2 तिमुथि 4 - Walangi

¹ ए तिमुथियुसा! जे जीन्ता त मुओरी के पंची कते, जेन्के दुबारी पंची करणे टेम त राज करणे टेम नीड़ा असा, अउं तेस परमेश्वर त यीशु मसीह उगाह रख कइ, तोउ चेता दिआई कइ ई निआंग देन्ता कि

² हर वकत खुश खबरी प्रचार करण जे तेयार बिश, त पूरे लाह जुए त शिक्षा जुए मेह्‍णु मना, जड़का त समझाण दे।

³ किस कि ईं टेम बि एन्ता जपल मेह्‍णु खरी शिक्षा ना मानते, पर अपु अपु पापे गुणे खातिर सद तिहांणि शिक्षा शिचालणे बाड़ी कठेरते, जे से शुणुण पसंद कते।

⁴ से खरी शिक्षा अणशुणि कइ छते त मन गढ़त बोके त कथाई कन लाई कइ शुणते।

⁵ पर तु, ए तिमुथियुसा, हर चीजी पुठ समोझि बिश, कष्ट सेह त खुश खबरी प्रचार करणे कम त परमेश्वरे जे कम तेन्धे दुतो असु, तस पूरा कर।

⁶ किस कि अभेईं परमेश्वर जे मोउं अपु जिनि भकत देणे टेम एई गो असा त में मरणे टेम भोई गो असा।

⁷ मेईं परमेश्वरे खुश खबरी खातिर यक फौजी ईं अपु जी जान लोओ असी, त परमेश्वरे तेस सेवाई दौड़ पूरी की, होर विश्वासेरी जे शिक्षा परमेश्वर मेन्धे दुतो थी, से सुसुर जुढ़ेरी रखो असी।

⁸ अब एण बाड़े रोज अन्तर मोउं जे धर्मी मेह्‍णु कें धे देण बाड़ा मुकुट रखो असा, जे से न्यायी त धर्मी प्रभु मेन्धे देन्ता। होर तेन्हि सोबी कें धे बि देन्ता, जे तसे एण बोडे चह जुए भाड़ बिशो असे।

नीजी संदेश

⁹ ए तिमुथियुसा, मोउं केईं झट एणे कोशिश कर।

¹⁰ किस कि देमासे इस मतोके सुख चही कइ अउं अकेला छड़ा दिता त थेस्सलुनीका शेहर जे घेई गा। क्रेसकेंस गलाती इलाके अन्तर त तीतुस दलमतिया इलाके अन्तर परमेश्वरे सेवा करण जे गो असा।

¹¹ सद लूका मोउं जुए सेवा करण लगो असा। एन्ते टेम मरकुस बि घिन आई, किस कि में सेवा अन्तर से सुआ कमे असा।

¹² मेईं तुखिकुस इफिसुस शेहर लंघो असा।

¹³ जे लम्मा कोट मेईं त्रोआस शेहरे करपुसे गी छो थिआ, तस त कताबी, खास कर छोड़ी के कताबी एन्ते टेम घिन आई।

¹⁴ टामे भाणे बणाण बाड़ा तेन सिकन्दरे मोउं सुआ दुख दुतो असा। प्रभु तस तसे कमी के फल देन्ता।

¹⁵ तु बि तस केआं समोझि बिश, किस कि से हें शिक्षाई के सुआ खिलाफ असा।

¹⁶ जपल मेईं रोम शेहरे कोर्ट कचेरी अन्तर पेहली बार अपु पक्ष रखा त केनि जेईं बि में सात ना दिता, बल्कि सम्हाई जेईं अउं छड़ दी छड़ा। अउं प्रार्थना कता कि प्रभु तेन्हि एसे बारे ना पुछे।

¹⁷ पर प्रभु मोउं जुए बिशा त मेन्धे अपु ताकत दिती, ताकि में बेलि खुश खबरी पूरा प्रचार भोल त सम्हाई गैर यहूदी तस शुणेल। त अउं मरुण केआं बच गा।

¹⁸ होर एण बाड़े रोज अन्तर बि प्रभु मोउं सोबी बुराई केआं छुड़कान्ता त अपु स्वर्गे राज्य अन्तर सही सलामत पुजान्ता। तेसे गुणगान जुग जुग तकर भुन्ति रिहे। आमीन!

अखिरि नमस्कार

¹⁹ प्रिस्का भेण त तसे धाणि अक्विला, होर भाई उनेसिफुरुसे टब्बर जे में नमस्कार।

²⁰ इरास्तुस, कुरिन्थुस शेहर अन्तर रेही गा त त्रुफिमुस भाई बीमार भुआ त मेईं तस जे मिलेतुस शेहर बिशणे बोलु।

²¹ हियुंत केआं पेहलाई एणे कोशिश कर। यूबूलुस, पूदेंस, लीनुस त क्लौदिआ भेण होर सम्हाई भाई भेण तोउ जे नमस्कार कते।

²² प्रभु तोउ जुए रिहे। तोउ पुठ परमेश्वरे कृपादृष्टि भुन्ति रिहे।