2 तिमुथि 2 - Walangi

यीशु मसीहे सच्चा फौजी

¹ तोउं त ए तिमुथियुसा, में कोईया! प्रभु यीशु मसीह अन्तर जे कृपादृष्टि असी, तस अन्तर हउ बि ताकतवर बण।

² त प्रभु यीशु बारे जे जे बोके तेईं सुआ मेह्‍णु के सम्हाणि मोउं केआं शुणो असी, तेन्हि बोकी तु ईं यकीन लेएक मेह्‍णु शिचाल, जे होरे मेह्‍णु शिचाल बटते।

³ तु यीशु मसीहे यक सच्चे फौजी ईं असी जुए खुश खबरी प्रचार करण अन्तर कष्ट सेह।

⁴ जपल कोई फौजी लड़ाई करण जे घेन्ता त से होर केसे कम अन्तर मन ना लान्ता, पर अपु अधिकारी खुश करण जे लड़ाई अन्तर अपु जी जान लान्ता।

⁵ दौड़ुं प्रतियोगिता अन्तर कोई अगर नियम जुए ना दौड़ता त तस ईनाम ना मेती।

⁶ जे जिमदार कमुन्ता, पेहले तस फसली बांट मेओ लौती।

⁷ अउं जे बोक बोलुण लगो असा, तेस पुठ ध्यान दे, होर प्रभु तोउ सोब बोकी के बारे समझान्ता।

⁸ यीशु मसीह याद कते रेह, जे राजा दाऊदे ऊड़ी अन्तर जमा, त मरो मेह्‍णु केईआं दुबारी जी गा। ई से खुश खबरी भो, जेसे अउं प्रचार कता।

⁹ त इस बझई जुए दुष्टी के ईं अउं कष्ट पाण लगो असा। सद एतुरु ना, बल्कि जेहेल अन्तर बि कैद असा। पर परमेश्वरे वचन कोई कैद ना कइ बटता।

¹⁰ तोउं त, अउं तेन्हि मेह्‍णु जे सोब कुछ सेहण लगो असा, जे परमेश्वरे चुणो असे, ताकि यीशु मसीह अन्तर जे बचुण असु, से तेन्हि बि मेईंयेल त से हमेशा तसे शान अन्तर बिशियेल।

¹¹ ए त सच्चु असु कि अगर अस मसीह जुए मर गो असे त अस सम्हाई तस जुए जी बि घेन्ते।

¹² अगर अस लाह जोई सेहन्ते रेहन्ते त तस जुए राज बि कते; अगर अस तस मुकीर छते, त से असी बि मुकीर छता।

¹³ अगर अस मसीह जुए किओ अपु जुबान बि टोड़ते, तोउं बि से अपु जुबान ना टोड़ता, किस कि से सभाव केआं ना मुकरीन्‍ता।

परमेश्वरे बधिआ कारगीरी

¹⁴ बे कोईया! सोब विश्वासी जे इन्हि बोकी के बारे चेता दिआन्ता रेह। त परमेश्वरे सम्हाणि जड़कइ कइ बोल कि कुछ शब्दे मतलब जुओई अपफ बुछ झगड़ा भेएड़ा ना करे, किस कि इन्के बेलि कोई फायदा ना भुन्ता। बल्कि जे एन्हि शुणते तेन्के विश्वास खतम भोई घेन्ता।

¹⁵ त तु अपफ ईं कारगीरी बणणे पूरी कोशिश कर जे परमेश्वरे लेएक भोल, जेस केसे बोकी पुठ शरम ना अओ लौती त जे खुश खबरी सच्चाई सुसुर शिचालता।

¹⁶ पर बेधर्मी बोकी के बेहेस करण केआं दूर बिश, किस कि जे मेह्‍णु ईं बेहेस कते, से परमेश्वर केआं हउ बि दूर भोई घेन्ते।

¹⁷ त तेन्के शिक्षा बसलेईए घा ईं बधता घेन्ता। हुमनियुस त फिलेतुस तेन्हि मेह्‍णु के बुचा दुई असे।

¹⁸ से ई बोते कि “मरो मेह्‍णु त दुबारी जी गो असे”। से सच्चाई केआं दूर भोई गो असे त सुआ मेह्‍णु के विश्वास मुकान्ते।

¹⁹ तोउं बि परमेश्वरे सच्चा विश्वासी, तसे गीहे मजबूत खाई ईं विश्वास अन्तर पक्का रेहन्ता त तस पुठ परमेश्वर अपु वचने मुहर लान्ता कि “जेन्के भगवान पुठ पक्का विश्वास असा, तेन्हि से पिछाणता।” त “जे यीशु मसीह अपु प्रभु मानता, तस सम्हाई पाप केआं दूर बिशुण असु।”

²⁰ बोक ई असी कि केसे लाले गी, सद क्युटेरी भाण ना भुन्ते, पर कुछ कठोड़े त जने भाणे बि भुन्ते; कोई भाणे खास कम जे त कोई भाणे इहांणि बरताण जे भुन्ते।

²¹ अगर कोउं अपफ सम्हाई पापी केआं शुचे करियेल त से क्युटे भाणि केईं खास कम करण जे शुचे भोई घेन्ते, होर सम्हाई खरे कम करण जे तेयार भुन्ते त अपु मालिके कम एन्ते।

²² तोउं त में कुआ, जे पापे कम जवान मेह्‍णु करण चहन्ते, तेस केआं दूर बिश त जे शुचे मन जुए परमेश्वरे सेवा कते, तेन्हि जुए मी कइ परमेश्वरे नजर अन्तर अब्बल जीणे, तसे यकीन लेएक भुणे त होरी जे परेमे करणे, होर उई मी कइ बिशुण जे जीं तीं कोशिश कर।

²³ पर बेमतलबी त बेअक्ले बेहेस केआं दूर बिश, किस कि तोउ त पता असा कि एन्के बेलि झगड़े भेएड़ा भुन्ता।

²⁴ प्रभु सेवक फर्तुआटा ना लौता, पर सोबी जुए नरमी कइ बिशणे बाड़ा, खरा शिचालणे बाड़ा त सुआ सीढ़णे बाड़ा लौता।

²⁵ जे हें खिलाफ भुन्ते तेन्हि से खरी नरमी कइ समझाण लौते, कि पता परमेश्वर तेन्हि बुचा केसे जेईं धे मन बदलाणे आत्मा दिआल त से बि सच्चाई वचन पिछाणल,

²⁶ त परमेश्वरे इच्छाई मुताविक कम करण जे मन लाई कइ शैताने जाल केआं छूट घियाल।