2 यूहन्ना 1 - Walangi

नमस्कार

¹ ए ट्यारे परमेश्वर चुणो से जिल्हाणु त तसे गभुरुओ, जेन्हि जोई अउं सच्चा परेम कता! अउं सतसंगे स्याणा यूहन्ना तुसी जे नमस्कार कता। तुसी ना कि सद अउं परेम कता, बल्कि से सोब बि परेम कते जे सच्चाई जाणते।

² अस तुसी जोई परेम कते किस कि से सच्चाई हमेशा हें अन्तर भुन्ति त हमेशा हें सात रेहन्ती।

³ परमपिता परमेश्वर, होर तसे कुआ यीशु मसीहे कनारा कृपादृष्टि, दाह तुसी पुठ भुन्ति रिहे, होर तुसी शान्ति मेती रिहे, किस कि असी सच्चाई पता असा त यक होरी जोई परेम कते। आमीन

सच्चाई त परेम

⁴ जपल मेईं तें किछ गभुर परमेश्वरे निआंगे हेसाब जुए सच्चाई पुठ हंटते काए त अउं तीं खुश भुआ।

⁵ त ए ट्यारे भाई त भेणिओं! अउं तुसी सम्हाई जे याद दिआई कइ ई निआंग देन्ता कि यक होरी जोई परेम करे। ई कोई नोई निआंग नेईं, बल्कि ए त असी शुरुवात केआं ईं मेओ असी।

⁶ परेम ई भो कि असी तसे निआंगी हेसाब जुए जीण; ए सेईंए निआंग भो जे तुसी शुरुवात केईआं ईं शुणो असी। त तुसी एस मान कइ जीण बि चहिए।

⁷ किस कि सुआ ईं भरमाणे बाड़े इस मतोक अन्तर एई गो असे। से ना मानते कि यीशु मसीह सच्चे बि जिसम अन्तर जमो थिआ। जे मेह्‍णु ई बोता, से यक भरमाणे बाड़ा त मसीह विरोधी असा।

⁸ इस बझई जोई अपु विश्वासे बारे चौकाने बिशे, ताकि जे हड टोड़ कइ कष्ट असी किओ असा, से तुसी बेकार ना गवाण, बल्कि तसे पूरा फल मेईंए।

⁹ अगर कोई मसीहे शिक्षा ना मान कइ जीन्ता, होर होरे शिक्षाई कना घेई घेन्ता त तेस केईं परमेश्वर नेईं। पर जे कोउं तसे शिक्षा मान कइ जीन्ता, तेस केईं बोउ बि त कुआ बि असा।

¹⁰ त अगर कोउं तुसी केईं एई कइ मसीहे शिक्षा ना दिआल त ना तेस जे नमस्ते करुण, होर ना से अपु गी एण देण।

¹¹ किस कि जे कोउं ईं मेह्‍णु जे नमस्ते कता, से तसे बुरे कम अन्तर बि हेस्सेदार भुन्ता।

अखिरि बोके त नमस्कार

¹² ए ट्यारेओ, मोउं त हउ बि सुआ बोके तुसी जे लिखिण असी, पर कागज त स्याही बइ लिखुण ना चहन्ता। पर आं, मोउं उम्मीद असी कि अउं तुसी केईं एन्ता त अमाणि-समाणि बिश कइ बोके कते। इसे बेलि असी सोबी जे रज्जि सुख मेईंयाल।

¹³ परमेश्वरे चुणो तें भेणि के गभुर तोउ जे नमस्कार कते।