2 पतरस 2 - Walangi

गलत शिक्षा देणे बाड़े त तेन्के सज्जा

¹ त जीं तेन्हि इस्राएले मेह्‍णु बुछ केहि झूठे भविष्य वक्ता थिए, तीं तुसी बुछ बि गलत शिक्षा देणे बाड़े भुन्ते। से नियोक नियोक कइ नाश करणे बाड़ी कुबुद्धि देन्ते। से त तेस ताकतवर प्रभु बि इन्कार कते, जेन से अपु जानी कीमत दी कइ खरीदो असे। ईं कर कइ से अपु घेणे दन नीड़ीयेर आणते।

² सुआ जेईं तेन्के शिक्षा मान कइ तेन्के ईं लूचियाम कते। तेन्के बझई जोई मेह्‍णु सच्चाई बुराई कते।

³ से लालची भुन्ते त अपु फायदे लिए फेशि लाई कइ तुसी ठगान्ते। पर तेन्के सज्जा परमेश्वरे पेहलाई शुणाई छो असी। तेस एणे देर नेईं भो, त तेन्के खातमा नेईं टलो।

⁴ किस कि परमेश्वरे से स्वर्गेदूत न छड़े, जेन्हि पाप किओ थिए, बल्कि न्याय करणे रोज तकर से बन्हि कइ नर्के अन्हारे कुण्ड अन्तर छइ छड़े।

⁵ होर नूहे जमाने मेह्‍णु बि ना छड़े। परमेश्वरे दुष्ट मेह्‍णु पुठ दाह ना की, बल्कि तेन धरती पुठ बाढ़ लंघाई कइ सोब मेह्‍णु खतम किए। पर तेन धरमे कमी के प्रचार करणे बाड़ा नूहे दी सद अठ मेह्‍णु बचाए।

⁶ होर सदोम त अमोरा शेहर खतम करणे ईं सज्जा शुणाई कि से आगे बेलि जाई कइ पटास बड़ाई छड़े, ताकि से परमेश्वर ना मानणे बाड़े, जे एणे बाड़े असे, तेन्हि जे यक सबक बणियेल।

⁷ तेन्हि बिचा सिर्फ यक धर्मी मेह्‍णु लूत बचाई छड़ा, जे दुष्ट के चाल चलण हेर कइ दुखी थिआ।

⁸ (किस कि से धर्मी मेह्‍णु तेन्के बुच बिश कइ तेन्के बेधर्मे कम हेर त शुण शुण कइ, हर यक रोज अपु सच्चे मन अन्तर तीं दुखी भुन्ताथ।)

⁹ त एसे मतलब असा कि से प्रभु धर्मी परखुण केआं बाहर किढ़ण त अधर्मी मेह्‍णु न्याय करणे रोज तकर सज्जा देण बि जाणता।

¹⁰ खास कर तेन्हि जे परमेश्वर सुआ सक्ति कता, जे तसे राज ना मानते त सद अपु जिसमे बुरी इच्छाई हेसाब जुए जीन्ते। से गलत शिक्षा देणे बाड़े ढीठ त लापरवाह असे, त अपफ केईआं बोडी जे भलु बुरु बोलुण जे बि ना डरते।

¹¹ तोउं बि स्वर्गेदूत जे शक्ति त ताकत अन्तर तेन्हि मेह्‍णु केआं बोडे असे, से बि प्रभु सामणि तेन्हि जे भलु बुरु बोल कइ दोष लाण जे हिम्मत न कते।

¹² पर ए मेह्‍णु बेअक्ले जानवर के ईं असे, जे सद मेह्‍णु के बेलि टेईंण त खतम भुण जे पैदा भो असे, होर जेन्हि बोकी के बारे ए जाणते ई नउ, तेन्के बारे होरी जे भलु बुरु बोते। परमेश्वर एन्हि खतम कइ छता, जीं मेह्‍णु जंगली जानवरी मारते।

¹³ तेन्के बुरु करणे फल तेन्के बुराई भुन्ति। तेन्हि त दन-धहाड़े मस्त मलंग अन्तर बिशुण खरु लगतु। ए मेह्‍णु तुसी जे कलंक त दोष भिन्थ, किस कि एन तुसी जोई त खाण पीण जे बिश्ते, पर अपु कनारा धाम खाई कइ गलत कम कते।

¹⁴ तेन्के टीर हमेशा नाजायज रिश्ता बणाण जे मौका तोपते रेहन्ते, त से पाप करणे बजन रेही ना सकते। से विश्वास अन्तर कमजोर भुओ मेह्‍णु बेहकाइ छते, त तेन्के मन लालच करण घटी गो असा। तेन्हि परमेश्वरे शराप दुतो असा।

¹⁵ से सच्चाई बथ छड़ कइ मुकणे बथ पुठ हंटण लगो असे, जीं बओरे कुआ बालाम भविष्य वक्ता हंटो थिआ। तस बुराई कर कइ कमाण ट्यारु लगो थिउ।

¹⁶ पर परमेश्वर यक बेजुबान खेचरे बेलि बोक कर कइ से जड़का। एन खेचरे मेह्‍णु भाषा बोल कइ यक भविष्य वक्ता तसे उफोंकरियार केआं रोका।

¹⁷ से गलत शिक्षा देणे बाड़ी शुखो सुजली के ईं त तेज ब्यारी बेलिए उडरो बदेए ईं असे। परमेश्वरे अन्हि जे सुआ अन्हारी जगाह तेयार किओ असी।

¹⁸ से बेमतलब घमण्डे बोके त गलत कमी के बेलिए तेन्हि मेह्‍णु जिसमे बुरी इच्छाई अन्तर फसाई छते, जे बिचारे होता पापे कमी केआं सुधरुण लगो असे।

¹⁹ से तेन्हि तेस केआं छुड़काण जे सोह कते, पर अपफ नाश करणे बाड़ी बुरे बोकी के गुलाम बणते। किस कि जे मेह्‍णु जेस केआं हार गा, से तसे गुलाम बण घेन्ता।

²⁰ से प्रभु त हें बचाणे बाड़ा यीशु मसीहे पिछाणणे बेलिए मतोके केहि किस्मी पापी केआं बच कइ बि, अगर दुबारी तेन्हि अन्तर फस कइ हार गो असे, त तेन्के दशा पेहलकण दशाई केईं बि ज्यादी बुरी भोई गो असी।

²¹ किस कि तेन्के लिए धरमे बथ जाण कइ परमेश्वरे दुतो शुची निआंग ना मनण केआं खरी थी कि तेस केआं बिलकुल ईं अणजाण भुन्तेथ।

²² तेन्हि पुठ ईं उजवाण सुसुर बिश्तु कि कुतर अपु उल्टी खाण जे, त सन्हो किओ सूर जन बुच लोटीण देण जे दुबारी घेई घेन्ते।