2 थेस्सलु 2 - Walangi

प्रभु यीशु दुबारी एण त कलंकी मेह्‍णु

¹ ए भाई त भेणिओं! अब हें प्रभु यीशु मसीह दुबारी एणे त तस जुए हें मीणे बारे तुसी जे छनेअरे कते,

² कि कोई बि भविष्य वाणि, या शिक्षा, या चिट्ठि जे मेह्‍णु समझते कि असी लंघो असी, जेठि बोलो असु कि “प्रभु यीशु दुबारी एई गो असा”, तसे बेलि तुस परेशान ना भो, त अपु मन खराब ना करे।

³ कोई जेईं बि तुसी कीं कइ बि ना ठगाल, किस कि से रोज तपल तकर ना एन्ता, जपल तकर मेह्‍णु विश्वास करण छड़ ना दियेल, होर से कलंकी मेह्‍णु मतलब बरबादी अण्हणे बाड़ा मेह्‍णु ना खड़ियाल।

⁴ से अपफ परमेश्वरे त जे पूजा करणे लेएक असे, तेन्के खिलाफ भुन्ता त अपफ जे बोडा बोता। से अपफ जे परमेश्वर बोता त परमेश्वरे देहेर अन्तर पासर बंठ कइ बिश्ता।

⁵ तुसी याद नेईं ना कि जपल अउं तुसी जुए थिआ त एसे बारे तुसी जे समझान्ताथ?

⁶ अपल तकर तुसी पता लग भोल गो कि से केन रोक रखो असा, ताकि परमेश्वरे ठीक किओ टेम पुठ निसाल।

⁷ किस कि तेस कलंकी नियको शक्ति अभेईं बि कम करण लगो असी; पर अभेईं यक रोकणे बाड़ा असा त तपल तकर से कलंकी हें बुच ना एई बटता, जपल तकर कि से रोकणे बाड़ा हें बुचा बाहर ना घेई घियाल।

⁸ तोउं से कलंकी मेह्‍णु निसता। पर जपल प्रभु यीशु दुबारी एन्ता, से तेस अपु बोकी बइ मार छता त अपु एणेरी चमके बइ भसम कइ छता।

⁹ तेस कलंकी मेह्‍णु एण शैताने कमे हेसाब जोई भुन्ता, जीं कि हर किस्मी झूठे चमत्कार, झूठे निशाण, झुठी ताकत

¹⁰ त हर किस्मी धोखे असे, जे तेन्हि नाश भुणे बाड़ी जे असे, किस कि तेन्के दिल अन्तर सच्चाई जे कोई परेम नेओथ, जेसे बेलि से बच घेन्तेथ।

¹¹ तोउं त परमेश्वर यक झुठी शक्ति तेन्हि बुच लंघान्ता ताकि से सोब झूठ पुठ यकीन करे।

¹² त जे सोब मेह्‍णु सच्चाई पुठ यकीन ना कते त पाप करण अन्तर खुश रेहन्ते, तेन्हि सोबी सज्जा मेई घेन्ति।

हिम्मत रखे

¹³ पर ए भाई त भेणिओं, त प्रभु यीशु ट्यारे मेह्‍णुओ! असी हर बेले तुं लिए परमेश्वरे धन्यवाद करुण बारा, किस कि शुरुवात केआं प्रभु तुसी चुणो असे, ताकि तुस शुची आत्माई बइ शुचे भोई कइ त सच्चाई पुठ विश्वास कर कइ बच बटियेल।

¹⁴ एस बझई जुए हें खुश खबरी प्रचार करणे बेलि तेन तुस भिए, ताकि तुसी बि हें प्रभु यीशु मसीहे शान मेई घियेल।

¹⁵ तोउं त ए भाई त भेणिओं! हिम्मत रखे त जे शिक्षा असी बोकी जुए त चिट्ठि बइ तुसी शिचालो असी, तस मानते रिहे।

¹⁶ अभेईं, हें प्रभु यीशु मसीह अपफ, त हें परमपिता परमेश्वर, जेन असी जोई परेम किओ असा त अपु दाह जुए हें धे कदी ना मुकुणे बाड़ा अराम त खरी उम्मीद दुतो असी,

¹⁷ से तुं मन अन्तर हिम्मत दिए त सम्हाई खरे कम करण जे, होर अपु वचन अन्तर बधुण जे शक्ति दिए।