3 यूहन्ना 1 - Walangi

शुरुवाती बोक

¹ ट्यारे गयुसा, जेस जोई अउं सच्चा परेम कता! सतसंगे स्याणा यूहन्ने तोउ जे नमस्कार।

² में ट्यारे मितरा! अउं ईं प्रार्थना कता कि जीं तु विश्वास अन्तर तरक्की करण लगो असा, तिहांणि सोबी बोकी अन्तर बि तरक्की करे त भला चंगा रेह।

³ जपल हें कुछ भाई तठिआ वापिस एई कइ बोलु कि तु सच्चे बि परमेश्वरे सच्चाई पुठ हंटता त अउं सुआ खुश भुआ।

⁴ एस केआं बध मोउं होर की खुशी मेई बटती कि ईं शुणुण कि में गभुर परमेश्वरे सच्चाई पुठ हंटते।

गयुसे तारीफ

⁵ ए ट्यारा! जे किछ बि तु तेन्हि भाई जोई कता जे प्रभु सेवा कते, से तु अपु विश्वासे हेसाब जुए करण लगो असा। हांलाकि से परदेशी त अणजाण असे, तोउं बि तु तेन्के सेवा कता।

⁶ तेन्हि सतसंगे सामणि तें परेमे उगाही दुतो असी। त एणे बाड़े रोजी अन्तर बि तु तेन्के सफर करणे सोब जरूरत इहांणि पूरी कते रेह। ईं करण परमेश्वर खरु लगतु।

⁷ तु इहांणि कते रेह किस कि से यीशु मसीहे सेवा करण जे नशो असे, त अविश्वासी मेह्‍णु केआं किछ ना नेन्ते।

⁸ तोउं त असी तेन्के मदत करण चहिए, जेसे बेलि अस बि यीशु मसीहे सच्चाई प्रचारे कम अन्तर तेन्के साथी बणियेल।

दियुत्रिफेस त दिमेत्रुस

⁹ एस बोकी बारे ईं मेईं सतसंग जे यक चिट्ठि लिखो थी। पर भाई दियुत्रिफेस जे सतसंग अन्तर बोडा बणुण चहन्ता, से हें शिक्षा ना मानता।

¹⁰ तोउं त जपल अउं एऊं त तसे कमी के टमझण सोबी के सामणि भीं किढ़ता। से हें बारे भलु बुरु बकता, तोउं बि तेसे पेट ना भरीन्‍तु। किस कि से अपफ त तेन्हि प्रभु सेवक ना धरान्ता, होर जे तेन्हि धराण चहन्ते तेन्हि बि ठाकता त सतसंग केआं बखरे कराई छता।

¹¹ त ए ट्यारे! बुराई ना, पर भले कम करे। किस कि जे भले कम कता, से परमेश्वरे गभुर भुण हरालता। पर जे बुराई कते, से परमेश्वर ना जाणते।

¹² होर भाई दिमेत्रुसे बारे सोबी जेईं खरी उगाह देन्ते। से सच्चाई पुठ हंटता। तसे बारे अस बि उगाह देन्ते, होर तु जाणता कि हें उगाही सच्ची असी।

अखिरि बोके त नमस्कार

¹³ मोउं तोउ जे सुआ त लिखुण थिउ, पर स्याही त कलमी बइ लिखण ना चहन्ता।

¹⁴ मोउं उम्मीद असी कि अउं तोउ जोई झट मीता। तोउं अस अमाणि-समाणि बिश कइ बोके कते।

¹⁵ तोउ शान्ति मेती रिहे। इठियाणि विश्वासी भाई भेण तोउ जे नमस्कार कते। तठियाणि विश्वासी भाई भेणि नओं नी नी कइ में नमस्कार कर।