प्रतिनिधि 18 - Walangiकुरिन्थुस शेहर अन्तर सतसंगे शुरुवात भुण 1 तढ़िया पता पौलुस एथेन्स शेहर छड़ दी कइ कुरिन्थुस शेहर आ। 2 तठि तेस अक्विला नओएं यक यहूदी मेह्णु मेईंया, जेसे जनम पुन्तुस राज्य भुओ थिआ। से अपु जुएली प्रिस्किल्ला जोई साते इटली देश केआं अओ थिआ, किस कि रोमी सम्राट क्लौदियुसे सोब यहूदी मेह्णु जे रोम शेहर केआं घेणे निआंग दुतो थी। पौलुस तेन्हि जोई मीण जे गा। 3 त से तेन्हि जोई बिश कइ साते कम करण लगा; किस कि से यके धन्दा कतेथ, तम्बू बणाणे। 4 पौलुस हर भक्ति करणे रोज अराधनालय अन्तर बोक विचार त बेहेस कर कइ यहूदी त गैर यहूदी सोबी समझाणे कोशिश कताथ। 5 जपल सीलास त तिमुथियुस मकिदुनिया राज्य केआं आए, त पौलुस डेरा बणाणे धन्दा छड़ दी कइ पूरे टेम खुश खबरी शुणाण लगा त यहूदी मेह्णु जे उगाह देण लगा कि यीशु ईं मसीह भो। 6 पर जपल से तसे खिलाफ भोई गे त तसे बुराई करण लगे, त तेन तेन्के विरोध कर कइ अपु झिणि के धूड़ ठुटकी छड़े त तेन्हि जे बोलु, “तुं लहु तुन्धेरी मगिर पुठ लौतु अओ! अउं बेकसूर असा। अभेईं केआं खड़ अउं गैर यहूदी मेह्णु केईं घेन्ता।” 7 तोउं तठिआ घेई कइ से तितियुस यूस्तुस नओएं यक परमेश्वरे भक्ते गी गा; जेसे गी अराधनालय जोई साते थिउ। 8 अराधनालये मुखिया क्रिसपुस अपु पूरे टब्बरे जोई प्रभु पुठ विश्वास किआ। होर कुरिन्थुस शेहरे होरे बि सुआ मेह्णु पौलुसे बोक शुण कइ विश्वास किआ त पुओणि अन्तर चुसिए। 9 तोउं यक रात प्रभु दर्शण अन्तर पौलुस जे बोलु, “डर नउ, बोता रेह, चुप न बिश; 10 किस कि अउं तोउ जोई साते असा, होर कोई जेईं बि तें किछ नुकसान ना कइ बटता; किस कि इस शेहर अन्तर में अपु सुआ मेह्णु असे।” 11 तोउं त पौलुस डेढ़ साल तकर मेह्णु परमेश्वरे वचन शिचालता रेहा। अखया राज्ये राज्यपाल गल्लियो समाणि पौलुस 12 गल्लियो अखया राज्ये राज्यपाल बणते ईं, सोब यहूदी मेह्णु मी कइ पौलुसे खिलाफ भोई गे। तोउं से टाइ कइ कचेरी पंच के समाणि अण्हता। 13 तेन्हि ईं बोल कइ तेस पुठ दोष ला कि “ए मेह्णु परमेश्वरे पूजा अराधना करणे ईं रीत शिचालता, जे कि नियमे खिलाफ असी।” 14 पौलुस अपु बोक रखणे बाड़ा ईं थिआ कि गल्लियोए यहूदी मेह्णु जे बोलु, “ए यहूदी मेह्णुओ! अगर ए अन्याय या गलत कमे मामला भुन्ताथ, त जरूर अउं लाह रख कइ तुं शुणताथ। 15 पर ए झगड़ा शब्दी, नओएं त तुं नियमे बारे असा। त तुसे जाणे; किस कि अउं अन्हि बोकी के न्याय करण न चहन्ता।” 16 तोउं तेन से कचेरी केआं बाहर लंघाई छड़े। 