “अगर ए मेह्णु जहाज पुठ ना बिशियेल, त तुस बि बच ना सकते।” 32 त सपाही से रेजुड़ काट छड़ी जेसे बेलि से मठिड़ नाव ढिनो थी। 33 पथवारी पौलुसे ईं बोल कइ, सोबी जेईं खाण जे समझाण लगा, “आज चौधा रोज भोई गे कि तुसी परेशानी अन्तर कुछ खओरु नेईं। 34 अउं तुं छने कता कि किछ खाण दिए, जेसे बेलिए तुस बच सकियेल। किस कि तुसी बुचा केसे कज बि ना भुन्तु।” 35 ईं बोल कइ तेन रौठि टाती त सोबी के समाणि तसे लिए परमेश्वरे धन्यवाद किआ त टुकड़ेर कइ खाण लगा। 36 तोउं तेन्हि सोब बि हिम्मत की त रौठि खेई। 37 जहाज पुठ असी सोबी मिआई कइ कुल दुई सौ छहतर मेह्णु थिए। 38 जपल से रौठि खाई कइ रज्जि गे, त जहाज अन्तर रखो गिहुं समन्दर अन्तर फटाई कइ जहाज पोलेरण लगे। 39 जपल भ्याग भुई त तेन्हि से जगाह पिछाणी ना बटी, पर यक जगाह काई, जेसे उधौरी औत रेतिलि थी। तोउं तेन्हि सोचु कि भोई बटियेल त जहाज एस औत पुठ टगान्ते। 40 तोउं तेन्हि लंगर काट कइ समन्दर अन्तर फटा त अगर घेणे मकसद जोई समाणि बाड़ा तरपाल खोल छा त जहाजे उसानि खोल छइ। 41 पर जहाज समन्दरे रेती टापु अन्तर फस गा। तसे अगरी हेस्सा त रेत बुछ फस कइ टिग गा, पर पतुई कनारा छल्हारे बइ टूटता गा। 42 तपल सपाही सोचु कि सोब कैदी मार छते, ईं न भो कि कोउं जेईं तैर कइ नश घियेल। 43 पर सुबेदार पौलुस बचाई कइ अण्हण चहन्ताथ। त तेन से ईं करण केआं रोके त बोलु कि जे तैर सकते, टाउ दी कइ तैरते तैरते जहाज केआं पेहलाई औत पुठ पूज घिए; 44 होर बचो मेह्णु जहाजे टूटो हेस्सा त फटे बेलि जीं तीं कइ औत पुठ जे घिए। तीं कर कइ सोब सुसुर निस गे। |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.