2 तिमुथि 3 - Walangi

अखिर रोजी अन्तर कड़ा-क्लेश

¹ पर, ए तिमुथियुसा! याद रख कि प्रभु यीशु एणे अखिर रोजी अन्तर सुआ कड़ा-क्लेश भुन्ति।

² किस कि मेह्‍णु मतलबी, लोभी, रोभ किढ़णे बाड़े, घमण्डी, होरी के बुराई करणे बाड़े, अपु ईया बोउए केहणा ना मानणे बाड़े, खुदगर्ज, बेधर्मी बण घेन्ते।

³ से यक होरी जोई परेम ना कते। से केसे माफ ना कते, पर दोष लाणे बाड़े भुन्ते। से कशि कइ ना बिश्ते, नकठर बणते, होर खरी खरी बोकी के खिलाफ भुन्ते।

⁴ से ठग, फुर्तुआटा, त लूचे भुन्ते। से परमेश्वर जोई परेम करणे बदले अपु मौज मस्ती अन्तर बिशुण ज्यादा पसंद कते।

⁵ से परमेश्वरे भक्ति करणे ढंग त कते, पर तसे शक्ति ना मानते। तेन्हि केआं दूरे बिश।

⁶ एन्हि बुच से मेह्‍णु असे, जे मेह्‍णु ठगाण जे अगरोरिया तेन्के मेहमान बण कइ घेन्ते। त से जे जिल्हाणु सोच विचार अन्तर कमजोर असी, जे अपु सुआ पापी के बझई जुए परेशान असी, त हर किस्मे इच्छाई के जाल अन्तर फसो असी, तेन्हि से अपु गलत शिक्षा शिचालते।

⁷ किस कि से जिल्हाणु हमेशा शिचती रेहन्ती, पर खरी शिक्षाई बारे पता तेन्हि कदी ना लगतु।

⁸ जीं यन्नेस त यम्ब्रेस मूसे खिलाफ भो थिए, तीं ए गलत शिक्षा शिचालणे बाड़े बि सच्चाई खिलाफ भुन्ते। एन्के दिमाख भस भोई गो असा, होर एन्के विश्वास सद दिखावा असा।

⁹ पर ए त एन्के शिक्षा सुआ रोज तकर मेह्‍णु ना ठगाई बटती, किस कि जीं यन्नेसे त यम्ब्रेसे चाली सम्हाई मेह्‍णु पता लग गो थिआ, तीं एन्के बि भुन्तु।

तिमुथियुस जे खास शिक्षा

¹⁰ पर ए तिमुथियुसा! तोउ ठीक ठाक पता असा कि मेईं मेह्‍णु कीं खरी शिक्षा शिचालो असी, त मेईं कीं खुश खबरी लेएक जिन्‍दगी जीओ असी। तोउ पता असा कि खुश खबरी प्रचार करण अन्तर में मकसद कीं रेहा, त मेईं कीं यीशु मसीह पुठ विश्वास कर कइ सुआ लाह रखा। तोउ ई बि पता असा कि मेईं कीं सम्हाई मेह्‍णु जोई परेम किओ असा त कीं मुश्किले टेम अन्तर बि तसे सेवा किओ असी।

¹¹ तोउ हउ बि पता असा कि अन्ताकिया, इकुनियुम त लुस्त्रा शेहर अन्तर जे दुख त कष्ट मोउं पुठ ओ थिए, से त होरे कष्ट बि मेईं कीं सेहे; होर प्रभु तेन्हि सम्हाई केआं अउं कीं बचा।

¹² सच्चाई ई असी कि जे बि यीशु मसीह अन्तर भक्ति जुए जीण चहन्ते, तस सोबी केआं कष्ट त उहियामा मेता।

¹³ पर गलत शिक्षा देण बाड़े त ढोंगी, मेह्‍णु ठगान्ते ठगान्ते से अपफ बि ठगीन्ते रेहन्ते, होर तेन्के हाल बुराई केआं हउ बि बुरा भोई घेन्ता।

¹⁴ पर ए तिमुथियुसा! जे शिक्षा तेईं शिचो असी त जेस पुठ पूरा भरोसा असा, तेस पुठ विश्वास कते रिहे, किस कि तोउ पता असा कि जेन्हि केईआं तेईं ए शिक्षा शिचो असी, से यकीन लेएक असे।

¹⁵ होर परमेश्वरे वचन जे तेईं मठड़ियार केआं पिछाणो असे, तेन्हि पुठ बि विश्वास कते रिहे, किस कि ए यीशु मसीह पुठ विश्वासे बेलि बचुण जे तोउ अक्लदार बणाई बटते।

¹⁶ किस कि परमेश्वरे सम्हाई वचन तसे शिच सलाही बेलि लिखो असे, त ए मेह्‍णु शिचालणे, सुधारणे त जड़काणे लिए होर परमेश्वरे वचने हिसाब जुए जीण लिए फायदामन्द असा,

¹⁷ ताकि परमेश्वरे सेवक हर किस्मी खरे कम करण जे सुसुर भोई बिशियेल।