2 तिमुथि 1 - Walangi

नमस्कार

^1-2 ए ट्यारे तिमुथियुसा, में कोईया! अउं पौलुस इस चिट्ठि लिखुण लगो असा। परमेश्वरे अपु इच्छाई मुताविक अउं यीशु मसीहे प्रतिनिधि बणो असा त यीशु मसीह अन्तर जे जीवने जुबान असी, तसे प्रचार करण जे लंघो असा, परमपिता परमेश्वरे त हें प्रभु यीशु मसीहे दाह, कृपादृष्टि, त शान्ति तोउ पुठ भुन्ति रिहे। आमीन!

भरोसे लेएक भुण जे हिम्मत देण

³ ए तिमुथियुसा, जेस परमेश्वरे सेवा अउं अपु पुरखी के ईं रीति रिवाज जुए त साफ अन्तरात्माई जुए कता, तेस धन्यवाद कता कि अउं रोज ब्यागे ब्यादि अपु प्रार्थना अन्तर तोउ याद कता।

⁴ त में लिए जे तु रोलुण लगो थिआ, तस याद कर कइ अउं हर वकत तोउ जुए मीण चहन्ता त खुश भुण चहन्ता।

⁵ मोउं तेस सच्चे विश्वासे याद एन्ती, जे पेहले तें नानि लोइस त तें ई यूनिक अन्तर थिआ। होर मोउं पूरा यकीन असा कि सेईंए विश्वास तोउ अन्तर बि असा।

⁶ इस बझई जुए अउं तोउ चेता दिआन्ता की परमेश्वरे जे वर में हतेउ रखणे बेलि तोउ मेओ थिआ, तस सुसुर उरतीण-बरतीण दिए।

⁷ किस कि परमेश्वरे हेन्धे डरणे आत्मा नेईं दुतो बल्कि हिम्मते, परेमे त समोझि कइ बिशणे आत्मा दुतो असी।

⁸ तोउं त हें प्रभु बारे उगाही देण केआं त अउं जे तसे कैदी असा, असी केआं ना लजीण। पर परमेश्वर जे शक्ति देन्ता तेसे बेलि खुश खबरी प्रचार करण अन्तर मोउं जुए कष्ट सेह।

⁹ तेन परमेश्वरे अस बचाए त शुची जिन्‍दगी जीण जे भिहो असे। होर ई हें कमे बझई जुए नेईं, पर यीशु मसीह अन्तर इस धरती बणुण केआं पेहले ईं तेसे, जे दाह त मकसद असी जे असा, तस बझई जुए किआ।

¹⁰ होर जपल हें बचाणे बाड़ा यीशु मसीह इस धरती पुठ आ त से दाह त मकसद प्रकट भुई। तेन मरणे ताकत खतम कर कइ परमेश्वरे खुश खबरी पुठ विश्वास करणे बाड़ी जे परमेश्वर जुए हमेशा जीणे मौका दिता।

¹¹ त परमेश्वरे इसे प्रचार करण त मेह्‍णु शिचालण जे अउं प्रतिनिधि बणा।

¹² इस बझई जुए अउं ए सोब दुख बि सेहन्ता पर लजिन्ता नोउ, किस कि मेईं जेस पुठ विश्वास किओ असा, तस मसीह जाणता। मोउं मसीह पुठ पूरा यकीन असा कि तसे न्याय करणे रोज तकर सेईंए परमेश्वरे दुतो खुश खबरी रखवाली कइ बटता।

¹³ जे खरी खरी बोके तेईं मोउं केआं शुणो असी, तस मसीह यीशु अन्तर पूरे विश्वास त परेम जुए यक अब्बल शिक्षा समझ कइ पक्के बण बिश।

¹⁴ त जे शुची आत्मा हें अन्तर भुन्ति, तसे ताकती बेलि इस खुश खबरी रखवाली कर।

¹⁵ तोउ पता असा की एशिया इलाके जे विश्वासी थिए, तेन्हि सोबी अउं छड़ दी छो असा, जेन्हि बुच दुई बंदे फूगिलुस त हिरमुगिनुस बि असे।

¹⁶ प्रभु उनेसिफुरुसे टब्बर पुठ दाह करे, किस कि तेन सोब लज शरम छड़ कइ अउं, जे यक कैदी असा, मोउं मीण जे सुआ लिंग एई कइ मोउं सुख दिता।

¹⁷ से जपल बि रोम शेहर अन्तर आ, त सुआ कष्ट कर कइ अउं तोपा त मोउं जोई मिआ।

¹⁸ होर जे जे सेवा तेन इफिसुस शेहर अन्तर किओ असी, तसे बारे त तोउ ठीक ठाक पता असा। अउं प्रार्थना कता कि जेस रोज प्रभु यीशु पंची करण जे एन्ता, तपल तेस पुठ दाह करे।