2 पतरस 3 - Walangi

प्रभु एणे रोज

¹ ए ट्यारेओ! अब अउं तुसी जे ई दोकी चिट्ठि लिखण लगो असा। त एन्हि अन्तर अउं तुसी याद दिआई कइ हिम्मत देन्ता कि तुस अपु मन शुचा रखे।

² होर जे बोके शुचे भविष्य वक्ते पेहलाई बोलो असी, तेन्के बोके तुसी कदी ना बिसरीण। त हें प्रभु त बचाणे बाड़े तेस निआंग याद करे, जे तुं धे प्रतिनिधि के बेलिए दुतो थी।

³ पेहले ईं जाण घिए कि धरती अखिर रोजी अन्तर हसाड़ मखोल करणे बाड़े एन्ते, जे अपु बुरी इच्छाई बेलिए मखोल कते।

⁴ होर से बोते कि “मसीह एणे त सोहो कइ गा, पर अपल तकर कुछ नेईं भो। किस कि जपल केआं खड़ बाव दादु मर गो असे, सोब किछ तिहांणि असु, जीं मतोके शुरु केआं थिउ?”

⁵ से त जाण बुझ कइ बिसरी गो असे कि सुआ टेम केआं पेहले परमेश्वरे अपु शब्दे बइ अम्बर बणा त टिगाई रखो असा। होर धरती बि पाणि अन्तरा बणि त पाणि पुठ टिग बिशो असी।

⁶ एस पाणि बेलिए ईं परमेश्वरे तेस जुगे धरती डूबाई कइ खतम की।

⁷ पर आजकण जमाने अम्बर त धरती तसे शब्द बेलिए ईं तोउं रखो असी कि आगी बेलिए जाईयेल। होर ए बेधर्मे मेह्‍णु के पंची कर कइ खतम भुणे रोज तकर इहांणि रखीन्ते।

⁸ पर ए ट्यारेओ, एस बोक केआं तुस अणजाण न बिशे कि प्रभु लिए यक रोज, हजार साले ईं असे त हजार साल, यक रोजे ईं असे।

⁹ त जीं केहि मेह्‍णु समझते कि प्रभु अपु जुबान पूरी करण चेरे लान्ता, से ठीक नेईं। से त तुं लिए लाह रखता। से न चहन्ता कि कोई खतम भो, पर ईं कि सोबी मन बदलणे मौका मेओ लौता।

¹⁰ प्रभु एणे रोज चोरे ईं अजगता एई घेन्ता। तेस रोज अम्बर सुआ गड़गड़ाहट कर कइ खतम भोई घेन्ता त तठिआ सोब कुछ सुआ तची कइ घुहुड़ि घेन्तु। तोउं धरती त तेस पुठ भुओ हर कमे सही गलते फैसला भुन्ता।

¹¹ त किस कि ए सोब चीजे ईं भुई कइ खतम भुणे बाड़ी असी, त तुं चाल चलण त जीण की भुण लौता? जरूर शुचा त परमेश्वरे भक्ति बइ भरिए लौता।

¹² होर तुसी परमेश्वरे न्याय करणे रोज भाड़ बिशुण चहिए त तसे झठ एणे लिए कोशिश करीण चहिए। तेस रोज अम्बर आगी बेलि घुहुड़ि घेन्ता त तठिआ सोब कुछ सुआ तची कइ पटास बण घेन्तु।

¹³ पर परमेश्वरे हेन्धे यक नओएं अम्बर त नोई धरती जुबान दुतो असी, जेठि सद धरम रिहाल। अस तस हेरणे उम्मीद कते।

अखिरि बोके त अशुश

¹⁴ तोउं त, ए ट्यारेओ! किस कि तुस अन्हि बोकी के उम्मीद कते, त कोशिश करे कि तुस से बजन कोई कलंक त नरदोष, होर तेस जोई शान्ति जुए बिशो मेईंए।

¹⁵ होर तुस समझ घिए कि प्रभु तोउं लाह रखता, किस कि से चहन्ता कि सोब बच घिए। एसे बारे हें ट्यारे भाई पौलुसे बि तेस ज्ञाने हेसाब जुए, जे तेस मेआ, तुसी जे लिखो असु।

¹⁶ तिहांणि तेन अपु सोबी चिट्ठि अन्तर बि अन्हि बोकी के बारे लिखो असु, जेन्हि अन्तर केहि बोके ईं असी कि जे समझुण जे ओखी असी। होर नासमझ त दुमने मेह्‍णु तेन्के मतलब मरोड़ कइ अपु खातमा कराणे बझह बणान्ते, जीं से धरमे कताबे होरी बोकी के बि कते।

¹⁷ तोउं त, ए ट्यारेओ! किस कि तुसी इन्हि बोकी के बारे पेहलाई पता लग गो असा, त तुस चौकाने बिशे, ताकि बेधर्मी के गलती अन्तर फस कइ विश्वास केईआं ना भटकियेल, होर अपु विश्वास खतम ना करियेल।

¹⁸ पर तुस हें प्रभु त बचाणे बाड़ा यीशु मसीह कृपादृष्टि त ज्ञान अन्तर बधते घिए। यीशु मसीहे इज्जत अभेईं त जुग जुग तकर भुन्ति रिहे। आमीन।