17 तोउं सोबी मेह्णु अराधनालये मुखिया सोस्थेनुस टाइ कइ कचेरी समाणि मडा। पर गल्लियोए एस पुठ बि कोई परवाह ना की। अन्ताकिया शेहर जे पौलुस वापिस घेण 18 पौलुस सुआ रोज तकर कुरिन्थुस शेहर बिशा। तोउं विश्वासी भाई भेणि जे आबिश कर कइ किंख्रेया बंदरगाह अन्तर तेन अपु मगिर कोर दिआई कइ साफ करवाई, किस कि तेनि कान्छा मगो थी। तोउं से जहाज पुठ सीरिया राज्य जे घेई गा। तेस जोई साते प्रिस्किल्ला त अक्विला थिए। 19 जपल से इफिसुस शेहर पुजे त पौलुस प्रिस्किल्ला त अक्विला तठि छड़ दी कइ से अपफ अराधनालय अन्तर घेई गा त यहूदी मेह्णु जोई बोक विचार त बेहेस करण लगा। 20 तेन्हि तसे छने किउ कि “कुछ रोज हउ असी जोई इठि बिश।” पर पौलुस ना मनी। 21 पर तेन्हि जे आबिश कर कइ त ईं बोल कइ तठिआ घेई गा कि “अगर परमेश्वर चहाल त अउं तुसी केईं फि एन्ता।” तोउं से इफिसुस शेहर छड़ दी कइ जहाज पुठ घेई गा; 22 त समन्दर पार भोई कइ कैसरिया बंदरगाह पुजा। तठिआ से यरुशलेम शेहरे सतसंगी जोई मीण जे गा। तोउं से तठिआ अन्ताकिया शेहर जे घेई गा। खुश खबरी प्रचार करणे पौलुसे टेका सफर खुश खबरी प्रचार करणे टेके सफरे शुरुवात 23 पौलुस किछ रोज अन्ताकिया शेहर बिशा। तोउं से तठिआ घेई कइ गलाती त फ्रूगिया राज्ये शेहर शेहर अन्तर विश्वासी भाई भेणि जे विश्वास अन्तर पक्का भोई कइ बिशण जे हिम्मत देन्ता रिहा। इफिसुस शेहर अन्तर अपोलुस 24 तेन्हि दिनि अपोलुस नओएं यक यहूदी मेह्णु, जेसे जनम मिस्र देशे, सिकन्दरिया शेहर भुओ थिआ, इफिसुस शेहर आ। से अब्बल भाषण देन्ताथ त धरमे कताबे पण्डित बि थिआ। 25 तेस प्रभु बते शिक्षा मेओ थी। त से आत्माई जोश जुए बोताथ। से प्रभु यीशु बारे सोब कुछ ना जाणताथ, किस कि तस सद यूहन्ने शिक्षा त पुओणि अन्तर चुसुणे बारे पता थिआ। 26 से अराधनालय अन्तर नडर भोई कइ बोलुण लगा। पर प्रिस्किल्ला त अक्विला तसे बोक शुण कइ तेस अपु गी घिन आए त परमेश्वरे बती बारे से सुसुर सुसुर समझा। 27 जपल अपोलुसे चहु कि समन्दरे पार अखया राज्य जे घेन्ता त विश्वासी भाई भेणि तेस हिम्मत दी कइ तठियाणि विश्वासी जे चिट्ठि लिखि कि से तेसे खरी खातिरदारी करे। तेन तठि पूज कइ तेन्हि विश्वासी के खरी मदत की, जेन्हि प्रभु कृपाई बझई जोई विश्वास किओ थिआ। 28 किस कि से सोबी के समाणि यहूदी मेह्णु के बोकी के ईं जवाब देन्ताथ कि से कुछ बोल ना बटतेथ, होर धरमे कताब केईआं सबूत दी दी कइ तेन ई साबित किउ कि यीशु ईं मसीह भो। |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.